যোৱা নিশা ধিং জৱাহাৰ নৱোদয়ৰ সুৰামত্ত এগৰাকী সংগীত শিক্ষকৰ প্ৰহাৰত গুৰুতৰভাৱে আহত হয় দ্বাদশ শ্ৰেণীৰ এগৰাকী ছাত্ৰ ৷ ফলত উত্তপ্ত হৈ পৰে বিদ্যালয় চৌহদ ৷ আৰক্ষীৰ সহায় বিছাৰি নিশাই ধিং থানাত উপস্থিত হয় আহত ছাত্ৰসহ ৪০-৫০ জন ছাত্ৰ ৷ এই ঘটনাক কেন্দ্ৰ কৰি বৰ্তমানে সমগ্ৰ অঞ্চলটোতে তীব্ৰ উত্তেজনা অব্যাহত আছে ৷
উল্লেখ্য যে, ধিং জৱাহাৰ নৱোদয় বিদ্যালয়ৰ সংগীত শিক্ষক জ্যোতিপ্ৰসাদ গৌৰে সুৰাপান কৰি মাৰ-পিট কৰে দ্বাদশ শ্ৰেণীৰ বিকাশ দাস নামৰ ছাত্ৰজনক ৷ লগে লগে তেওঁৰ সহপাঠী ছাত্ৰ-ছাত্ৰীসকলে এই ঘটনাৰ তীব্ৰ প্ৰতিবাদ কৰাৰ লগতে ইয়াৰ এক সুবিচাৰ বিচাৰি বিদ্যালয়খনৰ অধ্যক্ষগৰাকীক সমগ্ৰ বিষটো অৱগত কৰে; কিন্তু প্ৰায় দুঘণ্টা সময় ধৰি অধ্যক্ষৰ পৰা কোনো সুবিচাৰ লাভ নকৰি নিশাই আহত ছাত্ৰজনক লগত লৈ আৰক্ষীৰ সহায় বিচাৰি তিনি-চাৰি কিলোমিটাৰ খোজকাঢ়ি নিশাই ছাত্ৰসকল আহি উপস্থিত হয় ধিং থানাত ৷ আহত ছাত্ৰজনক চিকিৎসাৰ ব্যৱস্থা নকৰি এইসকল ছাত্ৰ ধিং থানাত উপস্থিত হোৱাৰ পূৰ্বে ধিং থানাত উপস্থিত হৈ বাহৰ পাতে অধ্যক্ষসহ শিক্ষক গোটে ৷
ধিং থানাত উপস্থিত হৈ এইসকল ছাত্ৰই থানাৰ ভাৰপ্ৰাপ্ত আৰক্ষী বিষয়া মিটু দাসে সমগ্ৰ ঘটনাৰ বিষয়ে আহত ছাত্ৰজনৰ লগত আলোচনা কৰে ৷ ইফালে বিদ্যালয় কৰ্তৃপক্ষই এই সমগ্ৰ ঘটনাৰ বিষয়ে বহু পলমকৈ আহত ছাত্ৰজনৰ পৰিয়ালক খবৰ দিয়ে যদিও বহু সময়লৈকে তেওঁলোকে সাক্ষাৎ কৰিব পৰা নাছিল ছাত্ৰজনক ৷
একাংশ শিক্ষকৰ উদ্ভণ্ডালিয়ে বিদ্যালয়ৰ শৈক্ষিক পৰিৱেশ বিঘ্নিত কৰিছে ৷ সোপধিলা প্ৰশাসনিক ব্যৱস্থাৰ বাবে বিদ্যালয়খনত নিতৌ বৃদ্ধি পাইছে কেতবোৰ বিক্ষিপ্ত ঘটনা ৷ চিন্তিত হৈ পৰিছে ধিং জৱাহৰ নৱোদয় বিদ্যালয়ত অধ্যয়নৰত ছাত্র-ছাত্ৰীৰ অভিভাৱকসকল ।
