“কংগ্ৰেছ এটা পৰিয়ালৰ দললৈ পৰিণত হৈছে” কংগ্ৰেছ এতিয়া ৰাষ্ট্ৰীয় ৰাজনৈতিক দল নহয়, এটা পৰিয়ালৰ দল৷ সোমবাৰে গুৱাহাটীত বিজেপিৰ এখন দলীয় সভাত এইদৰে কয়, বিজেপিৰ ৰাষ্ট্ৰীয় সভাপতি জে পি নাড্ডাই ।
নাড্ডাই আজি এদিনীয়া ভ্ৰমণসূচীৰে মহানগৰত উপস্থিত হৈ উত্তৰ-পূব বিজেপি কাৰ্যালয় উদ্বোধন উপলক্ষে মাছখোৱা আইটিএ চেন্টাৰত আয়োজিত এক অনুষ্ঠানত অংশগ্ৰহণ কৰে। উল্লেখ্য যে কেন্দ্ৰীয় গৃহমন্ত্ৰী অমিত শ্বাহৰ উপস্থিতিত ৮ অক্টোবৰত কাৰ্যালয়টো উদ্বোধন কৰা হ’ব। ভাষণ প্ৰসংগত নাড্ডাই কয়, “কংগ্ৰেছ আছিল মহান ৰাষ্ট্ৰীয় দল কিন্তু ই এতিয়া প্ৰকৃত অৰ্থত ৰাষ্ট্ৰীয় দল নহয়। কংগ্ৰেছ কেইখনমান ৰাজ্যতে সীমাবদ্ধ। ই এটা পৰিয়ালৰ দল হৈ পৰিছে ৷ আনহাতে সভাখনত অংশ লৈ মুখ্যমন্ত্ৰী ড: হিমন্তবিশ্ব শৰ্মাই কয় বিজেপিয়ে ৰাজ্যখনৰ প্ৰতিটো খণ্ড আৰু মণ্ডলতে দলীয় কাৰ্যালয় স্থাপন কৰিব । অহা দুই- তিনি বছৰৰ ভিতৰত কাৰ্যালয় নিৰ্মাণৰ কাম সম্পূৰ্ণ কৰিব৷আনহাতে শৰ্মাই আৰু কয় যে, “বিজেপি শাসনলৈ অহাৰ পিছতহে উত্তৰ-পূবৰ পৰিৱৰ্তন হৈছিল আৰু মূলসুঁতিত অন্তৰ্ভুক্ত হৈছিল আৰু উ উপযুক্ত স্বীকৃতি লাভ কৰিবলৈ সক্ষম হৈছে ৷ উত্তৰ-পূবৰ মুল বিজেপি কাৰ্যালয়ে সদায় উত্তৰ-পূবৰ ৰাজ্যখনৰ মাজত একতাৰ প্ৰতীক হ’ব যি বিজেপিৰ কাৰ্যকালত শক্তিশালী হৈ উঠিছে।” সভাত বিজেপিৰ সাধাৰণ সম্পাদক দিলীপ শইকীয়া,ৰাজ্যিক বিজেপিৰ সভাপতি ভৱেশ কলিতা সহ কেইবা গৰাকী ৰাষ্ট্ৰীয় নেতা উপস্থিত থাকে ৷
উল্লেখ্য যে বিজেপিৰ ৰাষ্ট্ৰীয় সভাপতি গৰাকী সপত্নীক দুপৰীয়া গোপীনাথ বৰদলৈ বিমানবন্দৰত উপস্থিত হোৱাৰ পিছতে মুখ্যমন্ত্ৰী ড:হিমন্ত বিশ্ব শৰ্মাই ফুলাম গামোচা আৰু ফুলৰ থোপাৰে আদৰণি জনায় ৷ তাৰ পৰা পোনে পোনে কামাখ্যা মন্দিৰ দৰ্শন কৰে সপত্নীক নাড্ডাই ৷ ইয়াত সংগ দিয়ে মুখ্যমন্ত্ৰী ড:হিমন্ত বিশ্ব শৰ্মাই ৷
