Tiger Attack :
২০২২ চনত বাঘ আৰু চিতাবাঘৰ আক্ৰমণত মৃত্যুক সাৱতিলে ৫৩ জন লোকে ! এইয়া সমগ্ৰ দেশ বা কোনো ৰাজ্যৰ পৰিসংখ্যা নহয়, নিহতৰ এই সংখ্যা কেৱল মহাৰাষ্ট্ৰৰ চন্দ্ৰপুৰ জিলাতেই !
মহাৰাষ্ট্ৰৰ বনমন্ত্ৰী সুধীৰ মুঙ্গন্তিৱাৰে সোমবাৰে ৰাজ্যখনৰ বিধানসভাত এক বিবৃতিত জনাইছে যে ৫৩ জনৰ ভিতৰত ৪৪ জন বাঘৰ আক্ৰমণৰ বলি হৈছিল।
বাকীসকলৰ চিতাবাঘৰ আক্ৰমণত মৃত্যু হৈছে । চন্দ্ৰপুৰৰ উপৰিও বিদৰ্ভ অঞ্চলৰ আন কেবাখনো জিলাতো বাঘ-চিতাবাঘৰ আক্ৰমণৰ ফলত মৃত্যু হোৱাৰ খবৰ জনাইছে মহাৰাষ্ট্ৰৰ বন মন্ত্ৰীগৰাকীয়ে । “যোৱা বছৰ বিদৰ্ভত বিভিন্ন কাৰণত মুঠ ১৪ টা বাঘৰ মৃত্যু হৈছিল। ”
প্ৰসংগত দীৰ্ঘদিন ধৰি চন্দ্ৰপুৰকে ধৰি বিদৰ্ভৰ অৰণ্যত বাঘৰ আক্ৰমণৰ ঘটনা সংঘটিত হৈ আহিছে বুলি অভিযোগ উত্থাপিত হৈছে ।
২০১৮ চনৰ নৱেম্বৰত, উচ্চতম ন্যায়ালয়ে অনুমোদন জনোৱাৰ পাছত ‘মানুষখেকো’ হিচাপে ঘোষণা কৰা বাঘিনী অৱনীক (কোড নাম টি-১) অঞ্চলটোৰ যৱতমালত গুলীয়াই হত্যা কৰা হৈছিল।
অৱনীৰ বিৰুদ্ধে পান্ধৰকাৱদা আৰু টিপেশ্বৰ অঞ্চলত দুবছৰত ১৩ জন লোকক “হত্যা” কৰাৰ অভিযোগ আছিল। তাক হত্যা কৰাৰ দাবী কৰিছিল স্থানীয় গাওঁবাসীৰ একাংশই।