Junmoni Mother Visit Nagaon:
একমাত্র কন্যা আৰক্ষী বিষয়া জোনমণি ৰাভাক পৰিকল্পিতভাৱে হত্যা কৰা হৈছিল বুলি বাৰে বাৰে দুৰ্ভগীয়া মাতৃ সুমিত্ৰা ৰাভাই দাবী কৰি অহাৰ মাজতে শুক্ৰবাৰে মাতৃ গৰাকীয়ে পৰিয়াল সহ উপস্থিত হয় নগাঁৱত ৷ জোনমণি ৰাভাৰ মৃত্যুৰ তদন্ত বিচাৰি মাতৃ গৰাকীয়ে এজহাৰ দাখিল কৰিব নগাঁও আৰু জখলাবন্ধা থানাত ৷
কন্যাক হেৰুৱাই মানসিকভাৱে ভাগি পৰা জোনমণিৰ মাতৃ সুমিত্ৰা ৰাভাৰ মুখত বাৰে বাৰে উচ্চাৰিত হৈছে অসম আৰক্ষীৰ উচ্চ পদস্থ বিষয়াৰ নাম। জোনমণিৰ মৃত্যুৰ কাৰণ বাহ্যিক দৃষ্টিত এক দুর্ঘটনা যদিও প্রতিমূহূৰ্তত আৰক্ষী বিষয়াগৰাকীৰ মৃত্যুৰ দৃশ্যপট সলনি হৈছে আৰু পৰিয়ালে দাবী কৰা ধৰণেই পৰিকল্পিত হত্যাকাণ্ডৰ দিশে ঘটনাই গতি কৰিছে।
ঘটনাৰ দৃশ্যপট যিমানেই সলনি হৈছে, সিমানেই শয্যাগত জোনমণিৰ মাতৃয়ে চিঞৰি উঠিছে, ‘জোনক সিঁহতি হত্যা কৰিছে। মাতি নি তাইক মাৰি পেলালে। চিআইডি নহয়, চিবিআইৰ তদন্ত দিয়ক।’
উল্লেখ্য যে মহানগৰীৰ কাহিলীপাৰাৰ দক্ষিণগাঁৱৰ শিৱপুৰৰ জোনমণিৰ ঘৰলৈ আজিও বিভিন্নজনৰ সোঁত অব্যাহত থাকে। বিভিন্ন দল- সংগঠনৰ নেতৃত্বই জোনমণিৰ মাতৃক সাক্ষাৎ কৰাৰ সময়তো তেওঁ কন্যাক সম্পূৰ্ণ পৰিকল্পিতভাৱে হত্যা কৰা হ’ল বুলি অভিযোগ কৰিছে ৷
“দৈনিক অগ্রদুত ‘ক মাতৃ সুমিত্ৰাই এই সমগ্ৰ ঘটনাত নগাঁৱৰ উচ্চ পদস্থ আৰক্ষী বিষয়া জড়িত থকাৰ অভিযোগ কৰি কয়, এয়া কোনো দুর্ঘটনা বা আত্মহত্যাৰ ঘটনা নহয়, জোনমণিক হত্যা কৰা হৈছিল। এতিয়া লাহে লাহে কথাবোৰ ওলাইছে। চিআইডিয়ে তদন্ত কৰিছে, কৰক; কিন্তু এই ঘটনা চিবিআইক তদন্ত কৰিবলৈ দিয়ক।’
একেদৰে জোনমণিৰ অসুস্থ ভ্রাতৃ কৰুণা ৰাভায়ো এই সম্পূৰ্ণ পৰিকল্পিত হত্যাকাণ্ড বুলি দাবী কৰি ঘটনাৰ চিবিআই নতুবা ন্যায়িক তদন্তৰ দাবী জনায়। চিআইভিৰ তদন্তত পৰিয়ালটোৱে কিছু সকাহ লাভ কৰিছে যদিও এই তদন্তই ঘটনাৰ ৰহস্য কিমানলৈ ভেদ কৰিব পাৰিব সেই লৈ পৰিয়ালটোৱে সন্দেহ প্ৰকাশ কৰিছে।
বিশেষকৈ চিআইডিৰ যিজন বিষয়াক তদন্তৰ দায়িত্ব দিয়া হৈছে, সেই বিষয়াজনে এসময়ত বৰ্তমানৰ নগাঁৱৰ আৰক্ষী অধীক্ষকৰ তলত কাম কৰিছিল বুলি উল্লেখ কৰি পৰিয়ালৰ লোকে কয়, ‘মেডাম বুলি সম্বোধন কৰি সেই বিষয়াজনে কিদৰে সোধ-পোছ কৰিব? কেইদিনমান চাই লওঁ আৰু চিবিআইৰ তদন্ত ঘোষণা নকৰিলে আমি নিজাববীয়াকৈ ন্যায়ালয়ৰ কাষ চাপিম।
‘ উল্লেখ্য যে জোনমণিৰ মৃত্যুৰ ঘটনা এক গভীৰ ৰহস্যৰ আৱৰ্তত সোমাই পৰাৰ সময়তে মাতৃগৃহৰ লগতে অঞ্চলটোত দুই ম’হৰ যুঁজত বিৰিণাৰ মৰণ হোৱা বুলি বিষয়টোরে চর্চা লাভ কৰিছে।বৃহস্পতিবাৰে জোনমণিৰ বাসগৃহত উপস্থিত থকা বিভিন্ন লোকৰ মাজত হোৱা চৰ্চা অনুসৰি, নগাঁও আৰু লখিমপুৰ জিলাৰ আৰক্ষীৰ মাজত থকা সংঘাতৰ ফলতেই হয়তো জোনমণি ৰাভাই প্ৰাণ হেৰুৱাবলগীয়া ঘটনা সংঘটিত হোৱাৰ অৱকাশ আছে।
প্রতি প্রতিমূহূৰ্তত সলনি হোৱা ঘটনাৰ দৃশ্যপটলৈ চাই লোকসকলে চোৰাং নকল সোণ বেহাক লৈ দুয়োখন জিলাৰ শীৰ্ষ আৰক্ষী বিষয়াৰ লগত সুত্রপাত হোৱা সংঘাতেই ইয়াৰ মূল কাৰণ বুলি সন্দেহ প্ৰকাশ কৰিছে। শীৰ্ষ আৰক্ষীৰ বিষয়াৰ নির্দেশ নাথাকিলে এখন জিলাৰ পৰা গৈ আন এখন জিলাত অভিযান চলোৱাটো থানা পৰ্যায়ৰ এগৰাকী বিষয়াৰ বাবে সহজ নহয় বুলিও বিভিন্নজনে মত প্রকাশ কৰিছে।
ফলশ্ৰুতিত জিলা শীৰ্ষ বিষয়াই জোনমণিক ব্যৱহাৰ কৰিছিল আৰু দুই ম’হৰ যুঁজত বিৰিণাৰ মৰণ হ’ল বুলি বহুতে মন্তব্য কৰে। ফলত এই সমগ্ৰ ঘটনাৰ ৰহস্যৰ ভেদ কৰিবলৈ ন্যায়িক তদন্ত নাইবা চিবিআইৰ তদন্ত দাবী কৰিছে পৰিয়ালৰ লগতে অঞ্চলবাসীয়ে। উল্লেখ্য যে অহা ৩০ মে’ত জোনমণিৰ ৰাজহুৱা আদ্যশ্ৰাদ্ধৰ আয়োজন কৰা হৈছে।
চিবিআই তদন্তৰ দাবী কৰিলে যুৱ-ছাত্ৰ পৰিষদে একেটা বিভাগৰ অধীনত থকা উচ্চ পদস্থ আৰক্ষী বিষয়াক চিআইডিয়ে কিমান জবাবদিহি কৰিবলৈ সক্ষম হ’ব, ইয়াক লৈ প্রশ্ন উত্থাপন কৰি সমগ্ৰ ঘটনা চিবিআইৰ তদন্তৰ দাবী কৰিছে অসম জাতীয়তাবাদী যুৱ-ছাত্ৰ পৰিষদে ।
পৰিষদৰ সভাপতি পলাশ চাংমাইৰ নেতৃত্বত এটা সঁজাতী দলে জোনমণিৰ বাসগৃহত উপস্থিত হৈ দুৰ্ভগীয়া পৰিয়ালটোৰ প্ৰতি সমবেদনা জ্ঞাপন কৰে। পৰিয়ালটোৰ স’তে বাৰ্তালাপ কৰাৰ অন্তত সভাপতি চাংমায়ে সমগ্র ঘটনা চিবিআইৰ তদন্তৰ দাবী কৰি কয়, ‘প্রতি মুহূৰ্তত ঘটনাৰ দৃশ্যপট সলনি হৈছে আৰু ইয়াৰ অন্তৰালত কি অন্তর্নিহিত হৈ আছে সেই কথা অসমৰ ৰাইজে জানিব বিচাৰিছে।
লগতে পৰিয়ালটোৱে ন্যায় পোৱতো উচিত। সমান্তৰালভাৱে ঘটনাৰ তদত্ত চিআইডিক অৰ্পণ কৰা কৰা হৈছে। আনহাতে, ঘটনাত আৰক্ষীৰ উচ্চ পদস্থ বিষয়াৰ নাম পৰিয়ালে লৈ আছে। গতিকে চিআইডি অসম আৰক্ষীৰ অন্তৰ্গত এটা সংস্থা। ফলত এই সংস্থাই অসম আৰক্ষীৰ উচ্চ পদস্থ বিষয়াৰ ওপৰত কিমান জবাবদিহি কৰিব পাৰিব সেয়া সন্দেহৰ আৱৰ্তত।
গতিকে পৰিয়ালটোক ন্যায্যতা দিবৰ কাৰণে আৰু অসমৰ জনতাই সময়ে সময়ে যি দৃশ্যপট দেখি আহিছে, আটাইখিনি নির্মূল হ’ব কাৰণে চিবিআইৰ তদন্তৰ দাবী জনাইছো।’ বাসগৃহত ৰাজ্যিক মানৱ অধিকাৰ আয়োগৰ দল
আনহাতে, জোনমণিৰ দক্ষিণগাঁৱস্থিত বাসগৃহত উপস্থিত হয় ৰাজ্যিক মানৱ অধিকাৰ আয়োগৰ এটা দল। আয়োগৰ সদস্য শান্তনু ভৰালীৰ নেতৃত্বত যোৱা সাতজনীয়া দলটোৱে জোনমণিৰ মাতৃৰ স’তে বাৰ্তালাপ কৰি পৰিয়ালটোক সমবেদনা জ্ঞাপন কৰে।
লগতে আয়োগে মাতৃৰ ভাষ্য বাণীবদ্ধ কৰি আনে। সদস্য ভৰালীয়ে গৃহ বিভাগে ঘটনাৰ সঠিক তদন্ত কৰিব বুলি জোনমণিৰ মাতৃক আশ্বাস প্ৰদান কৰি কয় যে আয়োগে ঘটনাৰ সন্দৰ্ভত বৰ্তমানলৈ কোনো গোচৰ পঞ্জীয়ন কৰা নাই যদিও আৰক্ষী অধীক্ষক অনিল শৰ্মাক ঘটনাৰ স্থান পৰিদৰ্শন কৰাৰ লগতে সংশ্লিষ্ট ব্যক্তিক সাক্ষাৎ কৰি তথ্য সংগ্ৰহৰ দায়িত্ব দিয়া হৈছে। পৰিয়ালটোৱে ন্যায় লাভ কৰিব বুলি তেওঁ আশ্বাস প্ৰদান কৰে।
একেদৰে নগাঁৱৰ মৰিকলং আৰক্ষী চকীৰ ভাৰপ্ৰাপ্ত বিষয়া হিচাপে কৰ্মৰত জোনমণিৰ মৃত্যুৰ ঘটনা ৰহস্যজনক আখ্যা দিছে ৰাইজৰ দলে। দলটোৰ সভাপতি তথা বিধায়ক অখিল গগৈ, কার্যকৰী সভাপতিদ্বয় ভাস্কো ডি শইকীয়া আৰু কবীন্দ্ৰ চেতিয়া ফুকনে এই ঘটনা এক সাধাৰণ পথ দুৰ্ঘটনাৰ পৰিবৰ্তে এক পৰিকল্পিত হত্যাকাণ্ড হ’ব পাৰে বুলি মত ব্যক্ত কৰিছে।
কালি দলটোৰ এটা সঁজাতী দলে ৰাভাৰ বাসগৃহলৈ গৈ মাতৃ, ভাতৃ আৰু পৰিয়ালৰ আনসকলক সাক্ষাৎ কৰি সমগ্ৰ ঘটনাৰ গভীৰতা বুজি লৈ এয়া এক বৃহৎ ষড়যন্ত্ৰৰ অংশ বুলি সন্দেহ প্ৰকাশ কৰিছে। যাৰ ফলত এই সমগ্ৰ ঘটনাৰ তদন্তৰ দ্বায়িত্ব চিবিআইলৈ হস্তান্তৰৰ দাবী জনাইছে দলটোৱে।
এই ঘটনাই মুখ্যমন্ত্ৰী ড° হিমন্ত বিশ্ব শৰ্মাৰ দ্বায়িত্বত থকা গৃহ বিভাগৰ ফোঁপোলা স্বৰূপ উদঙাই দিলে বুলি দলটোৱে এক প্ৰেছ বাৰ্তাত উল্লেখ কৰিছে। ৰহস্যজনক মৃত্যুৰ ঘটনা চিবিআইৰ তদন্তৰ দাবী আপৰ
ৰাভাৰ মৃত্যুৰ ঘটনা চিবিআইৰ তদন্তৰ দাবী কৰিছে আম আদমি পার্টি, অসমে। এক প্ৰেছ বাৰ্তাত দলটোৱে দুখন জিলাৰ আৰক্ষীৰ মাজত সহযোগিতাৰ নথকা আৰু চোৰাং নকল সোণ, নকল টকাৰ প্ৰসংগ ঘটনাত সাঙুৰ খাই পৰাৰ পাছতে এই মৃত্যু অতি ৰহস্যজনক বুলি উল্লেখ কৰি এই সমগ্ৰ ঘটনাৰ তদস্ত শীঘ্ৰে চিবিআইৰ হাতত অৰ্পণ কৰিবলৈ দাবী জনাইছে।