Rahul Gandhi Speech In Loksabha:
লোকসভাত অনাস্থা প্ৰস্তাৱ বিতৰ্কৰ আজি দ্বিতীয় দিন ৷ অনাস্থা প্ৰস্তাৱ বিতৰ্কত অংশ লৈ বিজেপিক তীব্ৰ আক্ৰমণ কৰে ৰাহুল গান্ধীয়ে ৷
সদনত অনাস্থা প্ৰস্তাৱ সন্দৰ্ভত অধ্যক্ষ ওম বিৰলাক তেওঁৰ নিম্ন সদনৰ সদস্যপদ পুনৰ লাভ কৰাৰ বাবে ধন্যবাদ জনাই ভাষণৰ পাতনি মেলি আদানীৰ বিষয়টো উত্থাপন কৰে ৷
গান্ধীয়ে কয়,যেতিয়া মই শেষবাৰৰ বাবে কথা পাতিছিলো, সম্ভৱতঃ মই আপোনাক সমস্যাৰ সৃষ্টি কৰিছিলো কাৰণ মই আদানীৰ ওপৰত গুৰুত্ব দিছিলো – হয়তো আপোনাৰ জ্যেষ্ঠ নেতাজন বেদনাগ্ৰস্ত হৈছিল… সেই বিষটোৱে আপোনাৰ ওপৰতো প্ৰভাৱ পেলাব পাৰে। তাৰ বাবে মই আপোনাৰ ওচৰত ক্ষমা বিচাৰিছো। কিন্তু মই সঁচা কথা কৈছিলো। আজি বিজেপিত মোৰ বন্ধুসকলে ভয় খোৱাৰ প্ৰয়োজন নাই কিয়নো মোৰ আজিৰ ভাষণ আদানীৰ ওপৰত নহয়” ।
উল্লেখ্য যে,মোডী চৰকাৰৰ বিৰুদ্ধে বিৰোধী দল সমূহৰ ঐক্য মঞ্চ ‘ইণ্ডিয়া’ৰ দ্বাৰা উত্থাপন কৰা অনাস্থা প্ৰস্তাৱৰ ওপৰত আজি দ্বিতীয়টো বিতৰ্কৰ দিন। গান্ধীয়ে সদনত উদাত্ত কন্ঠৰে কয়,মই আজি মোৰ হৃদয়ৰ পৰা কথা পাতিব বিচাৰো। আজি মই চৰকাৰৰ ওপৰত তীব্ৰ আক্ৰমণ নকৰো ৷ তথাপিও ক’বলৈ বাধ্য হৈছো ৷ কেইদিনমান আগতে মই মণিপুৰলৈ গৈছিলো। আমাৰ প্ৰধানমন্ত্ৰীয়ে আজিলৈকে যোৱা নাছিল, কিয়নো তেওঁৰ বাবে মণিপুৰ ভাৰত নহয়” ।
“আপুনি মণিপুৰত ভাৰত মাতাক হত্যা কৰিছে, মণিপুৰৰ লোকসকলক হত্যা কৰি ভাৰতক হত্যা কৰিছিল। আপুনি বিশ্বাসঘাতক, আপুনি দেশপ্ৰেমী নহয়,” এন ডি এৰ সাংসদসকলৰ শ্ল’গানৰ মাজতে ৰাহুল গান্ধীয়ে কয়।
মণিপুৰত বিজেপিৰ ৰাজনীতিয়ে ভাৰতক হত্যা কৰা বুলি ৰাহুল গান্ধীয়ে কৰা মন্তব্যই ট্ৰেজাৰী বেঞ্চৰ পৰা তীব্ৰ সঁহাৰি দিছিল। কেন্দ্ৰীয় মন্ত্ৰী কিৰেন ৰিজিজু আৰু বিজেপিৰ আন সাংসদসকলে কংগ্ৰেছ নেতাজনক তেওঁৰ মন্তব্যৰ বাবে ক্ষমা বিচাৰিবলৈ কৈছিল । আনকি কেন্দ্ৰীয় মন্ত্ৰী স্মৃতি ইৰানীয়ে ৰাহুলক তীব্ৰ সমালোচনা কৰে প্ৰধানমন্ত্ৰীক তুচ্ছ তাচ্ছিল্য কৰাৰ বাবে ৷
উল্লেখযোগ্য,মণিপুৰ প্ৰসংগক লৈ আজিও শাসক-বিৰোধীৰ মাজত অব্যাহত থাকে বিতৰ্ক ৷ অনাস্থা প্ৰস্তাৱক লৈ ভাষণ ৰাখে কেইবাগৰাকীও সাংসদে ৷
মনকৰিবলগীয়া যে,বিৰোধীৰ শেহতীয়া শক্তিশালী স্থিতিক লৈ শংকিত হৈ পৰা পৰিলক্ষিত হয় শাসকীয় পক্ষ ৷ স্মতৰ্ৱ্য যে, লোকসভা সচিবালয়ে বিতৰ্কৰ বাবে বিজেপিক নিৰ্ধাৰণ কৰি দিয়ে ৬.৪১ ঘণ্টা ৷ আনহাতে বিৰোধীৰ বাবে নিৰ্ধাৰণ কৰে মাত্ৰ ১.১৫ ঘণ্টা ৷
আগন্তুক ১২ ঘণ্টীয়া অনাস্থা বিতৰ্কক লৈ উৎসুক দেশবাসী ৷ ইপিনে ১০ আগষ্টত অনাস্থা প্ৰস্তাৱৰ উত্তৰ দিব প্ৰধানমন্ত্ৰী নৰেন্দ্ৰ মোদীয়ে ৷