ধুমধামেৰে সেতুটোৰ উদ্বোধন হৈছিল । ফিটা কাটি জনতাৰ বাবে মুকলি কৰি দিছিল ৰাজ্যৰ এজন বিধায়কে । তাৰ ঠিক তিনি দিনৰ পাছতে ভাঙি পৰিল সেতুটো ।
ঘটনাটো সংঘটিত হৈছে কর্নাটকৰ উদুপিৰ মালপেৰ সৈকতত । তাত পর্যটকসকলৰ বাবে প্রায় ৮০ লাখ টকা খৰচ কৰি প্ৰস্তুত কৰা হৈছিল সমুদ্রত উপঙি থকা সেতু । প্রচাৰত কর্নাটক চৰকাৰে কৈছিল, ঢৌত সেতুৰ ওপৰেদি খোজকাঢ়িব পাৰিব পৰ্যটকসকলে । ঢৌৰ উঠা-নমা অনুভৱ কৰিব পাৰিব সেতুত খোজকাঢ়োতে ।
যোৱা শুকুৰবাৰে সেতুটোৰ উদ্বোধন হয় । দুদিন পাছত সোমবাৰে দেখা যায় সমুদ্রত টুকুৰা-টুকুৰ হৈ পৰি আছে সেতুটোৰ বিভিন্ন অংশ । ঢৌত ছিঙ খাইছে সেতুৰ ৰছি । প্রায় ১০০ মিটাৰ দীর্ঘ সেতুৰ মাজভাগৰ অংশই নাই ।
কর্নাটকৰ বিধায়ক ৰঘুপতি ভট্টই উদ্বোধন কৰিছিল সেতুটো ।
Floating bridge inaugurated by #Udupi MlA Raghupati Bhat last Friday has collapsed. Rs. 80 lakh was spent on this floating bridge. #Karnataka pic.twitter.com/6JnwglRfmH
— Imran Khan (@KeypadGuerilla) May 9, 2022
উল্লেখ্য বিধায়ক ভট্টই অৱশ্যে সেতু ভঙাৰ কাৰণ হিচাপে ঘূর্ণি বতাহ ‘অশনি’কেই দৰ্শাইছে । তেওঁ কয়, ঘূর্ণি বতাহত উত্তাল সমুদ্রই সেতু ভঙাৰ কাৰণ । যদিও সেতুটো লিজত লোৱাজনৰ দাবী যে, বতাহত সেতু ধ্বংস হোৱা খবৰটো প্ৰকৃততে উৰাবাতৰি । বতাহৰ কথা ভাবি আগতীয়াকৈ সেতুটো মুকলি কৰিছে তেওঁলোকে ।
