নগালেণ্ড, মণিপুৰ আৰু অসমৰ একাংশৰ পৰা সশস্ত্র বাহিনীৰ বিশেষ ক্ষমতা আইন (আর্মড ফ’ৰ্চেছ স্পেচিয়েল পাৱাৰ এক্ট বা আফস্পা) প্রত্যাহাৰৰ সিদ্ধান্ত ল’লে কেন্দ্রই । কেন্দ্রীয় গৃহমন্ত্রী অমিত শ্বাহে বৃহস্পতিবাৰে এই কথা ঘোষণা কৰিছে ।
টুইটাৰত শ্বাহে লিখিছে, ‘প্রধানমন্ত্রী নৰেন্দ্র মোদীৰ নেতৃত্বত ভাৰত চৰকাৰে কে’বা দশকৰ পাছত নগালেণ্ড, মণিপুৰ আৰু অসমত আফস্পাৰ অধীনত অশান্ত অঞ্চল কমোৱাৰ বিষয়ে গুৰুত্বপূর্ণ পদক্ষেপ কৰিছে ।’ কেন্দ্রৰ এই পদক্ষেপ উত্তৰ-পূর্বাঞ্চলত শান্তি, সমৃদ্ধি আৰু উন্নয়নৰ এটা নতুন যুগৰ সূচনা কৰিব বুলি তেওঁ জনায় ।
উত্তৰ-পূৱৰ ৰাজ্যসমূহত জংঘী তৎপৰতা মোকাবিলাৰ বাবে সেনাবাহিনীৰ হাতত অতিৰিক্ত ক্ষমতা তুলি দিবলৈ ১৯৫৮ত আফস্পা আইন জাৰি কৰিছিল কেন্দ্রই । উত্তৰ-পূৱত এতিয়া সমগ্ৰ অসম, নগালেণ্ড, ৰাজধানী ইম্ফলৰ বাহিৰে মণিপুৰৰ বাকী অঞ্চল আৰু অৰুণাচলৰ তিনি জিলাত আফস্পা বলবৎ আছে ।
যোৱা ডিচেম্বৰত নগালেণ্ডত জংঘী সন্দেহত সেনাৰ গুলিত স্থানীয় কে’বাজনো বাসিন্দাৰ মৃত্যুৰ পাছত, নতুনকৈ উত্তৰ-পূৱত এই বিতর্কিত আইন প্রত্যাহাৰৰ দাবীত আন্দোলন আৰম্ভ হৈছিল ।
সেই সময়ত উত্তৰ-পূর্বাঞ্চলত আফস্পা প্রয়োগৰ বিষয়টো পর্যালোচনা কৰিবলৈ কেন্দ্রই এটা কমিটী গঠন কৰিছিল । শ্বাহৰ মন্ত্রণালয়ে জনাইছে, যিসমূহ অঞ্চলত শান্তি-শৃংখলা বা নাশকতাৰ সমস্যা নাই, সেই অঞ্চলসমূহৰ পৰা পর্যায়ক্রমে আফস্পা তুলি ল’ব পাৰি । সম্প্ৰতি পৰ্যায়ক্ৰমে সেই প্রক্রিয়াৰ সূচনা হ’ল ।
