Guwahati High Court rejected bail of Pawan Khera:
দৈনিক অগ্ৰদূত ডিজিটেল ডেক্স:-কংগ্ৰেছৰ মুখপাত্ৰ পৱন খেড়াৰ জামিন নাকচ কৰিতে গুৱাহাটী উচ্চ ন্যায়ালয়ে ৷ ন্যায়াধীশ পাৰ্থিৱজ্যোতি শইকীয়াৰ আদালতে নাকচ কৰে জামিন ৷ এনেক্ষেত্ৰত খেড়া যিকোনো মুহূৰ্তত গ্ৰেপ্তাৰ হোৱাৰ আশংকা প্ৰকট হৈ উঠিছে ৷ জামিন নাকচ ঘোষণা হোৱাৰ পিছতে খেড়াক আটকৰ বাবে অসম আৰক্ষীৰ এটা দল ইতিমধ্যে ৰাওনা হৈছে দিল্লীলৈ ৷
উল্লেখ্য যে ৰাজ্যৰ বিধানসভা নিৰ্বাচনৰ প্ৰাকমুহূৰ্তত কংগ্ৰেছ নেতা পৱন খেড়াই এক সংবাদমেলত মুখ্যমন্ত্ৰী ড:হিমন্ত বিশ্ব শৰ্মাৰ পত্নী ৰিনিকি ভূঞা শৰ্মাৰ হাতত ইজিপ্ত সহ তিনিখন দেশৰ পাৰ্চপোট আছে বুলি বিস্ফোৰক অভিযোগ উদ্থাপন কৰিছিল ৷ অৱশ্যে খেড়াৰ অভিযোগ একেমুখে নাকচ কৰি ৰিনিকি ভূঞা শৰ্মাই খেড়াৰ বিৰুদ্ধে গুৱাহাটী ক্ৰাইম বাঞ্চত এজাহাৰ দাখিল কৰে ৷ এই এজাহাৰৰ ভিত্তিত গুৱাহাটী ক্ৰাইম বাঞ্চৰ এটা দল খেড়াৰ দিল্লীস্থিত বাসগৃহত উপস্থিত হৈছিল যদিও কোনো শুংসূত্ৰ উলিয়াব নোৱাৰি ক্ৰাইম বাঞ্চৰ দলটোৱে বাসগৃহৰ পৰা এটা লেপটপ আৰু পেইন ড্ৰাইভ সহ কেতবোৰ নথিপত্ৰ জব্দ কৰে ৷
আনহাতে ইয়াৰ মাজতে গুৱাহাটী উচ্চ ন্যায়ালয়ত অগ্ৰিম জামিনৰ বাবে আৱেদন জনাইছিল যদিও জামিন নাকচ হয় ৷ অৱশ্যে তেলেংগানা উচ্চ ন্যায়ালয়ে এসপ্তাহৰ অন্তৱৰ্তীকালীন জামিন দিয়ে খেড়াক ৷ অসম চৰকাৰে তেলেংগানা উচ্চ ন্যায়ালয়ৰ এসপ্তাহৰ অন্তৱৰ্তীকালীন জামিনৰ বিৰুদ্ধে সৰ্বোচ্চ ন্যায়ালয়ৰ দ্বাৰস্থ হোৱাত আদালতে তেলেংগানা উচ্চ ন্যায়ালয়ৰ ৰায়ত স্থগিতাদেশ জাৰি কৰি খেড়াক গুৱাহাটী উচ্চ ন্যায়ালয়ত জামিনৰ বাবে আৱেদন জনাবলৈ নিৰ্দেশ দিয়ে ৷
সেই অনুসৰি বুধবাৰে পৱন খেড়াই তেওঁৰ অধিবক্তাৰ জৰিয়তে গুৱাহাটী উচ্চ ন্যায়ালয়ত জামিন বাবে আৱেদন জনোৱাত আদালতে দিনজোৰা শুনানি গ্ৰহণ কৰি ৰায় সুৰক্ষিত ৰাখে ৷ খেড়াৰ হৈ ওকালতি কৰে গুৱাহাটী উচ্চ ন্যায়ালয়ৰ জ্যেষ্ঠ অধিবক্তা কমল নয়ন চৌধুৰী আৰু দিল্লীৰ পৰা শুনানিত ভাছুয়েলী অংশ লয় সৰ্বোচ্চ ন্যায়ালয়ৰ জ্যেষ্ঠ অধিবক্তা অভিশেক মনু সিংভিয়ে ৷ আনহাতে অসম চৰকাৰৰ হৈ শুনানিত অংশ লয় অসমৰ মহাধিবক্তা দেৱজিৎ শইকীয়াই ৷
অৱশেষত শুকুৰবাৰে পৱন খেড়াৰ জামিন সন্দৰ্ভত গুৱাহাটী উচ্চ ন্যায়ালয়ে ৰায়প্ৰদান কৰি খেড়াৰ জামিন নাকচ কৰে ৷ এনে প্ৰেক্ষাপটত যিকোনো মুহূৰ্তত গ্ৰেপ্তাৰ হ’ব পাৰে পৱন খেড়া ৷ অৱশ্যে বৰ্তমান খেড়া আত্মগোপন কৰি আছে ৷
