‘ভাৰত ১৯৪৭ চনত স্বাধীন হোৱা নাছিল । অযোধ্যাৰ ৰাম মন্দিৰৰ প্ৰাণ প্ৰতিষ্ঠাৰ দিনটোতহে ভাৰতে প্ৰকৃত স্বাধীনতা দিৱস হিচাপে উদযাপন কৰিব লাগে ।’আৰ এছ এছৰ মুৰব্বী মোহন ভাগৱতৰ এই মন্তব্যৰ পিছতে আক্ৰমণাত্মক হৈ পৰে কংগ্ৰেছৰ নেতা ৰাহুল গান্ধী ।
বুধবাৰে কংগ্ৰেছৰ নতুন মুখ্য কাৰ্যালয় ইন্দিৰা গান্ধী ভৱনৰ উদ্বোধনী অনুষ্ঠানত ভাষণ দি ৰাহুল গান্ধীয়ে কয় যে ভাগৱতৰ এই মন্তব্য ‘দেশদ্ৰোহী’। অন্য দেশ হোৱা হ’লে তেওঁক গ্ৰেপ্তাৰ কৰা হ’লহেতেন । মোহন ভাগৱতৰ এই মন্তব্যৰ বাবে বিচাৰ কৰা হ’লহেতেন।
গান্ধীয়ে লগতে কয়, “আমি এটা নিৰ্দিষ্ট সময়ত এটা নতুন মুখ্য কাৰ্যালয় লাভ কৰিছো। ভাগৱতে কয় যে, সংবিধান আমাৰ স্বাধীনতাৰ প্ৰতীক নাছিল। মোহন ভাগৱতে স্বাধীনতা আন্দোলনৰ বিষয়ে কি ভাবে, সংবিধানৰ বিষয়ে কি ভাবে সেয়া প্ৰতি দুই বা তিনি দিনৰ ভিতৰত দেশবাসীক জনোৱাৰ ধৃষ্টতা কৰিছে । তেওঁ যি কৈছে সেয়া দেশদ্ৰোহী, এই সংবিধান অবৈধ, তেওঁ কৈছে যে ব্ৰিটিছৰ বিৰুদ্ধে যুঁজিবলৈ কৰা সকলোবোৰ অবৈধ আছিল আৰু তেওঁ এইটো ৰাজহুৱাভাৱে কোৱাৰ ধৃষ্টতা কৰিছে ।”
লোকসভাৰ বিৰোধী দলপতিগৰাকীয়ে লগতে উল্লেখ কৰে যে, ‘১৯৪৭ চনত ভাৰতে স্বাধীনতা লাভ কৰা নাছিল বুলি কোৱাটো প্ৰতিজন ভাৰতীয়ৰ বাবে অপমান । আমাৰ এতিয়া এই টুলুঙা কথা শুনাৰ সময় বন্ধ হ’ব লাগে । এওঁলোকে কেৱল ভাটৌৰ দৰে কথা ক’বলৈ জানে আৰু টুলুঙা কথা চিঞৰি চিঞৰি কব পাৰে ।’
সোমবাৰে মোহন ভাগৱতে ইন্দোৰত এক সমাৱেশক সম্বোধন কৰি তেওঁ কয় যে, “অযোধ্যাত ৰাম মন্দিৰ প্ৰাণ প্ৰতিষ্ঠাৰ দিনটো “প্ৰতিষ্ঠা দ্বাদাশী” হিচাপে উদযাপন কৰা উচিত কিয়নো এই দিনটোক ভাৰতৰ “প্ৰকৃত স্বাধীনতাৰ” দিন হিচাপে চিহ্নিত কৰা হয়। শতিকা ধৰি শত্ৰুৰ আক্ৰমণৰ সন্মুখীন হোৱা ভাৰতে সেইদিনা ইয়াৰ প্ৰকৃত স্বাধীনতা প্ৰত্যক্ষ কৰিছিল। আমাৰ স্বাধীনতা আছিল, কিন্তু ইয়াক প্ৰতিষ্ঠা কৰা হোৱা নাছিল। ১৯৪৭ চনৰ ১৫ আগষ্টত ভাৰতে ৰাজনৈতিক স্বাধীনতা লাভ কৰিছিল, আমি এখন সংবিধানো আনিছিলো । কিন্তু দেশখন ইয়াৰ চেতনাৰে চলা নাছিল। আমি কেনেকৈ স্বীকাৰ কৰিব পাৰোঁ যে, দেশবাসীৰ সপোন পূৰণ হৈছে? আমাৰ স্ব(আত্ম) হৈছে ৰাম, কৃষ্ণ আৰু শিৱ। তেওঁলোক কেৱল উপাসনা কৰা ভক্তসকলৰ বাবে নহয় । ৰামে উত্তৰৰ পৰা দক্ষিণলৈ, কৃষ্ণক পূবৰ পৰা পশ্চিমলৈ আৰু শিৱ ভাৰতৰ প্ৰতিটো চুকে-কোনে সংযোগ কৰে।”