কলগাছিয়াৰ খৰিচালাস্থিত জামিয়াতুল ইছলামীয়া ইহয়া উলউলুম মাদ্ৰাছাত মঙলবাৰে হজৰত মৌলানা মুস্তাক আনফৰৰ নেতৃত্বাধীন জমিয়ত উলেমাৰ এখন নিৰ্বাচনী সভা অনুষ্ঠিত হয় । সভাত মুফতি ৰাশিদুল ইছলামক বৰপেটা জিলাৰ সভাপতি, চাৰিজনক উপ-সভাপতি আৰু এজনক ধন ভঁৰালী হিচাপে নিৰ্বাচিত কৰিছে ।
পৰৱৰ্তী সময়ত পূৰ্ণাংগ কমিটী গঠন কৰিব বুলি জনাইছে । জমিয়ত উলেমাই ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মাৰ কাম আৰু মন্তব্যৰ শলাগ লয় ।
জমিয়ত উলেমা সন্ত্ৰাস আৰু জেহাদিৰ ঘোৰ বিৰোধী । জেহাদিৰ সন্ধান অথবা খবৰ পালে জমিয়তৰ তৰফৰ পৰা আৰক্ষীক গতাই দিয়া হ’ব বুলিও কয় জমিয়তৰ নেতা কৰ্মীসকলে । কিন্তু দাড়ী টোপী থাকিলেই জেহাদি বা মছজিদ-মাদ্ৰাছাত জেহাদৰ শিক্ষা দিয়া হয় বুলি মন্তব্য কৰা ব্যক্তিসকলক নিন্দা কৰে জমিয়ত উলেমাই ।
জমিয়ত উলেমা এটা সামাজিক সংগঠন আৰু এই সংগঠনে প্ৰাকৃতিক দুৰ্যোগৰ সময়ত বা বিপদৰ সময়ত হিন্দ-মুছলমান নেচাই সকলোৰে হৈ কাম কৰে বুলি কয় জমিয়তৰ লোকসকলে । ইছলামিক ধৰ্মসভাসমূহত চৰকাৰৰ বিনা অনুমতিত বিদেশৰ পৰা বক্তা আমন্ত্ৰণ কৰিবলৈ মানা কৰে জমিয়ত উলেমাই ।