ৰাজ্যত বিগত কিছুদিন ধৰি নেৰানেপেৰাকৈ হোৱা বৰষুণৰ ফলত সৃষ্টি হোৱা বানপানীয়ে বজালীত সংহাৰী ৰূপ লৈছে । ইখনৰ পাছত সিখনকৈ গাঁও প্লাৱিত কৰিছে নৈৰ বাঢ়নি পানীয়ে ।
পাটাছাৰকূছী সমষ্টিত কালদিয়া নৈয়ে তীব্ৰ ৰূপ ধাৰণ কৰিছে । পাটাছাৰকূছী, পাঠশালা নিত্যানন্দ, কাৱৈমাৰী, হাঠিনাপুৰ, বাংলীপাৰা, পিপলা, অকয়া , চামতিয়া, গোমুৰা আদি বিভিন্ন অঞ্চল পহুমাৰা আৰু কালদিয়া নৈৰ পানীয়ে বুৰাই পেলাইছে ।
বজালী জিলাত নতুনকৈ সংযোজন হোৱা সৰুক্ষেত্ৰী সমষ্টিৰ কাৱৈমাৰী, হাঠিনাপুৰ অঞ্চলত কালদিয়া নৈৰ মঠাউৰি চিগাৰ বাবে বহু পৰিয়ালে নিজৰ ঘৰ এৰি ওখ ঠাইত আশ্ৰয় গ্ৰহণ কৰিব লগীয়াৰ এক পৰিৱেশ সৃষ্টি হৈছে ।
ইপিনে, ভৱানীপুৰ বিধানসভা সমষ্টিৰ ভিন্ন প্ৰান্তত পহুমৰা নদী আৰু পল্লা নদীৰ বাঢ়নী পানীয়ে বানপানীৰ সৃষ্টি কৰিছে । পহুমৰা নদীৰ বাঢ়নী পানীয়ে সৃষ্টি কৰা বানপানীৰ কৱলত পৰিছে মাধৱপুৰ, নকুছি, কৰাগাৰী, কহৰা পথাৰ, কহৰা, কুৰোবাহা পথাৰ আদি অঞ্চল ।
তেনেদৰে, পল্লা নদীৰ বাঢ়নী পানীয়ে শুকমানাহ, মাজগাঁৱৰ লগতে বৃহত্তৰ অঞ্চলটোৰ কেবাখনো গাঁও প্লাৱিত কৰিছে । গাঁওসমূহৰ ঘৰ-দুৱাৰ, ৰাস্তা-ঘাট বানপানীয়ে বুৰাই পেলাইছে ।
বৃহত্তৰ ভৱানীপুৰ বিধানসভা সমষ্টিৰ খেতি-পথাৰত চলা বানৰ তাণ্ডৱত কৃষিকাৰ্য ধ্বংস হৈ গৈছে । তদুপৰি ভৱানীপুৰ বিধানসভা সমষ্টিৰ ভিন্ন প্ৰান্তত পহুমৰা আৰু পল্লা নদীয়ে গৰাখহনীয়াৰো সৃষ্টি কৰিছে ।