সঁচাকৈয়ে অন্ধ নেকি ৰাজ্যৰ আইনী ব্যৱস্থা ! নগাঁও আৰু শোণিতপুৰ জিলাৰ ভিন্ন প্ৰান্তৰ চৰত এতিয়াও শাসন অব্যাহত আছে একাংশ মাতব্বৰৰ । জিলা দুখনৰ অন্তৰ্গত ৰৌমাৰী ব্লক, তিনিকটীয়া, মুছলেম চাপৰি, লাঠিয়ামাৰী, কাট্টিমাৰী, কমাসুঁতি, নগৰী চৰ, পাংৰী, কুট্টামাৰী, বিন্দ্ৰে, বিচ্ছে, বৰৈশালী, ৰাণীটোপাকে ধৰি কেইবাটাও প্ৰমুখ্য চৰ চাপৰি আছে । এই চৰসমূহৰ একাংশ চৰত এতিয়াও কেতবোৰ সয়ম্ভূ মাতব্বৰৰ মুখৰ কথাই আইনসদৃশ ।
ফলত মাতব্বৰ বাহিনীৰ উদ্ভণ্ডালিৰ প্ৰকোপত অতিষ্ঠ হৈ পৰিছে চৰবাসী । চৰবাসীয়ে দৈনিক অগ্ৰদূতক জনোৱা অনুসৰি, মাতব্বৰ বাহিনীৰ আতিশৰ্য্যৰ বাবে চৰত খেতি-বাতি কৰি জীৱন নিৰ্বাহ কৰাটো দুৰূহ হৈ পৰিছে । অধিকাংশ চৰতেই আৰক্ষী-প্ৰশাসনৰ কোনো অস্তিত্বই নাই । চৰবাসীৰ ভিন্ন কথাত দোষ উলিয়াই মাতব্বৰ বাহিনীয়ে বিচাৰ কৰাৰ নামত দাবী কৰে ধন, চৰবাসীয়ে মাতব্বৰ বাহিনীক পৰিশোধ কৰিব লাগিব জৰিমনা ।
উল্লেখ্য যে, এই মাতব্বৰ বাহিনীৰ এইদৰে বিচাৰৰ কৰ্তৃত্ব লোৱাৰ কোনোধৰণৰ অধিকাৰ নাই , তেওঁলোকক চৰবাসীয়ে কোনোদিনে বিচাৰ কৰিবলৈ আমন্ত্ৰণ নজনায় । মাটি-বাৰীৰ বিবাদ, চৰৰ দল-উপদলৰ মাজত হোৱা সংঘৰ্ষ, নাৰী অপহৰণ, নাৰীজনিত ভিন্ন বিবাদ, মাৰ-পিট আনকি দম্পত্তীৰ মাজৰ বিবাদৰো মীমাংসা কৰিবলৈ আহে এই মাতব্বৰ বাহিনীয়ে । সৰ্বাধিক বিচাৰ চলে যৌন কেলেংকাৰীৰ ।
আনকি মাতব্বৰ বানিহীয়ে বিচাৰৰ নামত এটা পক্ষক দোষী সাব্যস্ত কৰি ৫০ ৰ পৰা ১ লাখ টকালৈ জৰিমনা সংগ্ৰহ কৰে । এই বিচাৰ সভাসমূহত কোনো লোকে মাতব্বৰৰ বিৰুদ্ধাচৰণ কৰিব নোৱাৰে । কোনো লোকে মাতব্বৰ বাহিনীৰ বিৰোধিতা কৰিলেই ৰোষত পৰিবলগীয়া হয় ।
আনহাতে বিচাৰ মীমাংসা কৰিবলৈ অহা মাতব্বৰ বাহিনীক মুৰ্গী মাংসৰে ভাত খুৱাব লাগে চৰবাসীয়ে । বিচাৰ সভাত সংগ্ৰহ কৰা ধন মাতব্বৰসকলে ভাগ কৰি লয় ।
চৰবাসীয়ে অভিযোগ কৰা অনুসৰি, তেওঁলোকক শোষণ চলাই অহা মাতব্বৰ বাহিনীৰ অধিকাংশই গুণ্ডা প্ৰকৃতিৰ লোক । কোনো কাৰণত যদি দোষী পক্ষই বিচাৰৰ ধন পৰিশোধ কৰিব নোৱাৰে তেন্তে মাতব্বৰ বাহিনীয়ে দোষী সাব্যস্ত কৰা লোকসকলৰ পৰা ভূমি বলপূৰ্বকভাৱে কাঢ়ি লয় ।
এই সন্দৰ্ভত চৰবাসীয়ে নগাঁও কিম্বা শোণিতপুৰ জিলাৰ প্ৰশাসনক অৱগতে কৰে যদিও আজিলৈ কেৰেপ নকৰিলে প্ৰশাসনে । চৰবাসীৰ অভিযোগ অনুসৰি, এই ঘটনা আমাৰ জিলাৰ নহয় বুলি কৈ গা এৰা মন্তব্য দিয়ে প্ৰশাসনে । ভলত ভুক্তভোগী চৰৰ লোকসকলে নিজৰ ঠাইতে ভয়ে ভয়ে দিন অতিবাহিত কৰিবলগীয়া হৈছে ।
দাঁতি কাষৰীয়া আৰক্ষী থানাসমূহত চৰবাসীয়ে মাতব্বৰ বাহিনীৰ বিৰুদ্ধে এজাহাৰ দিবলৈ গৈ দালালক ধনি দি সৰ্বস্ৰান্ত হৈছে বুলি চৰবাসীয়ে জানিবলৈ দিয়ে । আনকি এই দালালীসকলৰ মাজতো মাতব্বৰ বাহিনীৰো লোক আছে বুলিও স্থানীয় লোকসকলে গুৰুতৰ অভিযোগ উত্থাপন কৰিছে । সেয়েহে থানালৈ অভিযোগসমূহ নিয়াৰ পৰিৱৰ্তে মীমাংসাৰ নামত ৰাজহুৱা মেল পাতি চৰবাসীক মাতব্বৰ বাহিনীয়ে লুণ্ঠন চলাই আছে বুলি ক্ষোভ প্ৰকাশ কৰে চৰৰ বাসিন্দাসকলে ।