Caste System :
স্বামীৰ পৰিৱৰ্তে চৰকাৰী চাকৰিত পিতৃ-মাতৃৰ জাতি ব্যৱহাৰ কৰিব পাৰিব বিবাহিত মহিলাসকলে । সেই অনুসৰি দিব লাগিব সংৰক্ষণৰ সুবিধাও।
বিদ্যালয় নিযুক্তিৰ গোচৰত এনে নিৰ্দেশ দিলে কৰ্ণাটক উচ্চ ন্যায়ালয়ে । বিগত সপ্তাহত, ন্যায়াধীশ এম নাগাপ্ৰসন্নে ৰায় দি জনাই যে , বিবাহৰ পাছতো যুৱতীসকলে তেওঁলোকৰ পিতৃ-মাতৃৰ জাতিক নিজৰ জাতি বুলি উল্লেখ কৰিব পাৰে।
সেই অনুসৰি, চৰকাৰী চাকৰিত বিবাহৰ আগৰ জাতিগত প্ৰমাণপত্ৰও ব্যৱহাৰ কৰিব পাৰে। আৰু চৰকাৰে ইয়াক বিবেচনা কৰিব লাগিব।
কৰ্ণাটকৰ, বহুতো বিবাহিত মহিলাই প্ৰাথমিক বিদ্যালয়ৰ শিক্ষকৰ নিযুক্তি প্ৰক্ৰিয়াত তেওঁলোকৰ স্বামীৰ সলনি তেওঁলোকৰ পিতৃ-মাতৃৰ প্ৰমাণপত্ৰ ব্যৱহাৰ কৰে।
সেই নিয়োগত মূলতঃ সংৰক্ষিত আসনত সুযোগ পোৱাৰ বাবেই তেঁওলোকৰ এই পদক্ষেপ । কিন্তু ৰাজ্য চৰকাৰে আৱেদনসমূহ নাকচ কৰে ।
তেওঁলোকৰ যুক্তি, যিসকল যুৱতী বিবাহিত তেওঁলোকৰ পিতৃ-মাতৃ নহয়, স্বামীৰ জাতিগত প্ৰমাণপত্ৰ, হিচাপে গণ্য কৰা হ’ব।
ৰাজ্যখনৰ এই সিদ্ধান্তৰ বিৰুদ্ধে ২১ গৰাকী বিবাহিত মহিলা চাকৰি প্ৰাৰ্থীয়ে উচ্চ ন্যায়ালয়ত আবেদন কৰে । তেওঁলোক আটাইকেইজন অ’বিচি সম্প্ৰদায়ৰ প্ৰাৰ্থী।
বিবাহৰ পাছত , তেওঁলোক সাধাৰণ প্ৰাৰ্থী হৈ পৰে । এই ক্ষেত্ৰত, উচ্চ ন্যায়ালয়ে নিৰ্দেশ দিছে যে ৰাজ্যখনে সকলো আৱেদনকাৰীক পূৰ্বৰ জাতি অনুসৰি সংৰক্ষিত সকলো শ্ৰেণীত সুযোগ দিব লাগে। অৱশ্যে, জাতিগত এই বিষয়টো সংশ্লিষ্ট প্ৰাৰ্থীৰ ইচ্ছাৰ ওপৰত নিৰ্ভৰ কৰিব।
চাকৰিত জাতিৰ প্ৰমাণপত্ৰক লৈ বিতৰ্ক কলিকতা উচ্চ ন্যায়ালয়তো দেখা গৈছে। বহুতো চাকৰি প্ৰাৰ্থীৰ পদবীৰ স’তে মিলা জাতিৰ প্ৰমাণপত্ৰ পোৱা হোৱা নাই। তাত, ৰাজ্যখনে যুক্তি দিছিল যে সম্ভৱতঃ এই মহিলা প্ৰাৰ্থীসকল বিবাহৰ আগতে বা পাছত পদবী অনুসৰি সংৰক্ষণৰ অধীনত আহিছে। অৱশ্যে, গোচৰটো এতিয়াও কলিকতা উচ্চ ন্যায়ালয়ত চূড়ান্ত হোৱা নাই।