Special DGP has ordered the formation of an SIT to probe the brutal murder of Garajan:
অৱসৰপ্ৰাপ্ত চৰকাৰী কৰ্মচাৰী গুণধৰ সৰকাৰ আৰু তেওঁৰ পৰিয়ালৰ দুই সদস্যসহ চাৰিজন লোক নিজ গৃহৰ ভিতৰতে হত্যাৰ বলি হোৱাৰ চাৰিদিন পাৰ হোৱাৰ পাছতো আৰক্ষীয়ে হত্যাকাৰীৰ শুংসূত্র উলিয়াবলৈ সক্ষম হোৱা নাই। ইয়াৰ মাজতে ইতিমধ্যে অসম আৰক্ষীৰ গঠন কৰা এছ আই টিয়ে আৰম্ভ কৰিছে প্ৰাৰম্ভিক তদন্ত ৷ তদন্তৰ আঁত ধৰি আজি গড়াজানত উপস্থিত হৈছিল এছডিআৰএফৰ ৷ দলটোৱে হত্যাকাণ্ড সংঘটিত স্থানৰ দাঁতিকাষৰীয়া পুখুৰীত হত্যাকাণ্ডৰ ক্লু’ৰ সন্ধানত চলায় অভিযান ৷ আনহাতে লোমহৰ্ষক হত্যাকাণ্ডৰ তদন্ত সমান্তৰালভাৱে অব্যাহত ৰাখিছে চিআইডি- এ ৷
উল্লেখ্য যে যোৱা ২২ নৱেম্বৰ শুকুৰবাৰে সন্ধিয়া নগাঁৱৰ ৰূপহীহাটৰ গড়াজানৰ পশ্চিম আমৰাকান্দাৰ নিৱাসী গুণধৰ সৰকাৰ, তেওঁৰ পত্নী সৰুধনী সৰকাৰ আৰু তেওঁলোকৰ কন্যা জ্যোতিস্মিতা সৰকাৰসহ চাৰিজন লোকক পৰিয়ালটোৰ ঘৰতে দুর্বৃত্তই ডিঙি কাটি হত্যা কৰে। এই নাৰকীয়তাৰ বলি চতুৰ্থজনক নগাঁও চহৰৰ হয়বৰগাঁও তেলিয়াপট্টিৰ অংশুমান সৰকাৰ বুলি চিনাক্ত কৰা হয়। আৰক্ষীৰ মতে, মৃত অংশুমানৰ স’তে সৰকাৰৰ পৰিয়ালৰ জীয়ৰীৰ একপক্ষীয় প্ৰেমৰ সম্পৰ্ক আছিল। আনকি দুয়োপক্ষৰ মাজত এটা গোচৰো চলি আছে।
বিশেষ সঞ্চালক প্রধান সিঙে সদৰী কৰা অনুসৰি ৰাজ্য কঁপাই যোৱা এই হত্যাকাণ্ডৰ তদন্ত এজন শীর্ষ আৰক্ষী বিষয়াই তদাৰক কৰি আছে। ইতিমধ্যে চিআইডি আৰু ফৰেনচিক বিশেষজ্ঞৰ দলে ঘটনাস্থলী তথা সৰকাৰৰ বাসগৃহৰ পৰা কেতবোৰ ‘ক্লু’ সংগ্ৰহ কৰা বুলি জানিবলৈ দি আৰক্ষীৰ বিশেষ সঞ্চালক প্রধানজনে লগতে কয়, ‘ফৰেনচিক আৰু ‘ফিংগাৰ প্ৰিণ্ট’ৰ প্ৰতিবেদন অহাৰ পাছত অধিক তথ্য পোহৰলৈ আহিব।
এই মর্মান্তিক কাণ্ডৰ তদন্ত ক্ষিপ্রগতিত অব্যাহত আছে।’ তদন্ত কালত আৰক্ষীয়ে ঘাতকৰ সন্ধান লাভ কৰিছে নেকি বুলি সাংবাদিকে সোধা প্ৰশ্নৰ উত্তৰত অৱশ্যে তেওঁ কোনো তথ্য প্রকাশৰ পৰা বিৰত থাকে। তেওঁ কয় যে এই নাৰকীয় কাণ্ডত লিপ্ত ঘাতকক কোনো কাৰণতে ৰেহাই দিয়া নহ’ব। শীর্ষ আৰক্ষী বিষয়াজনে লগতে সদৰী কৰা মতে, এই নৃশংস কাণ্ডৰ কিছু তথ্য আৰক্ষীয়ে লাভ কৰিছে। হত্যাকাণ্ডৰ তদন্তৰ বুজ লোৱাৰ উদ্দেশ্যে ইয়ালৈ অহা বুলি সদৰী কৰি তেওঁ আৰু কয়, ‘তদন্তৰ অগ্ৰগতিৰ বুজ ল’বলৈ ইয়ালৈ আহিছো। তদন্ত চলি আছে, সেয়েহে এই বিষয়ে মই একো নকওঁ। জ্যেষ্ঠ আৰক্ষী বিষয়াই তদন্ত চলাই আছে যদিও মই এটা এছআইটি গঠন কৰি তদন্ত কৰিবলৈ এছপিক নির্দেশ দিছো। হত্যাকাণ্ডৰ তদন্ত এছআইটিয়ে কৰিব।’
আনহাতে, নৃশংসতাৰ বলি তিনিজনৰ মৃতদেহ মৰণোত্তৰ পৰীক্ষাৰ পাছত যোৱা নিশা গড়াজানস্থিত ঘৰলৈ অনা হয়। মৃতদেহ ঘৰলৈ অনাৰ পাছতে গড়াজানত এক শোকাকুল পৰিৱেশৰ সৃষ্টি হয়। পাছত বহু লোকৰ উপস্থিতিত একেলগে তিনিওৰে শেষকৃত্য সম্পন্ন কৰা হয়। তিনিখন চিতাৰ জুই জ্বলি উঠাৰ সময়ত উপস্থিত ৰাইজ উচুপি উঠে।
ইপিনে, গুণধৰ সৰকাৰৰ জ্যেষ্ঠা কন্যা আক্ষী (আৰক্ষীয়ে দিয়া ছদ্মনাম) আৰু পুত্ৰ ভাস্কৰজ্যোতি সৰকাৰৰ নিৰাপত্তাত আৰক্ষীয়ে গুৰুত্ব আৰোপ কৰিছে। উল্লেখ্য যে যোৱা ২২ নৱেম্বৰৰ সন্ধিয়া তেওঁলোকৰ পিতৃ-মাতৃ তথা ভগ্নীসহ চাৰিজনকৈ লোক নিজ গৃহতে হত্যাৰ বলি হোৱাৰ সময়ত তেওঁলোক ঘৰত নাছিল। স্বাভাৱিকতে এই নৃশংস কাণ্ডক লৈ গড়াজান অঞ্চলত ভয় আৰু শংকাৰ পৰিৱেশ বিৰাজ কৰিছে।