Hanuman Mandir:
‘কৃষ্ণ এক দেৱ দুখহাৰী/কাল মায়াদিৰো অধিকাৰী/কৃষ্ণ বিনে শ্রেষ্ঠ দেৱ নাহি নাহি আৰ…’- মহাপুৰুষ শ্রীমন্ত শংকৰদেৱৰ – একেশ্বৰবাদৰ আধাৰত তেওঁৰেই প্রিয় শিষ্য মহাপুৰুষ – শ্রীশ্রীমাধবদেৱ বিৰচিত ঘোষাৰ ছন্দত স্পষ্ট হৈ বোৱা অসমৰ সনাতন ধৰ্মীসকলৰ আধ্যাত্মিকতা তথা সাংস্কৃতিক ঐতিহ্যত আঘাত হানি শেহতীয়াকৈ ৰাজ্যত ক্রমবর্ধমান হাৰত উর্ধ্বগামী হৈছে মন্দিৰ সংস্কৃতিৰ।
কৃষ্ণ ভক্তিকে সাৰ কৰি গঢ়ি উঠা মহাপুৰুষীয়া সত্রীয়া সংস্কৃতিৰে ভৰপূৰ – ৰাজ্যখনলৈ আমদানি ঘটিছে উত্তৰ-ভাৰতীয় ধর্মীয় সংস্কৃতিৰ। ইয়াৰে অংশৰূপে শেহতীয়াকৈ ৰাজধানী দিছপুৰৰ গনেশ মন্দিৰৰ সন্মুখৰ গণেশ উদ্যানত স্থাপন কৰা শ্ৰীশ্ৰীহনুমান মন্দিৰৰ স্থান আৰু স্থাপনক লৈ বিভিন্ন মহলত সৃষ্টি হৈছে বিৰূপ প্রতিক্রিয়াৰ।
বিগত পাঁচদিন ধৰি মন্দিৰটোত প্রাণ প্রতিষ্ঠাৰ কার্যসূচী অব্যাহত থকাৰ সূত্রে নবনির্মিত মন্দিৰটোৰ দুৱাৰমুখতে লাগি থকা মূল পথটোত হোৱা তীব্র যান-জঁটে মন্দিৰটোৰ স্থানক লৈ সর্বসাধাৰণ জনতাৰ মাজত অসন্তুষ্টিৰ সৃষ্টি কৰিছে।
উল্লেখ্য যে সত্ৰীয়া সংস্কৃতিৰ অন্যতম অংগস্বরূপ নামঘৰে সৌষ্ঠৱ বঢ়োৱা তথা অসমীয়া – সংস্কৃতিৰ আধ্যাত্মিক ধ্বজা বহন কৰি থকা ৰাজ্যখনত এইবাৰ বহিঃৰাজ্যৰ আর্হিত হনুমান মন্দিৰ স্থাপন কৰাৰ বিষয়টোরে উত্তৰ-ভাৰতীয় সংস্কৃতিৰ আমদানিৰ পয়োভৰ স্পষ্ট কৰি তুলিছে।
এই প্রসংগত অসম সত্ৰ মহাসভাৰ সম্পাদক প্রধান কুসুম কুমাৰ মহন্তই আজি প্রতিক্রিয়া প্রকাশ কৰি কয়, ‘কোনো ধর্মক নিন্দা নকৰিবলৈ মহাপুৰুষ শ্রীমন্ত শংকৰদেৱে তেওঁৰ অনুগামীসকলক বাৰে বাৰে কৈ গৈছে ।
দিছপুৰৰ অসম বিধানসভা সচিবালয়ৰ প্ৰৱেশদ্বাৰতে মূল পথৰ গাতে লগাকৈ নিৰ্মাণ কৰা শ্ৰীশ্ৰীহনুমান মন্দিৰটো -আমি বেয়া বুলি নকওঁ যদিও আমাৰ স্পষ্ট মত- পথৰ কাষত য’তে-ত’তে এনেদৰে মন্দিৰ স্থাপন কৰা উচিত নহয়।
চৰকাৰক আবেদন কৰক, উপযুক্ত স্থানত চৰকাৰে মাটি দিয়ক আৰু এক অনন্য পৰিৱেশত মন্দিৰ নির্মাণ কৰক; কিন্তু তাকে নকৰি পথৰ কাষতে এনেদৰে স্থাপন কৰা মন্দিৰত কোনো আধ্যাত্মিক পৰিৱেশ বিৰাজমান নহয়।
চৰকাৰ-প্রশাসনেও এই ক্ষেত্রত দৃষ্টি ৰাখিব লাগে।’ এই প্রসংগতে মহন্তই পুনৰ কয় যে নৱনির্মিত হনুমান মন্দিৰৰ সন্মুখত থকা শ্রীশ্রীগণেশ মন্দিৰৰ কাষতে পদপথত গঢ়ি এটা শনি মন্দিৰো, যাৰ ফলত প্রতি শনিবাৰে মন্দিৰটোত ভক্তৰ সমাগমৰ বাবে পদপথৰে খোজ কাঢ়ি যাব নোৱৰা অৱস্থাৰ সৃষ্টি হয়।
অসম সত্র মহাসভাৰ সম্পাদক প্রধানজনে কয় যে মঠ-মন্দিৰ নির্মাণ কৰোতে ৰাইজৰ যাতে অসুবিধা নহয়, সেই দিশটোৰ প্রতি লক্ষ্য ৰাখিব লাগে।
উল্লেখ্য যে গণেশ মন্দিৰৰ সম্মুখতে নির্মাণ সম্পূর্ণ হোৱা শ্রীশ্রীহনুমান মন্দিৰটোত যোরা ২৩ নৱেম্বৰৰ পৰা আৰম্ভ হৈছে প্রাণ প্রতিষ্ঠা মহোৎসৱ। ইয়াৰ বাবে গণেশগুৰিৰ আৰ পি ৰোডত নিৰ্মাণ কৰা মন্দিৰটোলৈ সুদূৰ ৰাজস্থানৰ শ্ৰীছালচৰ ধামৰ পৰা অনা হৈছে অক্ষয় জ্যোতি।
ইফালে, মহানগৰীৰ মাজমজিয়াৰ গণেশ উদ্যানত স্থাপন কৰা মন্দিৰটোত যোৱা ২৩ নৱেম্বৰৰ পৰা আজি পর্যন্ত ধাৰাবাহিকভাবে অব্যাহত থকা বহিঃৰাজ্যৰ পৰা আমন্ত্রিত শিল্পীৰ ভজন কীর্তন অনুষ্ঠান উচ্চ স্বৰত অনুভাষ যন্ত্ৰৰে পৰিবেশন কৰি থকাৰ বাবে অঞ্চলটোত বসবাস কৰা বিভিন্ন অনুষ্ঠান-প্রতিষ্ঠানৰ কৰ্মচাৰী, আবাসিক লোকসকলেও অস্বস্তিৰ গৰাহত পৰি ক্ষোভ উজাৰিছে।
বিভিন্ন সচেতন ব্যক্তিয়ে এইবুলিও মত প্রকাশ কৰিছে যে গুৱাহাটীত নতুনকৈ আৰু কোনো দেৱ-দেৱীৰ মন্দিৰ স্থাপনৰ প্ৰয়োজনীয়তা নাই, বিশেষকৈ মধ্য-উত্তৰ ভাৰতীয় সংস্কৃতিৰ পৰা আমদানিকৃত এনে মঠ-মন্দিৰৰ সংখ্যাধিক্যই অসমৰ সাতাম পুৰুষীয়া সংস্কৃতিৰ প্ৰতি ভাবুকি কঢ়িয়াই অনাৰ সম্ভাৱনা নুই কৰিব নোৱাৰি বুলি সংশ্লিষ্ট মহলে মত প্ৰকাশ কৰিছে।
উল্লেখ্য যে,শেহতীয়াকৈ গুৱাহাটী সহ ৰাজ্যৰ কেতবোৰ অঞ্চলত হিন্দীভাষীৰ মন্দিৰ প্ৰতিষ্ঠাৰ আগ্ৰাসনে অসমীয়া সংস্কৃতিক উপলুঙা কৰিছে বুলি মন্তব্য কৰে সচেতন মহলে ৷
মনকৰিবলগীয়া যে, সততে জাতীয় সংগঠন বুলি দাবী কৰি থকা সংগঠনবোৰে এইকাৰ্য দেখি- শুনি মৌন হৈ থকাটো চিন্তনীয় বিষয় হিচাপে পৰিগণিত হৈছে ৷