জম্মু আৰু কাশ্মীৰৰ তীর্থক্ষেত্র অমৰনাথত শুকুৰবাৰে সন্ধিয়া ডাৱৰ বিস্ফোৰণৰ ১২ ঘণ্টাৰ ভিতৰতে ১৫ হেজাৰৰ অধিক তীর্থযাত্রীক উদ্ধাৰ কৰা হৈছে । শনিবাৰে কেন্দ্রীয় বাহিনী ইন্দো-তিব্বত সীমান্ত আৰক্ষীৰ (আইটিবিপি) তৰফৰ পৰা এই কথা জনোৱা হৈছে । উদ্ধাৰ কাৰ্যত আইটিবিপিৰ লগতে ভাৰতীয় সেনা, চিআৰপিএফ, ৰাষ্ট্ৰীয় আৰু ৰাজ্যিক বিপর্যয় দুৰ্যোগ প্ৰশমন বিভাগ (এনডিআৰএফ আৰু এছডিআৰএফ)-ৰ সদস্যসকলে অংশ লৈছে বুলি জনাইছে এনডিআৰএফ-ৰ ডিজি অতুল কৰৱালে ।
ইয়াৰ মাজতে অমৰনাথত মৃতৰ সংখ্যা বাঢ়ি ১৬ হৈছে বুলি জম্মু আৰু কাশ্মীৰ প্রশাসনে জনাইছে । এতিয়াও প্ৰায় ৪০ জন সন্ধানহিন বুলি উদ্ধাৰকাৰী দল সূত্রে খবৰ । ফলত মৃতৰ সংখ্যা বঢ়াৰ শংকা আছে । দ্রুত উদ্ধাৰৰ বাবে এই পর্যন্ত ছটা দল মোতায়েন কৰিছে ভাৰতীয় সেনাই । বায়ুসেনাৰ হেলিকপ্টাৰো মোতায়েন কৰা হৈছে । উদ্ধাৰ কৰা তীর্থযাত্রীসকলক প্রাথমিকভাৱে অনা হৈছে পঞ্চতৰণীৰ বেচকেম্পত ।
শনিবাৰে পুৱা প্রায় তিনি বাজি ৪৫ মিনিট পর্যন্ত আৱদ্ধ তীর্থযাত্রীসকলক উদ্ধাৰৰ কাম চলে । পুৱাৰ পৰা নতুনকৈ সন্ধানহিনসকলৰ সন্ধান আৰম্ভ হৈছে । এনডিআৰএফ-ৰ তৰফৰ পৰা শনিবাৰে অমৰনাথৰ পুণ্যার্থীসকলৰ সন্ধানৰ বাবে দুটা হেল্পলাইন নম্বৰ জাৰি কৰিছে । ইয়াৰে এটা স্থানীয় প্রশাসনৰ । আনটো অমৰনাথ দেৱস্থান ট্রাষ্টৰ ।
শুকুৰবাৰে সন্ধিয়া ডাৱৰ বিস্ফোৰণৰ ফলত অমৰনাথৰ গুহাৰ ওপৰৰ পৰা হঠাৎ পানী ওলাব লয় । তাৰ পাছতেই হঠাৎ পানী সোমাব লয় অঞ্চলত । তীর্থযাত্রীসকলৰ অস্থায়ী আবাসসমূহ উটি যায় । ঘটনাটোৰ এটা ভিডিঅ’ প্রকাশ কৰিছে সংবাদ সংস্থা এএনআই-য়ে । তাত দেখা গৈছে প্রবল স্রোতত পানী সোমাইছে পথত । দুর্ঘটনাৰ ফলত অমৰনাথ যাত্রা স্থগিত কৰিছে জম্মু আৰু কাশ্মীৰ চৰকাৰে । উদ্ধাৰ অভিযান শেষ হোৱাৰ পাছত অমৰনাথ যাত্রা আৰম্ভ কৰাৰ বিষয়ত সিদ্ধান্ত লোৱা হ’ব বুলি জনোৱা হৈছে ।
প্রসংগত, ক’ভিডৰ বাবে বিগত দুবছৰ বন্ধ আছিল অমৰনাথ যাত্রা । ৩০ জুনৰ পৰা আৰম্ভ হৈছিল যাত্রা । এই পর্যন্ত ৭২ হেজাৰ পুণ্যার্থীয়ে দর্শন কৰিছে ।
