Manipur Violence:
মণিপুৰত শান্তি আলোচনাৰ নামত ৰাজ্য চৰকাৰৰ বিৰুদ্ধে মিথ্যাচাৰৰ অভিযোগত সৰৱ হৈছে ১০ জন কুকি-জো সম্প্ৰদায়ৰ বিধায়ক। শাসকীয় বিজেপিসহ সকলো দলৰ বিধায়কে কুকি সকলৰ বাবে সুকীয়া পৃঠক প্ৰশাসনৰ দাবী উত্থাপন কৰে।
তেওঁলোকে কয়,যে উচ্চতম ন্যায়ালয়ত যোৱা আঠ নৱেম্বৰৰ এক শুনানিত ভাৰতৰ ছলিচিটৰ জেনেৰেলে কয় যে মুখ্যমন্ত্রী এন বীৰেন সিঙে ৰাজ্যত শান্তি পুনৰ প্ৰতিষ্ঠাৰ বাবে সকলো কুকি বিধায়কৰ স’তে বৈঠকত মিলিত হৈছে। মুখ্যমন্ত্রী সিঙৰ তীক্ষ্ণ সমালোচক পাউলিয়েনলাল হাওকিপে বিধায়কৰ স্বাক্ষৰ কৰা এক বিবৃতিত এই কথা প্রকাশ কৰি ইয়াক সম্পূর্ণ মিথ্যাচাৰ বুলি জাঙুৰ খাই উঠে বিধায়কসকল। অৱশ্যে মণিপুৰ চৰকাৰৰ মতে গোষ্ঠী সংঘৰ্ষত জৰ্জৰ ৰাজ্যখনত শান্তি প্রক্রিয়া ব্যাহত কৰিবলৈ উদ্দেশ্য প্রণোদিতভাৱে বিকৃত অ’ডিঅ’ টেপৰ জৰিয়তে অপপ্ৰচাৰ চলোৱা হৈছে।
উল্লেখ্য যে বিবৃতিত কুকি-জো বিধায়কসকলে কয় যে উচ্চতম ন্যায়ালয়ত চৰকাৰী অধিবক্তাৰ ভাষ্য সম্পূর্ণ মিথ্যাচাৰ আৰু ইয়াৰ জৰিয়তে উচ্চতম ন্যায়ালয়ক ভুল পথেৰে পৰিচালিত কৰাৰ চেষ্টা চলোৱা হৈছে। কিয়নো মুখ্যমন্ত্রী সিঙে বিগত ১৮মাহ ধৰি বিধায়কসকলক কোনো দিনে সাক্ষাৎ কৰা নাই অথবা বৈঠকত মিলিত হোৱা নাই। মণিপুৰত গোষ্ঠী সংঘৰ্ষৰ সূচনা হোৱাৰ সময়ৰে পৰা আজি পর্যন্ত মুখ্যমন্ত্রী সিঙে এই বিধায়কসকলক কোনোদিনে সাক্ষাৎ কৰা নাই বুলি তেওঁলোকে কয়।
বিবৃতিত কুকি-জো বিধায়কসকলে এইদৰে কয়, ‘আমি পুনৰ স্পষ্ট কৰি দিব বিচাৰো যে আমি ২০২৩ৰ তিনি মে’ব পৰা আজি পর্যন্ত কেতিয়াও মুখ্যমন্ত্রী বীৰেন সিঙৰ স’তে কোনো ধৰণৰ বৈঠকত মিলিত হোৱা নাই অথবা তেওঁৰ স’তে ভৱিষ্যতেও বৈঠকত মিলিত হোৱাৰ আমাৰ কোনো উদ্দেশ্য বা ইচ্ছা নাই, কিয়নো ইম্ফল উপত্যকাত আমাৰ মানুহৰ বিৰুদ্ধে হিংসা আৰু নৃ-গোষ্ঠীয় সংহাৰৰ আঁৰৰ মাষ্টাৰ মাইণ্ডজন তেৱে আজি পর্যন্ত এই ঘটনা অব্যাহত আছে। শেহতীয়াভাৱে চলিত বৰ্ষৰ যোৱা সাত নবেম্বৰত অতি নৃশংসভাবে জচাংকিম মাৰ নামৰ মহিলা গৰাকীক হত্যা কৰি জ্বলাই দিয়া হৈছে।’
উল্লেখ্য যে কেন্দ্রীয় গৃহমন্ত্রী অমিত শ্বাহৰ নিৰীক্ষণত সম্পূর্ণ হোবা কেন্দ্রীয় চোৰাংচোৱা সংস্থাৰ আইবিৰ এক বৈঠকত অংশগ্ৰহণৰ উদ্দেশ্যে যোৱা অক্টোবৰত দিল্লীলৈ গৈছিল মণিপুৰৰ একাংশ বিধায়ক। অৱশ্যে এই বৈঠকখনত শাস্তি প্ৰতিষ্ঠাৰ বাবে মণিপুৰৰ সকলো বিধায়কৰ স’তে গৃহমন্ত্রী শ্বাহ মিলিত হ’ব বুলি কোৱা হয় যদিও দিল্লীলৈ যোৱা কুকি-জো সম্প্ৰদায়ৰ বিধায়কসকলে মেইটেইসকলৰ স’তে বৈঠকত একেলগে উপস্থিত নাছিল।
পৰিৱৰ্তে তেওঁলোকে গৃহ মন্ত্রণালয়ৰ বিষয়াসকলৰ স’তে পৃথককৈ বৈঠকত মিলিত হয়। উল্লেখ্য যে মণিপুৰৰ মুখ্যমন্ত্ৰীৰ বিৰুদ্ধে কুকি সংগঠনে এটা অডিঅ’ ক্লিপৰ আধাৰত গোষ্ঠী সংঘর্ষত মূল ভূমিকা পালনৰ অভিযোগ উত্থাপন কৰি উচ্চতম ন্যায়ালয়ত ইয়াৰ তদন্তৰ বাবে আদালতৰ নিৰীক্ষণত বিশেষ তদন্তকাৰী দল (এছআইটি) গঠনৰ বাবে আবেদন দাখিল কৰিছে। এই আবেদন মর্মে এইবোৰ ‘লীক’ হোৱা অডিঅ’ টেপৰ সত্যাসত্য পৰীক্ষা কৰিবলৈ প্ৰয়োজনীয় নথিপত্ৰ আদি দাখিলৰ বাবে যোৱা শুকুৰবাৰে উচ্চতম ন্যায়ালয়ে কুকি সংগঠনলৈ দিয়া নির্দেশৰ পাছতে আজি কুকি-জো সম্প্ৰদায়ৰ বিধায়কসকলে বিবৃতি প্রকাশ কৰে। গৃহ মন্ত্রণালয়ে গঠন কৰা এক তদন্ত আয়োগত এই টেপবোৰ দাখিল কৰা হয়।
মণিপুৰ চৰকাৰে আনহাতে কয় যে হিংসাজৰ্জৰ ৰাজ্যখনত শান্তি প্রক্রিয়া ব্যাহত কৰিবলৈ উদ্দেশ্যপ্রণোদিতভাৱে বিকৃত ৰূপত অডিঅ’ টেপ প্ৰচাৰ কৰা হৈছে। সামাজিক মাধ্যম ‘এক্স’ৰ জৰিয়তে এনে বিকৃত ৰূপত অডিঅ’ টেপ প্ৰচাৰ কৰা হৈছে। যোৱা সাত আগষ্টত কুকি ছাত্র সংগঠন (কেএছঅ’)-এ এই অডিঅ’ ক্লিপৰ এটা অংশ ৰাজহুৱা কৰাৰ সময়তে মণিপুৰ চৰকাৰে এই অভিযোগ নস্যাৎ কৰিছে। ইয়াৰ পাছত এই সম্পর্কে প্রকাশিত বাতৰিও মণিপুৰ চৰকাৰে নস্যাৎ কৰে।
চৰকাৰে এক বিবৃতিত কয় যে এইদৰে বিকৃত অডিঅ’ ক্লিপৰ জৰিয়তে অসত্য বাতৰি আৰু অপ্ৰচাৰ বিয়পোৱাৰ ঘটনাক চৰকাৰে হিংসা আৰু সম্প্রদায়সমূহৰ মাজত অবিশ্বাস বিয়পোৱাৰ দৰে ৰাষ্ট্ৰবিৰোধী কার্যকলাপ ৰূপে গণ্য কৰে। উল্লেখ্য যে আজি পর্যন্ত মণিপুৰত হিংসাত্মক ঘটনাত গৃহহাৰা হোৱা লোকসকল ঘৰলৈ উভতিব পৰা নাই। কোনো এটা সম্প্ৰদায়ৰ মানুহেই নিজ গৃহলৈ আহি সংস্থাপিত হোৱাৰ পৰিৱেশ এতিয়াও গঢ় লোৱা নাই।
কুকি-জো বিধায়কসকল আৰু কুকি নাগৰিক সমাজৰ অভিযোগ অনুসৰি বীৰেন সিঙে পদত্যাগ নকৰা পৰ্যন্ত আলোচনা সম্ভৱ নহয়। মন কৰিবলগীয়া যে কুকি নেতাসকলে দৃঢ়স্থিতি পোষণ কৰি কয় যে পৃথক প্রশাসন প্রদান কৰি সমস্যাৰ সমাধান কৰিব লাগে। ইয়াৰ পাছতে আশ্রয় শিবিৰত থকা হেজাৰ হেজাৰ লোকক ঘৰলৈ ওভতাই অনাৰ বিষয়ে আলোচনা কৰিব পৰা যাব। ইপিনে, ইয়াৰ বিৰোধিতা কৰি মেইটেই সম্প্ৰদায়ৰ নেতাসকলে কয় যে কুকিসকলে পৃথক গৃহভূমিৰ দাবীৰ পৰিকল্পনা ৰচিছে।
