ROGER_ FEDERER_RETIREMENT : এটা যুগৰ অন্ত পেলাই বিশ্ব টেনিছৰ পৰা অশ্ৰুসিক্ত নয়নেৰে বিদায় ললে ৰ’জাৰ ফেডেৰাই । লিভাৰ কাপৰ পিছতেই ফেডেৰাই পেছাদাৰী টেনিছৰ বিদায় লোৱাৰ কথা ঘোষণা কৰিছিল । উল্লেখযোগ্য যে , আঘাতজনিত সমস্যাৰ বাবে উইম্বলডন প্ৰতিযোগিতাত অংশ লোৱাৰ পৰা আতৰি আছিল টেনিছ তাৰকা গৰাকী । ২০ টাকৈ গ্লেণ্ড শ্লেমৰ অধিকাৰী তাৰকা খেলুৱৈ গৰাকীয়ে বৃহস্পতিবাৰে চ’ছিয়েল মিডিয়াৰ যোগে তেওঁৰ এই অৱসৰৰ কথা ঘোষণা কৰে ।
নিজৰ টুইটাৰ একাউণ্টত তেওঁ অৱসৰৰ কথা ঘোষণা কৰি কয় যে , বিগত তিনি বছৰত বহু বাধাৰ সন্মুখীন হৈছো । বাৰে বাৰে আঘাত পাইছো , অস্ত্ৰোপচাৰ হৈছে । খেললৈ উভটিবলৈ বাৰে বাৰে চেষ্টা কৰিছো । কিন্তু শাৰীৰিক সক্ষমতাই আৰু কিমান দূৰ টানিব, সেইয়াও ভালদৰে জানো । বৰ্তমান মই নিজৰ ভৱিষ্যত ভালদৰে বুজি উঠিছো । মোৰ বয়স ৪১ বছৰ । বিগত ২৪ বছৰত ডেৰ হাজাৰৰো অধিক খেল খেলিছো । মই যিমান ভাৱিছিলো , টেনিছে মোক তাতোকৈ অধিক দিলে । এতিয়া প্ৰতিযোগিতামূলক টেনিছত মোৰ সময় শেষ হ’ল । অন্তত: এইবাৰ মই এইকথা বুজি উঠিছো ।
তেওঁ এইবুলিও উল্লেখ কৰে যে , লণ্ডনত হ’ব লগা লিভাৰ কাপেই হ’ব মোৰ অন্তিমখন প্ৰতিযোগিতামূলক খেল । ভৱিষ্যতলৈ মই আৰু টেনিছ খেলিম ঠিকেই কিন্তু গ্লেম শ্লেমত আৰু মোক কোনেও দেখা নাপাব । টেনিছৰ পৰা মই বহুখিনি পাইছো । মই নিজকে বহু ভাগ্যৱান বুলি অনুভৱ কৰিছো । মই যি পৰ্যায়ত টেনিছ খেলিছো আৰু যিমান সময় ধৰি খেলিছো , সেইয়া কোনো দিনে ভাবিব নোৱাৰো । এই ঘোষণাৰ পিছতে কালি নিশা অনুষ্ঠিত হোৱা লিভাৰ কাপৰ অন্তিমখন ডাবোলছ খেলত ৰ’জাৰ ফেডেৰাৰ আৰু ৰাফেল নাডাল যুঁটী পৰাস্ত হোৱাৰ পিছত ফেডেৰাই প্ৰতিযোগিতামূলক টেনিছক বিদায় জনায় । খেলৰ শেষত চকুৰ পানী ৰোধিব নোৱাৰা ফেডেৰাই হুক হুকাই কান্দি উঠা দেখা গ’ল । অত্যন্ত বিষাদেৰে ভৰি পৰা এই বিদায়লগ্নত ষ্টেডিয়ামত উপস্থিত সকলো উচুপি উঠা দেখা গৈছিল ।
ফেডেৰাৰ এই অন্তিমখন খেলত খেল চলি থকাৰ মাজতে ফেডেৰা আৰু নাডালৰ যুঁটী চোফাত বহি পৰা দেখা গৈছিল । বিপৰীতে প্ৰতিপক্ষ যুঁটী এণ্ডি ম’ৰে আৰু ন’ভাক জ’কভিচো অন্য দুখন চোফাত বহি পৰি শূণ্যলৈ দৃষ্টি নিক্ষেপ কৰা পৰিলক্ষিত হৈছিল । শিশুৰ দৰে কান্দি উঠিছিল ফেডেৰাৰ । বাধা দিব নোৱাৰা চকুৰ পানী ঢাকিবলৈ নিজৰ মুখখন দুহাতেৰে ঢাকি ধৰিছিল খেলুৱৈ গৰাকীয়ে । সতীৰ্থক দেখি প্ৰতিপক্ষও শোক বিহ্বল হৈ পৰিছিল । ফেডেৰাৰ এই অৱস্থা প্ৰত্যক্ষ কৰি ‘অৱশিষ্ট বিশ্ব’ দলৰ প্ৰশিক্ষক জন ম্যাকেনাৰে ফেডেৰাক বুকুৰ মাজলৈ টানি আনি সান্তনা দিয়াৰ চেষ্টা কৰে । দৰ্শকৰ জাউৰিয়ে জাউৰিয়ে হাত চাপৰি দি তাৰকা খেলুৱৈ গৰাকীক সম্ভাষণ জনায় । সামৰণি ভাষণত একো ক’ব নোৱাৰা ফেডেৰাই কেৱল নিজৰ মুখ ঢাকিবলৈ চেষ্টা কৰা দেখা গ’ল ।
ফেডেৰাৰ সন্মুখত ইউৰোপ দলৰ প্ৰশিক্ষক বিয়ৰ্ণ বৰ্গ , নাডাল , জ’কোভিজৰ লগতে বাকী সকলো সতীৰ্থ শোকত ম্ৰিয়মাণ হৈ পৰিল । এনেদৰেই অন্ত পৰিল ফেডেৰাৰ ২৪ বছৰীয়া টেনিছ জীৱনৰ সকলো অতীত । ভাঙি পৰা ফেডেৰাক পত্নী এলেন মিৰকাই গালে-মুখে চুমা খাই সান্তনা দিয়াৰ চেষ্টা কৰে । সকলো আনুষ্ঠানিকতা শেষ কৰি দৰ্শকেও ফেডেৰাক উৎসাহ প্ৰদান কৰি বিদায় সম্ভাষণ জনালে । পুনৰ ঘূৰি গৈ খেলুৱৈ গৰাকীয়ে দৰ্শকক ধন্যবাদ জ্ঞাপন কৰি এটা দীঘল শ্বাস লৈ কেৱল ক’লে , মোৰ কোনো দুখ নাই , মই সুখী ।
