Life Style :
ঠাণ্ডা দিন বুলি কলেই সন্ধিয়াৰ চাহ কাপৰ সৈতে পকৰা খাবলৈ কোনে বেয়া পায় ! তাতে যদি সৰিয়হ ফুলৰ পকৰা হয় ,তেন্তে ইয়াৰ মজাই বেলেগ হয় । পকৰা আমি বিভিন্ন শাক-পাচলি দি তৈয়াৰ কৰো ।
বহুতে হয়তো নেজানে , সৰিয়হৰ ফুলো যে খোৱা হয় । সৰিয়হ ফুলৰ পকৰাৰ সোৱাদ নোপোৱা সকলে এই অনুভৱ কেতিয়াও কৰিব নোৱাৰিব ।
এবাৰ যদি এই সোৱাদ আপোনাৰ মুখত লাগিছে , তেন্তে আপুনি ইয়াৰ সোৱাদ পাহৰিব নোৱাৰিব । সেইয়ে আজি আমি পঢ়ুৱৈ সকলক সৰিয়হ ফুলৰ পকৰা কেনেকৈ তৈয়াৰ কৰে , সেইবিষয়ে অৱগত কৰিম।
উপকৰণ :–১/ পৰিমাণ অনুযায়ী সৰিয়হ ফুল ।
২/ দুচামুচ কুটি লোৱা পিয়াজ ।
৩/ সোৱাদ অনুযায়ী কুটি লোৱা কেঁচা জলকীয়া ।
৪/ আন্দাজমতে আদা আৰু নহৰু বটা ।
৫/ সামান্য হালধী গুড়ি ।
৬/ ধনীয়া গুড়ি সামান্য ।
৭/ স্বাদ অনুসৰি নিমখ ।
৮/ পৰিমাণ অনুসৰি চাউলৰ গুড়ি ।
৯/ আন্দাজমতে জিৰা গুড়ি ।
১০/ কেঁচা তেল আন্দাজমতে ।
পদ্ধতি :– প্ৰথমতে এখন চালনিত সৰিয়হ ফুলখিনি ধুই পানী যাবলৈ দিব লাগে । ইয়াৰপিছত সাজু কৰি ৰখা সকলো উপকৰণ ফুলখিনিৰ স’তে দি মঠি ল’ব লাগে । পুনৰ জুইত উঠাই থোৱা কেৰাহীখন গৰম হলেই তেল ঢালি ,তেলখিনি পকি উঠিলে , এখন চামুচেৰে এচামুচ এচামুচকৈ দি যাব লাগে ।
এনেকৈ কিছু সময় ভাজি অলপ ৰঙা বৰণ ললেই এটা বাচনত টিচ্যু পেপাৰ পাৰি থৈ যাব লাগে । টিচ্যু পেপাৰত তেলত ভজা যিকোনো খাদ্য ৰাখিলে , তাত লাগি ৰোৱা অতিৰিক্ত তেলখিনি টিচ্যু পেপাৰে শুহি লয় । এতিয়া আপুনি এখন প্লেটত পকৰাখিনি সতে অলপ চাটনি লৈ পৰিবেশন কৰক ।
