CBI has arrested fraudster Dipankar Barman in jail in connection with an online trading scam:
ৰাজ্যত সংঘটিত অনলাইন ট্রেডিঙৰ বিয়াগোম কেলেংকাৰিৰ প্ৰথমটো গোচৰৰ মুখ্য অভিযুক্ত দীপাংকৰ বৰ্মনক কেন্দ্রীয় অনুসন্ধান সংস্থা (চিবিআই)ই নিজৰ জিম্মাত লয়। গোৱাত গ্রেপ্তাৰ হোৱা দীপাংকৰ সাতদিনৰ আৰক্ষীৰ জিম্মাত আছিল।
ইতিমধ্যে আৰক্ষীৰ জিম্মাৰ ম্যাদ শেষ হোৱাত আদালতে প্রৱঞ্চকজনক ন্যায়িক জিম্মালৈ প্রেৰণ কৰে। এই অনুসৰি দীপাংকৰক গুৱাহাটী কেন্দ্রীয় কাৰাগাৰলৈ প্রেৰণ কৰা হয়। কাৰাগাৰতে উপস্থিত হৈ চিবিআইৰ দলে দীপাংকৰক ছদিনৰ জিম্মাত লয়। অৱশ্যে দীপাংকৰ কাৰাগাৰতে থাকিব। চিবিআইয়ে জেৰাৰ বাবে নির্ধাৰণ কৰা স্থানত দীপাংকৰক কাৰাগাৰ কর্তৃপক্ষই হাজিৰ কৰাব লাগিব।
উল্লেখ্য যে দীপাংকৰৰ ‘ডিবি ষ্টক বুকিং’ নামৰ অনলাইন ট্রেডিঙৰ প্রতিষ্ঠানটোৱে বিনিয়োগকাৰীক ধন ওভতাই দিব নোৱাৰাৰ পাছতে ৰাজ্যত এই অবৈধ বেহাৰ ব্যাপকতাৰ তথ্য পোহৰলৈ আহে। তদন্তকাৰী পক্ষই অনুমান কৰা অনুসৰি অসমতে দীপাংকৰে কে’বাশ কোটিটকীয়া কেলেংকাৰি সংঘটিত কৰে। তদুপৰি তেলেংগানা, অন্ধ্রপ্রদেশ, কৰ্ণাটক, নাগালেণ্ড আদি ৰাজ্যৰো দীপাংকৰে প্ৰৱঞ্চনাৰ জাল বিস্তাৰ কৰিছিল। তেলেংগানাত কোটি কোটি টকাৰ কেলেংকাৰি সংঘটিত কৰাৰ তথ্য ইতিমধ্যে পোহৰলৈ আহিছে।
দীপাংকৰৰ প্রৱঞ্চনা পোহৰলৈ অহাৰ সময়তে যোৱা আগষ্টত তেওঁ অসমৰ পৰা পলায়ন কৰিছিল। সুদীর্ঘ তিনিমাহৰ বিৰতিতহে দীপাংকৰ গোৱাত আৰক্ষীৰ জালত পৰে। বিভিন্ন সময়ত চর্চা অনুসৰি বিশেষ পক্ষৰ সহযোগত দীপাংকৰে এনে দীর্ঘদিন আত্মগোপন কৰি থাকিবলৈ সক্ষম হৈছিল। আত্মগোপনৰ সময়তো দীপাংকৰে প্রেয়সীৰ ভনীয়েকৰ সহযোগত হাৱালাৰে লাখ লাখ টকা লাভ কৰিবলৈ সক্ষম হৈছিল। ইয়াৰ উৎস বিচাৰি আৰক্ষীয়ে বিগত সাতদিনে দীপাংকৰক জেৰা কৰে যদিও সফল নহ’ল।
ইপিনে, তেজপুৰত গিনি কেপিটেল নামৰ এটা কোম্পানী মুকলি কৰি অনলাইন ট্রেডিঙৰ নামত বৃহৎ পৰিমণৰ ধন আত্মসাৎ কৰাৰ অভিযোগত গ্রেপ্তাৰ হোৱা হেমেন ৰাভা নামৰ যুৱকজনৰ লগতে শংকৰ সাহা নামৰ আন এজনক চিবিআয়ে জিম্মাত লৈছে।
উল্লেখ যে যোৱা সময়ছোৱাত তেজপুৰ কাৰাগাৰাত ন্যায়িক জিম্মাত আছিল এই দুই অভিযুক্ত। সম্প্রতি ৰাজ্য কঁপোৱা অনলাইন ট্রেডিং প্রৱঞ্চনাৰ গোচৰৰ তদন্ত চিবিআইক অর্পণ কৰা হৈছে আৰু ইয়াৰ বাবেই কালি দুয়োকে চিবিআয়ে তেজপুৰ কাৰাগাৰৰ পৰা নিজৰ জিম্মাত লয়।
প্রণিধানযোগ্য যে অভিযুক্ত হেমেনে তেজপুৰৰ লগতে বিহগুৰিকে ধৰি বিভিন্ন অঞ্চলৰ একাংশৰ পৰা বৃহৎ পৰিমাণৰ ধন অনলাইন ট্রেডিঙৰ নামত সংগ্রহ কৰিছিল আৰু ইয়াৰ ভিতৰত একাংশ ৰাজনৈতিক দলৰ স্থানীয় নেতা-পালিনেতাও আছে বুলি ব্যাপক চৰ্চা লাভ কৰিছিল।