সাম্প্রদায়িক হিংসা সৃষ্টি কৰাৰ অভিযোগত ৰাজস্থানৰ বিজেপি নেতা জ্ঞানদেৱ আহুজাক গ্রেপ্তাৰ কৰিলে ৰাজ্যৰ আৰক্ষীয়ে । সম্প্রতি আহুজাৰ এটা ভিডিঅ’ ভাইৰেল হৈছে । সেই ভিডিঅ’ত তেওঁক কৈ থকা শুনা যায়, “আমি ইয়াৰ আগতে পাঁচজনক মাৰিছো । এয়ে প্রথম তেওঁলোকে আমাৰ এজনক মাৰিব পাৰিলে ।”
কিন্তু এই ‘আমি’ কোন ? আৰু ‘তেওঁলোক’ বা কোন ? ভিডিঅ’ৰ দ্বাৰাই সেয়া স্পষ্টভাৱে বুজিব পৰা যায় । আহুজা বর্ণিত ‘তেওঁলোক’ প্ৰকৃততে ৰাজ্যৰ সংখ্যালঘু সম্প্রদায়ৰ লোক । ‘আমি’ হ’ল তথাকথিত গোৰক্ষক বাহিনীৰ স’তে জড়িতসকল । গোহত্যাকাৰীৰ সন্দেহত গণপ্ৰহাৰত হত্যা হোৱা পহেলু খান আৰু ৰাকবৰ খানৰ প্রসংগও এই ভিডিঅ’ত প্ৰকাশ পাইছে ।
আহুজাই ভিডিঅ’টোৰ এটা অংশত কয়, বেৰোৰ হওক বা লালৱাণ্ডি, আমি ইতিমধ্যে পাঁচজনক মাৰিছো । প্রসংগত, ২০১৭ৰ এক এপ্রিলত ৫৫ বছৰৰ পহেলু খানক ৰাজস্থানৰ আলৱাৰ জিলাৰ বেহৰোৰত প্রায় দুশ জনীয়া এটা দলে গোহত্যাকাৰী সন্দেহত লোহাৰ ৰডেৰে মাৰধৰ কৰে । ঘটনাৰ দুদিন পাছত পহেলুৰ মৃত্যু হয় ।
একেদৰেই ২০১৮ৰ ২১ জুলাইত হাৰিয়ানাত ২৯ বছৰ বয়সৰ ৰাকবৰ খানকে প্ৰহাৰ কৰি হত্যা কৰা হয় ।
ভিডিঅ’ৰ এটা অংশত আহুজাই কয়, “মই মোৰ মানুহক হত্যা কৰাৰ পূর্ণ স্বাধীনতা দিছো । তেওঁলোক ধৰা পৰিলেও আমি তেওঁলোকক জামিন দি মুক্ত কৰিম ।”
আৰক্ষীৰ হাতত ধৰা পৰাৰ পাছত অৱশ্যে আহুজাই দাবী কৰিছে, তেওঁৰ বক্তব্য বিকৃত কৰা হৈছে । নিজৰ বক্তব্যৰ সমর্থনত তেওঁ কয়, আলৱাৰত তেওঁৰ নির্বাচনী অঞ্চলত হিন্দু জাগৰণ মঞ্চৰ সদস্যসকলে তেওঁৰ স’তে নানা বিষয়ত আলোচনা কৰিছিল । তাতেই তেওঁলোকে তেওঁক জনায়, ৰাজস্থানৰ মেৱাত অঞ্চলত মুছলিমসকলে ছাইনি বোলা এজন হিন্দুক প্ৰহাৰ কৰি হত্যা কৰিছে । পূৰ্বে যি পাঁচজন মুছলমান গণপ্ৰহাৰত মৃত্যু হৈছে, তেওঁলোকে গৰু সৰবৰাহ আৰু হত্যাৰ স’তে জড়িত বুলি দাবী কৰিছে আহুজাই ।
মুছলিমসকলে অসংখ্য সন্তান জন্ম দি ভাৰতক দখল কৰাৰ চেষ্টা কৰিছে বুলিও অভিযোগ কৰিছে আহুজাই । ৰাজস্থান প্রদেশ কংগ্রেছ সভাপতি গোবিন্দ সিং দোতাছাৰাই ভিডিঅ’টো টুইট কৰি প্রশ্ন কৰিছে, বিজেপি যে কিমান সাম্প্রদায়িক দল, সেয়া বুজিবলৈ আৰু কোনো তথ্যপ্রমাণৰ প্রয়োজন আছে নেকি ?
"अब तक 5 हमने मारे हैं…कार्यकर्ताओं को खुली छूट दे रखी है..मारो **** को..ज़मानत हम करवाएँगे” ये शब्द राजस्थान भाजपा कार्यकारिणी के सदस्य और पूर्व विधायक ज्ञानदेव आहूजा के हैं।
BJP के मजहबी आतंक व कट्टरता का और क्या सबूत चाहिए? पूरे देश में भाजपा का असली चेहरा सामने आ गया है। pic.twitter.com/v8XhxZEKcF
— Govind Singh Dotasra (@GovindDotasra) August 20, 2022
