World Heritage Week is celebrated in Charaideo:
বিশ্ব ঐতিহ্য সপ্তাহ’ উদযাপনৰ অংশ হিচাপে আজি কেন্দ্রীয় মন্ত্রী তথা ডিব্ৰুগড় লোকসভা সমষ্টিৰ সাংসদ সৰ্বানন্দ সোণোৱালে চৰাইদেউ মৈদাম স্থলীত উপস্থিত হয় আৰু যুগজয়ী আহোম স্বৰ্গদেউসকলৰ প্ৰতি সশ্রদ্ধ প্রণিপাত জনায়।
কেন্দ্রীয় মন্ত্রী সর্বানন্দ সোণোৱালে আজি কয়, বিশ্ব ঐতিহ্য ক্ষেত্র হিচাপে স্বীকৃতিপ্রাপ্ত চৰাইদেউ মৈদাম আহোম যুগৰ স্থাপত্যবিদ্যাৰ এক অনন্য নিদর্শন, যিয়ে মহান স্বৰ্গদেউসকলৰ ৰাজত্বকালৰ চানেকি বহন কৰি আহিছে। প্রধানমন্ত্ৰী নৰেন্দ্ৰ মোদীৰ সবল প্রচেষ্টাত চৰাইদেউ মৈদামে ইউনেস্কোৰ ‘বিশ্ব ঐতিহ্য ক্ষেত্ৰ’ৰ মৰ্যাদা লাভ কৰিবলৈ সক্ষম হৈছিল। ইয়াৰ বাবে অসমবাসী মোদীৰ প্ৰতি সদায় কৃতজ্ঞ হৈ ৰ’ব। চৰাইদেউ মৈদামৰ ঐতিহ্য জাকত-জিলিকা হৈ থাকক আৰু মহান স্বৰ্গদেউসকলৰ অম্লান আদর্শ তথা কৰ্মচেতনাই ৰাষ্ট্ৰ নিৰ্মাণৰ যাত্রাত আমাক পথ প্ৰদৰ্শন কৰি যাওক, তাৰেই কামনা কৰিলোঁ।”
সর্বানন্দ সোণোৱালে লগতে উল্লেখ কৰে, মহান আহোম স্বৰ্গদেউসকলৰ শৌর্য-বীর্য, বীৰত্ব আৰু অদম্য সাহসৰ স্মৃতিগাথা বহন কৰি অহা চৰাইদেউৰ মৈদামসমূহ বৃহত্তৰ অসমীয়া জাতিৰ বাবে স্বাভিমান আৰু গৌৰৱৰ প্ৰতীক। সদ্যঘোষিত ইউনেস্কোৰ বিশ্ব ঐতিহ্য স্থলীৰ তালিকা (সাংস্কৃতিক শাখা)ত চৰাইদেউৰ মৈদামো অন্তর্ভুক্ত হোৱাত আমি অতিশয় আনন্দিত হৈছোঁ। মৈদামসমূহলৈ এই অনন্য স্বীকৃতিয়ে যুগজয়ী আহোম স্বৰ্গদেউসকলৰ বৰ্ণাঢ্য ইতিহাস বিশ্বদৰবাৰত জিলিকাই তুলিব।
চৰাইদেউ মৈদামে বিশ্ব ঐতিহ্য ক্ষেত্র হিচাপে স্বীকৃতি লাভৰ কিছু আঁৰৰ কথা:
উল্লেখযোগ্য যে সৰ্বানন্দ সোণোৱালে মুখ্যমন্ত্ৰী হৈ থকাৰ কালছোৱাত এইক্ষেত্রত আগভাগ লৈছিল। তেখেতে ২০২০ চনত চৰাইদেউত ৰাজ্য চৰকাৰৰ উদ্যোগত “মে-ডাম্-মে-ফী”ৰ আয়োজনত আগভাগ লোৱাৰ উপৰি প্ৰধানমন্ত্ৰী নৰেন্দ্ৰ মোদীক চৰাইদেউৰ ঐতিহ্যৰ বিষয়ে অৱগত কৰি এই পৱিত্ৰ স্থলৰ গুৰুত্ব ৰাষ্ট্ৰীয়-আন্তঃৰাষ্ট্ৰীয় পৰ্যায়ত তুলি ধৰিবলৈ অনুৰোধ জনাইছিল। চৰাইদেউ মৈদামে যাতে বিশ্ব ঐতিহ্য স্থলীৰ মৰ্যাদা লাভ কৰিব পাৰে, তাৰ বাবে তদানীন্তন মুখ্যমন্ত্রী সোণোৱালৰ নিৰ্দেশত অসম চৰকাৰৰ সংশ্লিষ্ট মন্ত্ৰীসকলৰ উপস্থিতিত কেইবাখনো পর্যালোচনা বৈঠক অনুষ্ঠিত হৈছিল। ২০১৭ চনৰ ফেব্ৰুৱাৰীত পূৰ্বাঞ্চল টাই সাহিত্য সভাৰ চৰাইদেউৰ অধিৱেশনত সর্বানন্দ সোণোৱালে অংশগ্ৰহণ কৰি চৰাইদেউ অঞ্চলত এক সাংস্কৃতিক ক্ষেত্ৰ প্ৰতিষ্ঠা কৰা হ’ব বুলি মুকলি সভাত ঘোষণা কৰি আৰম্ভণিতে পাঁচ কোটি টকা বাজেটত ধৰা হ’ব বুলি ঘোষণা কৰে। সেই ঘোষণা অনুসৰি সেইবাৰৰ বাজেটত ধনৰাশি ধৰাও হৈছিল। পৰৱৰ্তী বছৰত Archeological Headত বিশ্ব ঐতিহ্য ক্ষেত্ৰৰ বাবে পঁচিশ কোটিৰ আবণ্টন দিয়া হৈছিল।
