Manipur Chief Minister’s revolt against party ministers and MLAs:
হত্যা-হিংসাৰ দাবানলে অৰাজক কৰা মণিপুৰত এইবাৰ শাসকীয় পক্ষৰ অভ্যন্তৰৰ পৰাই কাৰ্যতঃ আৰম্ভ হৈছে মুখ্যমন্ত্রী এন বীৰেন সিং হটাও অভিযান। কিছুদিন পূর্বে শাসকীয় শিবিৰত অসন্তুষ্টিয়ে গা কৰি উঠাৰ ইংগিত স্পষ্ট হোৱাৰ উমি জুলাৰ আভাস পোৱা গৈছে। সৰ্বসাধাৰণ জনতাক নিৰাপত্তা প্রদানত তথা আইন-শৃংখলা পৰিস্থিতি নিয়ন্ত্ৰণত ৰখাত মুখ্যমন্ত্রী ব্যর্থ হোৱা বুলি তেওঁৰ সতীর্থ মন্ত্রী মুকলিকৈ সৰৱ হৈছে।
উল্লেখ্য যে চলিত মাহৰ প্ৰথম সপ্তাহৰ পৰা পুনৰ হত্যা-হিংসাৰ জুই জ্বলিবলৈ লোৱাৰ পৰিপ্ৰেক্ষিতত যোৱা সোমবাৰে মুখ্যমন্ত্রী সিঙে সতীর্থ মন্ত্রী- বিধায়কসকলক লৈ এক জৰুৰী বৈঠকৰ আয়োজন কৰে। লক্ষ্যণীয় যে এই বৈঠকত অংশগ্ৰহণৰ পৰা বিৰত থাকে ১১ জনকৈ মন্ত্রী-বিধায়ক। ইয়াৰ দ্বাৰা মুখ্যমন্ত্ৰীৰ বিৰুদ্ধে তেওঁৰ একাংশ সতীর্থই ‘জেহাদ’ ঘোষণা কৰাটো স্পষ্ট হয়। তদুপৰি মুখ্যমন্ত্রী সিঙৰ বিৰুদ্ধে পৰিস্থিতি নিয়ন্ত্ৰণত চৰম ব্যৰ্থতাৰ অভিযোগ উত্থাপন কৰি বিজেপিৰ সহযোগী দল এনপিপিয়ে মণিপুৰ চৰকাৰলৈ সমর্থনো প্রত্যাহাৰ কৰিছে।
এনেদৰে চৰকাৰখনত অস্থিৰতা সৃষ্টিৰ সম্ভাৱনা প্রকট হোৱাৰ সময়তে মুখ্যমন্ত্রী সিঙক কঠোৰ ভাষাৰে সমালোচনা কৰিছে তেওঁৰ সতীর্থ মন্ত্ৰী যুমনাম খেমচান্দ সিঙে। যোৱা সোমবাৰে মুখ্যমন্ত্রীয়ে আহ্বান জনোৱা বৈঠকত অংশগ্ৰহণৰ পৰা বিৰত থকা মন্ত্রী সিঙে ক্ষোভেৰে কয়, ‘যদি বৈঠকখন মণিপুৰৰ আইন-শৃংখলা পৰিস্থিতিৰ পুনৰীক্ষণৰ বাবে আয়োজন কৰা হৈছিল তেন্তে কিয় বৈঠকলৈ মুখ্য সচিব আৰু আৰক্ষী সঞ্চালক প্রধানক আমন্ত্রণ জনোৱা নহ’ল? বিধায়কসকলক বৈঠকলৈ কিয় মতা হৈছিল?’
উল্লেখ্য যে মুখ্যমন্ত্রীৰ উক্ত বৈঠকত উপস্থিত নথকা বিধায়কবৰ্গলৈ মুখ্যমন্ত্রী সচিবালয়ে কাৰণ দর্শোৱাৰ জাননী জাৰি কৰে। এই জাননীৰ উত্তৰ দি মন্ত্রী সিঙে এনেদৰে মুখ্যমন্ত্রীক উভতি ধৰে। কাৰণ দর্শোৱা জাননী খনৰ প্ৰত্যুত্তৰ দি লিখা পত্ৰত তেওঁ লগতে ক্ষোভ প্রকাশ কৰে যে মণিপুৰৰ আইন-শৃংখলা পৰিস্থিতি বিধ্বস্ত হোৱাৰ ফলত ঘৰ-দুৱাৰ জ্বলাই দিয়াৰ দৰে ঘটনা সংঘটিত হৈছে।
আইন-শৃংখলা প্ৰশাসনৰহে বিষয় বুলি উল্লেখ কৰি মন্ত্রীজনে লগতে কয়, ‘আইন-শৃংখলা প্রশাসনে চাব। এই কাম মোৰ নহয়। যেতিয়া উন্মত্ত লোকে ঘৰ জ্বলাই দিবলৈ লৈছিল, তেনে সময়তে এনে এখন সভা অনুষ্ঠিত কৰা সম্ভৱ নহয়।’ গৃহ ৰাজ্যৰ হিংসাজৰ্জৰ পৰিস্থিতিয়ে আনুভৱিক দিশত তেওঁকো ভাঙি পেলোৱা বুলি মন্তব্য কৰি সিঙে লগতে কয়, ‘প্রতিবাদকাৰীসকল মোৰ ঘৰলৈ অহাৰ সময়ত মই কৈছিলো যে ময়ো ন্যায় বিচাৰি আছো। ময়ো আবেগিকভারে ভাঙি পৰিছো। মই তেওঁলোকক অনুৰোধ কৰিলো আৰু তেওঁলোকে বুজি পালে।
সাধাৰণ জনতাক পৰিস্থিতিৰ বিষয়ে এজনে বুজাই দিয়াৰ প্রয়োজন হৈছে।’ লক্ষ্যণীয় যে ২০২৩ৰ মে’ত মণিপুৰ জ্বলিবলৈ ধৰাৰ সময়ৰ পৰা মুখ্যমন্ত্রী সিঙৰ বিৰুদ্ধে এই মন্ত্রীজনে মুকলিকৈ ক্ষোভ প্রকাশ কৰি আহিছে। বিগত ১৮ মাহ ধৰি ৰাজ্যখনত শাস্তি বুলিবলৈ একো নাই বুলি আঙুলিয়াই দি তেওঁ আৰু কয়, ‘মই তেওঁ (মুখ্যমন্ত্রী) ক বহুবাৰ পদত্যাগ কৰিবলৈ দাবী জনাইছো; কিন্তু তেওঁ পদত্যাগপত্র দাখিল কৰা নাই। অশান্তিৰ মাজতো ১৮ মাহ পাৰ হ’ল। তেওঁ এতিয়ালৈকে শান্তি আনিব পৰা নাই। গতিকে তেওঁ কিয় পদত্যাগ কৰা নাই?’ অৱশ্যে মন্ত্রী সিঙে দাবী কৰে যে অতিৰিক্ত নিৰাপত্তা বাহিনী আহিলেহে মণিপুৰলৈ শান্তি ঘূৰি আহিব।