চুবুৰীয়া হিমালয়ান দেশ ভূটানৰ ৰাষ্ট্ৰীয় দিৱসত বিশেষ অতিথি ৰূপে আমন্ত্ৰিত অসমৰ মুখ্যমন্ত্ৰী ড:হিমন্ত বিশ্ব শৰ্মাই পত্নী ৰিনিকি ভূঞা শৰ্মাই মঙলবাৰে থিম্ফু ৰাষ্ট্ৰীয় ষ্টেডিয়ামত অনুষ্ঠিত ৰাষ্ট্ৰীয় দিৱসত অংশগ্ৰহণ কৰে ৷ সপত্নীক মুখ্যমন্ত্ৰী উস্ম আদৰণি জনায় ভূটানী ৰজা জিগমে খেছাৰ নামগ্যাল ৱাংচুকে ৷
ইয়াৰ পিছতে ভূটানৰ সামৰিক বাহিনী আৰু চুবুৰীয়া ৰাষ্ট্ৰখনৰ বৰ্ণিল সংস্কৃতিৰ প্ৰদৰ্শন উপভোগ কৰি আহ্লাদিত হয় মুখ্যমন্ত্ৰী গৰাকী ৷ উল্লেখ্য যে,ভূটানৰ নৃপতি জিগমে খেছাৰ নামগ্যাল ৱাংচুকে ২০০৭ৰ ১৭ ডিচেম্বৰত দেশ খনৰ ৰজা হিচাপে অধিস্থিত হৈছিল ৷ তেতিয়াৰে পৰা প্ৰতিবৰ্ষৰ ১৭ ডিচেম্বৰত পালন কৰি অহা হৈছে ৰাষ্ট্ৰীয় দিৱস হিচাপে ৷
উল্লেখ্য যে চলিতমাহৰ মাজভাগত ভূটানৰ নৃপতি জিগমে খেছাৰ নামগ্যাল ৱাংচুকে অসম ভ্ৰমণলৈ আহোতে মুখ্যমন্ত্ৰী ড:শৰ্মাক ৰাষ্ট্ৰীয় দিৱসত বিশেষ অতিথি ৰূপে আমন্ত্ৰণ কৰিছিল ৷
স্মতৰ্ৱ্য যে, চাৰিদিনীয়া ভ্ৰমণসূচীৰে সোমবাৰে ৰয়েল ভূটান এয়াৰ লাইনছৰ বিশেষ বিমানেৰে সপত্নীক মুখ্যমন্ত্ৰী ড:হিমন্ত বিশ্ব শৰ্মা পাৰো আন্তৰাষ্ট্ৰীয় বিমান বন্দৰত উপস্থিত হৈছিল ৷ বিমান বন্দৰত সপত্নী মুখ্যমন্ত্ৰীক উস্ম আদৰণি জনায় দেশখনৰ দেশ খনৰ বৈদেশিক মন্ত্ৰী লিয়নপো ডি এন ধুংলিযেল আৰু ভাৰতৰ উচ্চায়ুক্তই ৷
বিমান বন্দৰত মুখ্যমন্ত্ৰী আৰু তেওঁৰ পত্নী ৰিনিকি ভূঞা শৰ্মা কিছু সময় জিৰণি লৈ ৰাজধানী থিম্ফুলৈ ৰাওনা হৈছিল ৷ আনহাতে থিম্ফুত সোমবাৰে সন্ধিয়া দেশখনৰ চৰকাৰৰ সহযোগত অসম চৰকাৰে আয়োজন কৰা’এভভাণ্টেজ আছাম’ৰ বিশেষ অনুষ্ঠানত অংশ লয় ভূটানৰ নৃপতি জিগমে খেছাৰ নামগ্যাল ৱাংচুক আৰু প্ৰধানমন্ত্ৰী ডা:শ্বেৰিং টবগ সহ মুখ্যমন্ত্ৰী ড:হিমন্ত বিশ্ব শৰ্মাই ৷
ভূটানী নৃপতি নামগ্যাল ৱাংচুকক থিম্ফুত অনুষ্ঠিত ‘এভভাণ্টেজ আছাম’ৰ শোভাযাত্ৰাত তেখেতৰ গৌৰৱময় উপস্থিতিৰে সৌষ্ঠৱ বৃদ্ধি কৰাৰ বাবে মুখ্যমন্ত্ৰী ড:শৰ্মাই ৰজা গৰাকীক আন্তৰিক কৃতজ্ঞতা জ্ঞাপন কৰে ৷
মনকৰিবলগীয়া যে দেশৰ প্ৰথম গৰাকী মুখ্যমন্ত্রী হিচাপে ড: শৰ্মাই ভূটানৰ ৰাষ্ট্ৰীয় দিৱসৰ কার্যসূচীত অংশ লোৱাৰ সমান্তৰালভাৱে মঙল আৰু বুধবাৰে ৰজা জিগমে খেছাৰ নামগ্যাল ৱাংচুক আৰু প্ৰধানমন্ত্ৰী ডা:শ্বেৰিং টবগৰ স’তে এক বৈঠকত মিলিত হ’ব মুখ্যমন্ত্ৰী ড:শৰ্মা ৷