Amrit Kalash Yatra:
:ৰাজ্য চৰকাৰৰ উদ্যোগত বৃহস্পতিবাৰে শ্ৰীমন্ত শংকৰদেৱ কলাক্ষেত্ৰত অমৃত কলহ যাত্ৰাৰ সামৰণি অনুষ্ঠান অনুষ্ঠিত হয় ৷
এই উপলক্ষে আয়োজিত ৰাজ্যিক আনুষ্ঠানিক সভাত মুখ্য অতিথি ৰূপে অংশগ্ৰহণ কৰে ৰাজ্যপাল গুলাব চান্দ কাটাৰিয়াই ৷
বহুজনৰ ত্যাগ আৰু আহুতিৰ ফলশ্ৰুতিত ভাৰতবৰ্ষই স্বাধীনতা লাভ কৰিবলৈ সক্ষম হৈছিল। সেই ত্যাগ আৰু প্ৰান আহুতি দিয়া শ্ৰদ্ধাৰ ব্যক্তি সকলৰ সন্মানাৰ্থে দেশৰ স্বাধীনতাৰ ৭৫ তম বৰ্ষক স্বাধীনতাৰ অমৃত মহোৎসৱ হিচাবে উদযাপন কৰি ইতিহাসৰ সেই স্বর্ণীল ইতিহাস, সংস্কৃতি আৰু প্ৰাপ্তিক নৱ প্ৰজন্মৰ সন্মুখত উদ্ভাসিত কৰি তুলিব বিচৰা হৈছিল।
“মোৰ মাটি মোৰ দেশ” কাৰ্যসূচীৰ জৰিয়তে যোৱা ১৯ ছেপ্টেম্বৰৰ পৰা ২ অক্টোবৰলৈ সমগ্ৰ ৰাজ্যৰে প্ৰায় ২৬,০৯৮ খন গাৱৰ প্ৰতিঘৰৰ পৰা মাটি সংগ্ৰহ কৰা হয়।
উল্লেখ্য যে,এক মাটি এক শোভাযাত্ৰাৰে গাঁও পঞ্চায়ত, খণ্ড উন্নয়ন বিষয়াৰ কার্যালয়লৈ লৈ অহা হৈছিল । এই শোভাযাত্ৰাত সৰ্বসাধাৰণ জনতাৰ লগতে মন্ত্রী, বিধায়ক, সাংসদ সকলেও অংশ গ্ৰহণ কৰিছিল।
এই মাটি খণ্ড উন্নয়ণ বিষয়াৰ কাৰ্যালয় আৰু নগৰৰ পৌৰসভা আদিৰ কাৰ্য্যালয়ত একত্ৰিত কৰি দুটাকৈ কলহত ভৰোৱা হৈছিল । এই কাৰ্য ৮ অক্টোবৰৰ পৰা ১৭ অক্টোবৰলৈ সমগ্ৰ অসমতে কৰা হয় ।
আজি ৰাজ্যিক পৰ্যায়ত ৰাজ্যৰ ভিন্ন প্ৰান্তৰ পৰা ২৭০ স্থানৰ পৰা সৰ্বমুঠ ৫৪০ টা অমৃত কলহ কঢ়িয়াই অনা হৈছে । ইয়াৰে ২৭০ টা অমৃত কলহ প্রস্তাৱিত শ্বহীদ কনকলতা বিশ্ববিদ্যালয়ৰ আধাৰশিলা স্থাপন অনুষ্ঠানৰ বাবে সংৰক্ষণ কৰা হ’ব।
বাকী ২৭০ টা অমৃত কলহ দেশৰ বীৰ সকলৰ সন্মানার্থে নিৰ্মান হ’ব লগা ‘অমৃত বাটিকা’ত ব্যৱহাৰৰ বাবে নতুন দিল্লীলৈ লৈ যোৱা হ’ব। আনুষ্ঠানিকভাৱে শুক্ৰবাৰে ৰে’লযোগে নতুন দিল্লীলৈ প্ৰেৰণ কৰা হ’ব প্ৰথমটি কলহ ৷
আজিৰ সামৰণি অনুষ্ঠানত মন্ত্ৰীদ্বয় অতুল বৰা, ডা:ৰণোজ পেগু আৰু ইউ জি ব্ৰক্ষ্ম,মুখ্য সচিব পৱন কুমাৰ বৰঠাকুৰ,আৰক্ষী সঞ্চালক প্ৰধান জি পি সিং সহ ৰাজ্য চৰকাৰৰ জ্যেষ্ঠ আমোলা উপস্থিত থাকে ৷
উল্লেখ্য যে,শংকৰদেৱ কলাক্ষেত্ৰত আয়োজিত অমৃত কলহ যাত্ৰাৰ সামৰণি অনুষ্ঠানতে ৰাজ্যৰ পৌৰ নিকায় সমূহৰ পৰা সংগ্ৰহ কৰা হয় দুটাকৈ কলহ ৷ মুঠ সংগৃহীত কলহৰ সংখ্যা ৫৪০ টা ৷