Police launch anti-child marriage operation in Assam:
চৰকাৰে দাবী কৰা অনুসৰি অসমত বাল্যবিবাহ বিৰোধী আইন কঠোৰভাবে বলবৎ হৈ থাকিলেও এই সামাজিক ব্যাধিৰ পৰা সমাজ মুক্ত হোৱা নাই। ফলস্বৰূপে বাল্যবিবাহ কৰা লোক আৰু ইয়াৰ লগত জড়িত অন্যান্য ব্যক্তিসকলৰ বিৰুদ্ধে যোৱা নিশাৰ পৰা অসম আৰক্ষীয়ে তৃতীয় পৰ্যায়ৰ অভিযান আৰম্ভ কৰে ।
অৱশ্যে বিৰোধীয়ে ইয়াক ৰাজ্যৰ জ্বলন্ত সমস্যা সমূহৰ পৰা অসমবাসীৰ দৃষ্টি আনফালে নিবলৈ চলোৱা অভিযানহে বুলি মন্তব্য কৰিছে। অসম আৰক্ষীৰ অপৰাধ অনুসন্ধান বিভাগ (চিআইডি)ৰ অতিৰিক্ত সঞ্চালক প্রধান মুন্না প্রসাদ গুপ্তাই আজি ইয়াত এক সংবাদমেলত সদৰী কৰা অনুসৰি, নিশাৰ পৰা চলা অভিযানত সমগ্ৰ ৰাজ্যত বাল্যবিবাহ সম্পর্কীয় ৩৪৫ টা গোচৰ পঞ্জীয়ন হৈছে আৰু ৪৩১ জন লোকক গ্ৰেপ্তাৰ কৰা হৈছে। গ্ৰেপ্তাৰ কৰাসকলৰ ভিতৰত বাল্যবিবাহ কৰা স্বামী, পৰিয়ালৰ সদস্য আৰু কাজিও আছে।
অৱশ্যে গুপ্তাই দাবী কৰে যে অসম আৰক্ষীয়ে অব্যাহত ৰখা এই অভিযানৰ ফলস্বৰূপে বাল্যবিবাহৰ মাত্ৰা ৰাজ্যত হ্রাস হৈছে। সেই কাৰণে পূৰ্বৰ তুলনাত গোচৰৰ সংখ্যাও হ্রাস পাইছে। ইয়াৰ পৰিসংখ্যা দাঙি ধৰি গুপ্তাই কয়, ‘২০২৩ৰ ফেব্ৰুৱাৰীত বাল্যবিবাহৰ বিৰুদ্ধে প্রথম অভিযান চলিছিল। সেইবাৰ পঞ্জীয়ন হোৱা গোচৰৰ সংখ্যা আছিল ৪,৩৮৭ টা আৰু গ্ৰেপ্তাৰ হৈছিল ৩,৪২৫ জন লোক। দ্বিতীয় অভিযান চলিছিল যোৱা বছৰৰে অক্টোবৰত। সেইবাৰ গোচৰ পঞ্জীয়ন হৈছিল ৬৮২ টা আৰু গ্ৰেপ্তাৰ হৈছিল ৯১৩ জন লোক। তাৰ বিপৰীতে যোৱা নিশাৰ পৰা চলা অভিযানত পঞ্জীয়ন হোৱা গোচৰ আৰু গ্ৰেপ্তাৰ হোৱা লোকৰ সংখ্যা যথেষ্ট হ্রাস হয়।’
অতিৰিক্ত সঞ্চালক প্রধানজনে লগতে উল্লেখ কৰে যে বাল্যবিবাহ বিৰোধী অভিযানৰ যোগাত্মক প্রভাৱ পৰিছে প্রসূতি আৰু শিশুৰ মৃত্যুৰ হাৰৰ ওপৰত। দুয়োটা শিতানতে মৃত্যুৰ সংখ্যা উল্লেখযোগ্যভাবে অৱনমিত হৈছে। ইয়াৰ তথ্য সদৰী কৰি গুপ্তাই কয় যে ২০২০-২১ত অসমত প্রসূতিৰ মৃত্যুৰ সংখ্যা আছিল ৯৮৪ গৰাকী। ২০২১-২২ত ৭৬৬ গৰাকী, ২০২২-২৩ত সেই সংখ্যা হয় ৫১০ আৰু ২০২৩-২৪ত সেই সংখ্যা ৩৭২ গৰাকীলৈ হ্রাস হয়। একেদৰে ২০২১ত শিশুৰ মৃত্যুৰ সংখ্যা আছিল ৯,৪৭২, ২০২১-২২৩ ৭,৯০৮, ২০২২-২৩ ত সেই সংখ্যা অৱনমিত হয় ৬,৭২১লৈ।
আনহাতে,২০২৩-২৪ত শিশুৰ মৃত্যুৰ সংখ্যা ৪,৭৯০লৈ হ্রাস হয়। আৰক্ষী বিষয়াজনে লগতে সদৰী কৰে যে সাধাৰণতে যিকেইখন জিলাত বাল্যবিবাহৰ মাত্ৰা অধিক, তাতেই এনে ঘটনা লক্ষ্যণীয়ভাবে হ্রাস হৈছে। তেনে জিলাৰ ভিতৰত আছে ধুবুৰী, হোজাই, নগাঁও, দক্ষিণ শালমাৰা-মানকাচৰ, বৰপেটা, বিশ্বনাথ আৰু শদিয়া। আনহাতে, বিশ্বনাথ, যোৰহাট, ডিমা হাছাও, হামৰেণ আৰু গুৱাহাটী মহানগৰত তৃতীয় পৰ্যায়ৰ অভিযান চলোৱাৰ প্ৰয়োজনীয়তাই নহ’ল। কিয়নো এই জিলা কেইখনত নতুনকৈ বাল্যবিবাহ সম্পন্ন হোৱা নাই। গুপ্তাই কয়, ‘অসম চৰকাৰৰ নিৰ্দেশত আৰক্ষীয়ে চলাই থকা অভিযান আৰু
জনসাধাৰণৰ মাজত গঢ়ি উঠা সজাগতাৰ ফলতে বাল্যবিবাহৰ মাত্ৰা ৰাজ্যজুৰি হ্রাস হৈছে।’ গুপ্তাই এইবুলিও লগতে কয় যে প্ৰথম আৰু দ্বিতীয় পৰ্যায়ৰ অভিযানৰ ৫,১৮১ টা গোচৰৰ অভিযোগনামা এই পর্যন্ত দাখিল কৰা হৈছে। ইয়াৰ হাৰ হ’ল ৯৫.২ শতাংশ। ইপিনে, চৰকাৰৰ বাল্যবিবাহ বিৰোধী অভিযান ধাৰাবাহিকভাৱে চলিব বুলি আজি সদৰী কৰে মুখ্যমন্ত্রী ড° হিমন্ত বিশ্ব শর্মাই। তেওঁ লগতে দাবী কৰে যে আগন্তুক ২০২৬ৰ পূৰ্বেই অসম বাল্যবিবাহমুক্ত হ’ব। মুখ্যমন্ত্রীয়ে কয়, ‘আমি এই পর্যন্ত বাল্যবিবাহৰ লগত জড়িতসকলৰ বিৰুদ্ধে তিনিবাৰ অভিযান চলাইছো। আৰক্ষীৰ অভিযানৰ সমান্তৰালকৈ বাল্যবিবাহৰ প্রতি আকর্ষণ আৰু একাংশ লোকৰ সহমতক বাধা দিবলৈ নিযুত মইনাকে ধৰি ছোৱালী শিক্ষাৰ কে’বাখনো আঁচনি ৰূপায়ণ কৰিছো। ইয়াত আমি যিদৰে সঁহাৰি লাভ কৰিছো, তাৰ ফলত অসমত ২০২৬ৰ আগতে বাল্যবিবাহ নির্মূল হ’ব।’