Selena Gomez :
মানসিক স্বাস্থ্যৰ বিষয়ে মুকলিকৈ আলোচনা কৰি ভাল পাই হলিউডৰ অভিনেত্ৰী চেলেনা গোমেজে । শেহতীয়া এক সাক্ষাৎকাৰত, পুনৰ নিজৰ স্বাস্থ্যৰ বিষয়ে মুকলিকৈ মুখ খুলিলে অভিনেত্ৰীগৰাকীয়ে ।
জনালে, জীৱনত কেতিয়াবা হ’লেও তেওঁ সন্তান জন্ম দিব বিচাৰে। কিন্তু তেওঁ কিছুমান ঔষধ গ্ৰহণ কৰিব লগা হয় যাৰ ফলত তেওঁ মাতৃ হোৱাটো কঠিন হৈ পৰিছে ।
কিছুদিন পূৰ্বে, চেলেনাই এগৰাকী বান্ধৱীক সাক্ষাৎ কৰে। অভিনেত্ৰীগৰাকীয়ে জনাইছে যে তেওঁৰ বান্ধৱীগৰাকীও মাতৃ হোৱাত সমস্যাৰ সন্মুখীন হৈছে।
বান্ধৱীক লগ কৰি উভতি অহাৰ পথত অভিনেত্ৰীগৰাকীয়ে তেওঁৰ গাড়ীত কান্দি উঠে । চেলেনাৰ স্বীকাৰোক্তি , যে তেওঁ বাইপোলাৰ ডিচঅৰ্ডাৰৰ ভুক্তভোগী। ইয়াৰ বাবে, তেওঁ নিয়মীয়া ঔষধও গ্ৰহণ কৰিব লাগে। আৰু সেই ঔষধৰ প্ৰভাৱৰ ফলত প্ৰসৱৰ সমস্যা হ’ব পাৰে।
বাইপোলাৰ ডিচঅৰ্ডাৰ হৈছে এক মানসিক ৰোগ য’ত ৰোগীৰ মনোভাৱ অত্যাধিক হৈ পৰে। সৰল শব্দত, ৰোগীয়ে কেতিয়াবা হাঁহি থাকে, আৰু কম সময়ৰ ভিতৰতে তীব্ৰ হতাশাত ডুব যাব পাৰে।
গৰ্ভাৱস্থাৰ সময়ত, মাতৃৰ শৰীৰত হৰ্মোনেল ভাৰসাম্যৰ পৰিৱৰ্তন হ’ব পাৰে। ই মানসিক উত্তেজনাও বৃদ্ধি কৰে। যদি আপোনাৰ বাইপোলাৰ ডিচঅৰ্ডাৰ আছে, এই সমস্যাটো বহুগুণে বৃদ্ধি হোৱাৰ সম্ভাৱনা আছে।
ৰোগটোৰ চিকিৎসাত প্ৰায়ে ‘এণ্টি-চাইকোটিক’ ঔষধ ব্যৱহাৰ কৰা হয়। এনে ধৰণৰ কিছুমান ঔষধে ভ্ৰূণৰ ক্ষতি কৰিব পাৰে। অৱশ্যে, চিকিৎসকসকলে কয় যে মাতৃ হোৱাটো কঠিন কিন্তু অসম্ভৱ নহয়।
যদি সঠিকভাৱে আৰু নিয়মীয়া চিকিৎসকৰ তত্বাৱধানত চিকিৎসা কৰা হয়, বেছিভাগ ক্ষেত্ৰত, বাইপোলাৰ বিকাৰত ভুগি থকা মহিলাসকল মাতৃ হ’ব পাৰে।
