Passengers are Desperate for Buses:
তৃতীয় পর্যায়ৰ নির্বাচনৰ ভোটগ্রহণলৈ মাজতে আৰু এদিনহে বাকী থকা অৱস্থাত ভোটদানৰ বাবে হেজাৰ হেজাৰ গৃহমুখী লোকে দেওবাৰ আৰু সোমবাৰে বাছৰ অভাৱত গুৱাহাটীত বোন্দাপৰ দিবলগীয়া পৰিস্থিতিৰ উদ্ভৱ হয়। বিশেষকৈ গুৱাহাটীৰ আইএছবিটি, আদাবাৰী, খানাপাৰা, বশিষ্ঠ চাৰিআলি, জালুকবাৰীকে নামনি অসমমুখী পথৰ প্ৰতিটো আস্থানাতে পুৱাৰে পৰা বাহন বিচাৰি যাত্ৰীৰ সমাগম ঘটে।
উল্লেখ্য যে নির্বাচনী কামত নিয়োজিত কৰাৰ বাবে বিভিন্ন জিলা প্রশাসনে ইতিমধ্যে বিভিন্ন পথত চলাচল কৰা প্রায় সকলোবোৰ যাত্রীবাহী গাড়ী অধিগ্রহণ কৰিছে। ফলত এতিয়া গুৱাহাটীৰ পৰা নামনি অসমমুখী প্রতিটো গন্তব্যস্থলবে যাত্রীবাহী গাড়ীৰ অভাৱ ঘটিছে।
উল্লেখ্য যে তৃতীয় পর্যায়ৰ মঙলবাৰে হ’বলগীয়া ভোটগ্রহণৰ প্ৰাকক্ষণত বিগত প্রায় এসপ্তাহ পূৰ্বৰে পৰা নামনি অসমৰ ধুবুৰী, গোৱালপাৰা, বৰপেটা, বঙাইগাঁও, কোকৰাঝাৰ অভিমুখী সকলো যাত্রীবাহী বাহনতে যাত্ৰীৰ ভিৰ ঘটা পৰিলক্ষিত হৈছিল। আনকি ভোটদানৰ বাবে নিজৰ নিজৰ ঘৰলৈ ওলোৱা যাত্রীৰে ঠাহ খাই পৰিছিল নামনি অসমৰ বিভিন্ন স্থানলৈ যোৱা যাত্রীবাহী ৰে’লসমূহো। দেওবাৰ আৰু আজিও যানবাহনৰ অভাৱৰ অধিক জটিল ৰূপ ধাৰণ কৰা পৰিলক্ষিত হয়। কেৱল দুৰণিবটীয় বাছেই নহয়, মহানগৰীতো আনকি নোহোৱা হৈ পৰিছে চিটিবাছ আৰু মেজিক। স্বাভাৱিকতে হাৰাশাস্তিৰ সম্মুখীন হ’বলগীয়া হৈছে মহানগৰবাসীয়েও।
উল্লেখ্য যে অহা মঙলবাৰে অনুষ্ঠিত হ’বলগীয়া ভোটদানৰ বাবে আজি গৃহাভিমুখী বহুলোকে যানবাহনৰ অভাৱত প্রতিটো আস্থানতে ভিৰ কৰা পৰিলক্ষিত হয়। অৱশ্যে ইয়াৰ মাজতো ধুবুৰী, গোৱালপাৰা আৰু বৰপেটাৰ একাংশ লোকক নির্দিষ্ট কোনো ৰাজনৈতিক দলৰ পৃষ্ঠপোষকতাত সৰু গাড়ীবাৰে গুৱাহাটীৰ পৰা নিজৰ নিজৰ স্থানলৈ কঢ়িওৱা হৈছে বুলি স্বয়ং পৰিবহণ বিভাগেই প্রকাশ কৰিছে।
উল্লেখ্য যে গুৱাহাটীত চলাচল কৰা চিটিবাছসমূহ ইতিপূর্বে অধিগ্রহণ কৰি বিভিন্ন স্থানলৈ প্ৰেৰণ কৰাৰ পাছত গুৱাহাটীত থকা ৩৮০ খন স্কুল বাছো অধিগ্রহণ কৰি পৰিবহণ বিভাগে নির্বাচনী বিভাগক গতাই দিছে। নির্বাচনৰ প্ৰাক্র্মুহূর্তত ভোটাধিকাৰ সাব্যস্ত কৰাৰ বাবে গুৱাহাটীত কর্মসূত্রে কটোৱা লোকসকলে নিজৰ নিজৰ ঘৰলৈ যাবলৈ গৈ বাছৰ অভাৱত বিমুখ হোৱাৰ পাছত প্ৰশাসনৰ বিৰুদ্ধে ক্ষোভ প্রকাশ কৰাও পৰিলক্ষিত হৈছে।