ৰাখী বন্ধনৰ পৱিত্ৰ দিনটোতে উত্তৰ প্ৰদেশৰ ফটেহপুৰত সংঘটিত এক শোকাৱহ ঘটনাই সকলোকে কৰি তুলিছে মিয়ম্ৰাণ৷ ৩৫ যাত্ৰী কঢ়িয়াই নিয়া এখন নাও ডুব যায় নদীত৷ দুৰ্ঘটনাৰ ফলত মৃত্যু হয় এটি এবছৰীয়া শিশুসহ অন্য তিনি গৰাকীকৈ লোক ৷
আনহাতে ইয়াৰে ১৭ গৰাকী নদীত সন্ধানহীন হোৱাৰ বিপৰীতে ১৫ জনে কথমপি সাঁতুৰি নিজৰ প্ৰাণ ৰক্ষা কৰে। উল্লেখ্য যে,আজি ৰাখী বন্ধন৷এই উপলক্ষে নিজ ভাতৃক ৰাখী পিন্ধাবলৈ কেইবাগৰাকী মহিলা নিজ পিতৃ গৃহলৈ বুলি ৰাওনা হয় ৷
আজি বিয়লী তিনি বজাত উত্তৰ প্ৰদেশৰ বান্দাৰ পৰা ফটেহপুৰলৈ বুলি এখন যাত্ৰীবাহী নাও গৈছিল যমুনা নদীৰে৷ৰাখীবন্ধন উপলক্ষে অন্যদিনতকৈ আজি যাত্ৰী আছিল অত্যাধিক৷ নিৰ্ধাৰিতকৈ অত্যাধিক যাত্ৰী কঢ়িয়াই নিয়া নাওখন গন্তব্যস্হান পোৱাৰ পূৰ্বে মাজভাগত নাও খনৰ এটা অংশ ভাঙি যায়৷ফলত নাওখন ডুব যায় ৷
বান্দাৰঘাটত থকা একাংশ প্ৰত্যক্ষদৰ্শীয়ে জানিব দিয়া মতে,অভিশপ্ত নাওখনত যাত্ৰী আছিল প্ৰায় ৪৫ জনলোক৷ অত্যাধিক যাত্ৰীৰ লগতে কেইবাখনো মটৰ চাইক কঢ়িয়াই নিয়াৰ বাবে এই মৰ্মান্তিক ঘটনাটো সংঘটিত হয় বুলি সন্দেহ কৰিছে আৰক্ষীয়ে৷ দুৰ্ঘটনাটোৰ পিছতে সন্ধানহীন ১৭ যাত্ৰীৰ সন্ধানত এছ ডি আৰ এফ আৰু এন ডি আৰ এফ যমুনাত তীব্ৰতৰ অভিযান অব্যাহত ৰাখিছে৷আশংকা কৰা মতে ১৭ যাত্ৰীৰ কৰুণ মৃত্যু ঘটিছে ৷
আনহাতে উত প্ৰদেশৰ মুখ্যমন্ত্ৰী যোগী আদিত্যনাথে শোকাৱহ দুৰ্ঘটনাটোত গভীৰ শোক প্ৰকাশ কৰি এক উচ্চ পৰ্যায়ৰ তদন্ত ঘোষণা কৰে৷ এই ঘটনাই শোকাহত কৰি তোলে সমগ্ৰ ৰাজ্যখনত ৷
