‘নিম্ন আদালতত অভিযুক্ত এজন দোষী সাব্যস্ত হ’লেও, তেওঁৰ উচ্চতম ন্যায়ালয়ত আবেদন কৰাৰ অধিকাৰ আছে । তেওঁলোকে উচ্চ ন্যায়ালয়ৰ দ্বাৰস্থ হ’বলৈ মন মেলিছে । সঞ্জয় ৰয়ক ‘নিৰ্দোষ সাব্যস্ত’ কৰিবলৈ ন্যায়ালয়ৰ দ্বাৰস্থ হ’ব । অৱশ্যে এই আবেদনৰ বাবে পৰিকল্পনা কৰিবলৈ কিছু সময় লাগিব ।’নাগৰিক স্বেচ্ছাসেৱকৰ অধিবক্তা সেঁজুতি চক্ৰৱৰ্তীয়ে এই কথা জানিবলৈ দিয়ে ।
সোমবাৰে কলকাতাৰ শিয়ালদহ আদালতে আৰজি কৰ মেডিকেল কলেজ এণ্ড হাস্পতালৰ অভিযুক্ত সঞ্জয় ৰয় (৩৪)ক দোষী সাব্যস্ত কৰি যাৱজ্জীৱন কাৰাদণ্ডৰ শাস্তি বিহে । ইয়াৰ পিছতে আদালতে উল্লেখ কৰে যে, এই গোচৰটো মৃত্যুদণ্ডৰ বাবে ‘বিৰলতম’ শ্ৰেণীত পৰা নাই ।
ন্যায়াধীশ অনিৰ্বাণ দাসে সোমবাৰে সঞ্জয়ক শাস্তিৰ ঘোষণা কৰিছিল। সঞ্জয়ৰ অধিবক্তা সেঁজুতিয়ে কয়, ‘মই উচ্চ ন্যায়ালয়ৰ কাষ চাপিম। এয়া সঞ্জয়ৰ ওপৰত ‘অত্যাচাৰ’ । আমি সঞ্জয়ক ভুক্তভোগী বুলি বিবেচনা কৰো। মই উচ্চ ন্যায়ালয়ৰ দ্বাৰস্থ হম । এয়া আমাৰ অধিকাৰ। মই তেওঁক নিৰ্দোষী সাব্যস্ত কৰিম।’
সেঁজুতি চক্ৰৱৰ্তীয়ে লগতে কয় যে, ‘আমি দাখিল কৰা প্ৰতিবেদনত দোষীক মৃত্যুদণ্ড দিয়া পৰিস্থিতিৰ বিৱৰণ দিয়া দিছিল। এই ক্ষেত্ৰত, তিনিটা পৰিস্থিতিৰ ওপৰত আলোকপাত কৰা হৈছে। প্ৰথমটো হৈছে , য’ত সকলো বিকল্প পথ বন্ধ হয় তেতিয়াহে এগৰাকী অভিযুক্তক মৃত্যুদণ্ড বিহিব পাৰি । অৰ্থাৎ কাৰাগাৰৰ শাস্তি পোৱাৰ পাছতো, যদি কাৰোবাক বিপদজনক বুলি গণ্য কৰা হয়, তেন্তে তেওঁক ফাঁচী দিয়া হয়। দ্বিতীয়তে, আদালতে দেখুওৱাব লাগিব যে অভিযুক্তটো সংশোধনৰ উৰ্ধত, অৰ্থাৎ তেওঁৰ সংশোধন হোৱাৰ কোনো লক্ষণ নাই । লগতে আদালতে এই ৰায় দিয়াৰ পূৰ্বেও কিয় এইদৰে কোৱা হৈছে সেয়া দেখুৱাব লাগিব । তৃতীয়তে, কিছুমান এনে বিষয় আছে যিবোৰ বিচাৰৰ পিছতো বাকী থাকে। আনকি প্ৰমাণ কৰাৰ পাছতো, কিছু সত্য লুকাই থাকে।’