Silchar Incident:
শনিবাৰৰ দিনা পুৱাৰ ভাগত শিলচৰ মেডিকেল কলেজ হাস্পাতালত কুকি আৰু মাৰ উপজাতি লোকৰ প্ৰতিবাদী কাৰ্যসূচীত উত্তপ্ত পৰিস্থিতিৰ সৃষ্টি হয় । আৰক্ষীক লক্ষ্য কৰি উপজাতি লোকে শিলগুটি নিক্ষেপ কৰাৰ পিছত পৰিস্থিতি নিয়ন্ত্ৰণলৈ অনাৰ বাবে আৰক্ষীয়ে তেওঁলোকৰ ওপৰত লাঠি চাৰ্জ কৰিবলৈ বাধ্য হয়।
উপজাতি লোকৰ শিলগুটি নিক্ষেপ কৰাৰ ফলত কেইবাজন আৰক্ষী সহ ৪ গৰাকী সাংবাদিক আহত হয় । ১০ কুকি উগ্ৰপন্থীৰ মৃতদেহৰ মৰণোত্তৰ পৰীক্ষাৰ পিছত মৃতদেহ লৈ যোৱাৰ সময়ত সৃষ্টি হয় উত্তপ্ত পৰিস্থিতিৰ ।
উল্লেখ্য যে ,যোৱা সোমবাৰে জিৰিবামত চিআৰপিএফৰ গুলীত নিহত হৈছিল ১০ কুকি উগ্ৰপন্থী । পৰৱৰ্তী সময়ত মণিপুৰ প্ৰশাসনে মৃতদেহ কেইটা মৰণোত্তৰ পৰীক্ষাৰ বাবে প্ৰেৰণ কৰিছিল শিলচৰস্থ মেডিকেল হাস্পতাললৈ ৷ এই মৃতদেহ পৰিয়ালৰ লোকে লৈ যাবলৈ শিলচৰ মেডিকেলত উপস্থিত হৈছিল। পৰিয়ালৰ লোকৰ সৈতে বিভিন্ন কুকি আৰু মাৰ সংগঠনৰ কৰ্মী সদস্যই উপস্থিত আছিল।
মণিপুৰৰ আৰক্ষীয়ে যেতিয়া মৰ্গৰ পৰা মৃতদেহ উলিয়ায় তেতিয়া পৰিয়ালৰ লোকে মৃতদেহ তেওঁলোকক চমজাই দিবলৈ কয়। কিন্তু তেওঁলোকক মৃতদেহ চমজাই দিয়া নহ’ব বুলি আৰক্ষীয়ে জানিবলৈ দিয়ে। পিছত আৰক্ষীৰ সৈতে কুকি আৰু মাৰ লোকৰ মাজত সংঘাত হয়। আৰক্ষীয়ে লাঠি চাৰ্জ কৰি তেওঁলোকক আতৰোয়াৰ চেষ্টা কৰে। খবৰ পাই কাছাৰৰ আৰক্ষী অধীক্ষক নোমল মাহাতো আৰু ডিআইজি কঙ্কন জ্যোতি শইকীয়া সহ আৰক্ষী বাহিনী উপস্থিত হয়। বহু সময় ধৰি আৰক্ষী আৰু মাৰ ,কুকি সকলৰ মাজত কথা বতৰাৰ পিছত অসম আৰক্ষীয়ে মৃতদেহ মণিপুৰ আৰক্ষীৰ হাতত চমজাই দিয়ে l মাৰ এছ’চিয়েচনৰ সদস্যসকলে দাবী কৰে যে মৃতদেহসমূহ বিমানেৰে নহয়, স্থলপথৰেহে নিব লাগিব ৷
কিন্তু মণিপুৰ আৰক্ষীয়ে মৃতদেহ চমজি লৈ যায় শিলচৰ মাছিমপুৰৰ সেনা চাউনিলৈ। আনহাতে ইয়াৰ পৰা এয়াৰ লিফটিং কৰি হেলিকপ্টাৰেৰে মণিপুৰৰ চূড়াচাঁদ পুৰ লৈ যোৱা হ’ব বুলি জানিবলৈ দিয়ে আৰক্ষী অধীক্ষক নোমল মাহাতোৱে ।
জানিব পৰা মতে, ১০ অভিযুক্ত কুকি উগ্ৰপন্থীৰ মৃতদেহ মণিপুৰলৈ লৈ যোৱাৰ বাবে ভাৰত চৰকাৰে মাছিমপুৰৰ সেনা ছাউনীৰ হেলিপেডৰ পৰা মৃতদেহ হেলিকপ্টাৰেৰে লৈ যোৱাৰ ব্যৱস্থা কৰিছে । তদুপৰি প্ৰতিবাদকাৰী সদস্যসকলে মৃতদেহ হেলিকপ্টাৰে ইম্ফললৈ নহয়,মণিপুৰৰ চূড়াচাঁদপুৰত অৱতৰণ কৰা হ’ব বুলি লিখিত আশ্বাস দাবী কৰে।
পিছত কাছাৰৰ আৰক্ষী অধীক্ষক নোমাল মাহাতোৱে স্পষ্ট কৰি দিয়ে যে, লিখিতভাৱে একো দিব পৰা অৱস্থাত নাই কাৰণ বিষয়টো মণিপুৰ আৰক্ষী আৰু গৃহ মন্ত্ৰালয়ৰ অধীনস্থ। অৱশেষত মাৰ এছ’চিয়েশ্যনৰ এগৰাকী মহিলা সদস্যই নিশ্চিত কৰে যে জিৰিবামৰ অতিৰিক্ত আৰক্ষী অধীক্ষক থমাছে লিখিত আশ্বাস দিছে । লিখিত আশ্বাস মতে,মণিপুৰ আৰক্ষীয়ে মৃতদেহ চূড়াচাঁদপুৰলৈ হেলিকপ্টাৰে লৈ যাব ব। এই আশ্বাসৰ পিছতে মৃতদেহ কফিনত ভৰোৱা হয় আৰু লৈ যোৱা হয় ।
