BJP’s war room is ready to counter the government’s opposition:
দল আৰু চৰকাৰৰ সমালোচনাক বিনাশ কৰিবলৈ অসমত নতুন ৰূপত অৱতীৰ্ণ হৈছে বিজেপি। সাধাৰণতে নিৰ্বাচনৰ সময়তহে ৰাজনৈতিক দলবোৰে ‘ৱাৰ কম’ স্থাপন কৰি বিভিন্ন অভিযান আৰম্ভ কৰে। অসমৰ বিজেপিয়ে দল-চৰকাৰে নিৰ্বাচনলৈ অপেক্ষা নকৰি এতিয়াই ‘ৱাৰ ৰূম’ সাজু কৰি সমালোচকক বিনাশৰ অভিযান আৰম্ভ কৰিছে। এই অভিযান আৰম্ভ কৰা হৈছে সামাজিক মাধ্যমেৰে।
মুখ্যমন্ত্ৰীৰ নিৰ্দেশত আৰম্ভ হোৱা এই যুঁজ কিদৰে তীব্ৰতৰ কৰিব বিচাৰিছে বিজেপিয়ে? ইয়াৰ বাবে এনে কৌশল গ্রহণ কৰা হৈছে, য’ত দলৰ কোনো কর্মী-সমর্থকে সমালোচকৰ সমালোচনাক প্রত্যুত্তৰ দিব, অথচ কর্মীজনে নিজে নিদিয়ে। তেওঁৰ হৈ ‘ৱাৰ ৰূম’ ত বহি থকা দায়িত্ববাহীসকলেহে প্রত্যুত্তৰ দিব। অর্থাৎ তেনেবোৰ লোকৰ সামাজিক মাধ্যমৰ একাউন্টবোৰ বিজেপিৰ ‘ৱাৰ ৰূম‘ৰ দায়িত্ববাহীসকলেহে পৰিচালনা কৰিব। সেইসকল বিজেপিৰ কর্মী-সমর্থক হ’লেও দেখাত আন সাধাৰণ নিৰপেক্ষ নাগৰিকৰ দৰে হ’ব।
তেওঁলোকৰ জৰিয়তে দল-চৰকাৰৰ সমালোচকৰ ওপৰত সামাজিক মাধ্যমৰ জৰিয়তে আক্রমণ চলোৱা হ’ব বৃহৎ পৰিসৰত। সেয়েহে হেজাৰ হেজাৰ দলীয় কর্মী-সমর্থকৰ নাম সংগ্ৰহ কৰি তেওঁলোকৰ বিপৰীতে একাউন্ট খোলা প্রক্রিয়া আৰম্ভ হৈছে।
দলীয় সূত্রই সদৰী কৰা অনুসৰি, ৰাজ্যত ১২৬টা বিধানসভা সমষ্টিৰ প্রতিটোৰ পৰা ন্যূনতম ৫০টাকৈ নাম ‘ৱাৰ ৰূম’ৰ বাবে বিচৰা হৈছে। এই দায়িত্ব দিয়া হৈছে বৰ্তমানৰ বিধায়ক আৰু প্রাক্তন বিধায়কৰ লগতে আগন্তুক নিৰ্বাচনৰ সম্ভাব্য দলীয় প্রার্থীসকলক। কৌশল অনুসৰি নামবোৰৰ বিপৰীতে ‘ৱাৰ ৰূম’ত ফেচবুক, এক্স আদি মাধ্যমত নতুন একাউন্ট খোলা হ’ব।
বিৰোধী অথবা আন কোনো লোকে দল- চৰকাৰক কিদৰে সমালোচনা কৰে, তাৰ ওপৰত ইতিমধ্যে দৃষ্টি ৰখা হৈছে। সেই সমালোচনাৰ উত্তৰ দিয়াৰ প্ৰক্ৰিয়াও আৰম্ভ হৈছে। যেতিয়াই গোটেই প্রক্রিয়াটো সম্পন্ন হ’ব, তেতিয়া তেনে সমালোচনাৰ প্ৰত্যুত্তৰ নতুনকৈ সৃষ্টি কৰা একাউণ্টবোৰৰ জৰিয়তে ‘ৱাৰ ৰূম’ৰ পৰা দিয়া হ’ব। ইয়াৰ অন্যতম উদ্দেশ্য হ’ল সমালোচনাৰ বিপৰীতে কঠোৰ প্ৰত্যুত্তৰ প্ৰদান কৰা আৰু তাৰ জৰিয়তে সমালোচকক অৱদমিত কৰি ৰখা।
উল্লেখ্য যে দেশৰ ৰাজনৈতিক ক্ষেত্ৰখনত প্ৰথমবাৰলৈ সামাজিক মাধ্যমৰ বহুল ব্যৱহাৰৰে বিজেপিয়ে বিগত ২০১৪ ত একপ্ৰকাৰ ধুমুহাৰ সৃষ্টি কৰিছিল। নৰেন্দ্ৰ মোদীৰ নেতৃত্বত প্ৰথমবাৰলৈ চৰকাৰ গঠনত সামাজিক মাধ্যমৰ ভূমিকা আছিল অন্যতম। বিজেপিৰ অনুকৰণতহে পৰৱৰ্তী সময়ত আন দলবোৰেও সামাজিক মাধ্যমত গুৰুত্ব আৰোপ কৰে। সেইবাৰ উত্তৰ দিয়াৰ দায়িত্বত থকা নিৰ্দিষ্টসকলক কামৰ বিনিময়ত মাননিও দিয়া হৈছিল। ১৫শ টকীয়া বুলি এক প্ৰচাৰ সৰ্বত্ৰে বিয়পিছিল। এইবাৰ তেনে নহয়। এইবাৰ একাউণ্টৰ গৰাকী সঁচা হ’ব আৰু তেওঁৰ হৈ উত্তৰ দিয়া হ’ব ‘ৱাৰ ৰূম’ৰ পৰা।
অৱশ্যে ২০১৪ত আলোড়ন সৃষ্টি কৰিও বিজেপি পৰৱৰ্তী সময়ত কে’বাটাও বিৰোধী দলৰ তুলনাত সামাজিক মাধ্যমৰ ব্যৱহাৰত পিছপৰি ৰয়। যোৱা লোকসভা নির্বাচনতো মাধ্যমটোৰ ব্যৱহাৰত বিজেপিতকৈ বহু আগত থাকে আম আদমী পার্টি। কংগ্রেছেও বিজেপিক পিছ পেলাবলৈ সক্ষম হয়। অসমত বিজেপি এই ক্ষেত্ৰত অধিক পিছপৰি ৰয়, যাৰ বাবে ৰাষ্ট্ৰীয় নেতৃত্বৰ পৰা মুখ্যমন্ত্রীয়েই কথা শুনিবলগীয়া হয়।
তাৰ পাছতে অসমত সামাজিক মাধ্যমক বহুল ৰূপত ব্যৱহাৰ কৰিবলৈ মুখ্যমন্ত্ৰীয়ে দলৰ প্ৰতিজন নেতা-কর্মীক নির্দেশ দিয়ে। অৱশ্যে তাৰ পাছতো আশা কৰা ধৰণে অসমত দলটো সফল নহ’ল। যাৰ বাবে বিৰোধীয়ে বহু ক্ষেত্রত বিজেপিতকৈ সামাজিক মাধ্যমত আগত থাকিবলৈ সক্ষম হয়।
এই ব্যর্থতাৰ ফচল ‘ৱাৰ ৰূম’ বুলি দলৰ মজিয়াতে চর্চা লাভ কৰিছে। চৰকাৰৰ কাম-কাজ, নেতাৰ ভাষ্য প্ৰচাৰ কৰিবলৈ বিজেপিৰ সংগঠনৰ প্রতিটো স্তৰতে সামাজিক মাধ্যম কোষ আছে। সেইবোৰ আগৰ দৰেই চলি থাকিব। তাৰ ওপৰঞ্চিহে সংযোজিত কৰা হৈছে এই ‘ৱাৰ ৰূম’।