Six Mile flyover in dangerous condition:
অতি বিপজ্জনক হৈ পৰিছে মহানগৰীৰ ছয়মাইলস্থিত উৰণ সেতুখন। নিৰ্মাণৰ বিসংগতিৰ বাবে সৃষ্টি হোৱা এই পৰিস্থিতিত আনকি যিকোনো মুহূর্তত ভয়াৱহ দুর্ঘটনা সংঘটিত হোৱাৰো আশংকা বৃদ্ধি হৈছে সেতুখনত।
বিগত ২০০৯ত ছিমপ্লেক্স নামৰ এটা প্রতিষ্ঠানে নিৰ্মাণ কৰা সেতুখনৰ নানান বিসংগতি যোৱা প্ৰায় চাৰি বছৰৰ পৰা বৃদ্ধি হয়। বিশেষকৈ ৰুক্মিণীগাঁৱৰ দিশৰ পৰা উঠি যোৱা অংশটোক কেন্দ্ৰ কৰি বিসংগতি সৃষ্টি হোৱা তথা বিপজ্জনক পৰিস্থিতিৰ উদ্ভৱ হৈ আহিছে। যানবাহনৰ চলাচল সঘনে সেতুখনৰ ওপৰত নিয়ন্ত্ৰণ কৰা হৈছে।
ৰাজ্যৰ লোকনিৰ্মাণ বিভাগৰ জ্যেষ্ঠ অভিযন্তাৰ সূত্ৰই সদৰী কৰা অনুসৰি, উৰণ সেতুখনৰ দুই আৰু চাৰি নম্বৰ খুটা দুটাত দিন অতিবাহিত হোৱাৰ লগে লগে বিসংগতিও অধিক গুৰুতৰ হৈছে। তাক দূৰ কৰাৰ বাবে সঘনে মেৰামতিও কৰি থকা হৈছে। আনকি সেতুখনৰ ওপৰতে অহা-যোৱা দুয়োদিশে কাঠৰ দলং সাজিও যাতায়াত অব্যাহত ৰাখিবলগীয়া পৰিস্থিতিৰ সৃষ্টি হৈছে ৷
অৱশ্যে ইয়াৰ বাবে নক্সাৰ বহু সাল-সলনিৰ প্ৰয়োজন হোৱাৰ লগতে ব্যয়ো যথেষ্ট বৃদ্ধি পাব। সেয়েহে এই বিকল্প ব্যৱস্থাটোক সম্প্রতি একাষৰীয়া কৰি থৈ সেতুখনৰ চাৰি নম্বৰ খুটাটোত ধৰা পৰা বিসংগতি তলৰ পৰাই দূৰ কৰাৰ পৰিকল্পনা কৰা হৈছে।
উৰণ সেতুখনৰ অৱস্থাক লৈ গভীৰ উদ্বিগ্নতা প্রকাশ কৰে বিশেষজ্ঞ অভিযন্তা জে এন খাটনিয়াৰে। তেওঁ কয়, ‘মই যি অৱস্থাত সেতুখনৰ এটা অংশ দেখিছো, সেয়া অতি বিপজ্জনক অৱস্থাত আছে। মই বহু ফাট প্রত্যক্ষ কৰিছো। কংক্রিট এনে নহয় যে জোৰা-টাপলিৰে বিসংগতিবোৰ আঁতৰ কৰিব পৰা যাব। গতিকে আগন্তুক দিনত দলংখন কিদৰে স্বাভাৱিক কৰি ৰাখিব পৰা যাব, সেয়া লক্ষ্যণীয় হ’ব। এই দলংখন অত্যন্ত গুৰুত্বপূৰ্ণ। যথেষ্ট ওজন দলংখনে বহন কৰিব লাগে। গতিকে সেই মতে ব্যৱস্থা ল’ব লাগিব।’
ইপিনে, কৃষক মুক্তি সংগ্ৰাম সমিতিয়ে উৰণ সেতুখনৰ দুৰৱস্থাৰ বাবে উচ্চ পৰ্যায়ৰ তদন্ত দাবী কৰে। সংগঠনটোৱে এক সংবাদমেলত বিষয়টোত গভীৰ উদ্বেগ প্রকাশ কৰি কয় যে এখন উৰণ সেতু ন্যূনতম ৫০ বছৰ ভালদৰে চলিব লাগে। ইয়াৰ বিপৰীতে ১৪ বছৰ নৌহওঁতেই ছয়মাইলৰ উৰণ সেতুখনৰ দুৰৱস্থা গভীৰ উদ্বেগৰ বিষয় হৈ পৰিছে। সংগঠনটোৰ সাধাৰণ সম্পাদক বিতু সোণোৱালে কয়, ‘সেতুখন বাৰে বাৰে মেৰামতি কৰি থকা হৈছে। মেৰামতিৰ কাম কৰে গৌতম কনষ্ট্ৰাকছনে। ইয়াৰ দ্বাৰা ৰাজ্যৰ ৰাজহৰ অপব্যয় হৈছে।
২০০৯ত সেতুখন নিৰ্মাণৰ সময়ত ইয়াৰ দায়িত্বত আছিল অভিযন্তা তথা বর্তমান লোকনির্মাণ বিভাগৰ বিশেষ সচিব দিব্যজ্যোতি চহৰীয়া। তেওঁ কি অভিযান্ত্রিক কাম কৰিছিল যে মাত্রা এইকেইটা দিনৰ ভিতৰতে সেতুখন ইমান বিপজ্জনক হৈ পৰিছে। সেতু নিৰ্মাণৰ নামত বৃহৎ মুনাফাৰ অংক কৰা হৈছিল বুলি আমি আজি ভাবিবলৈ বাধ্য হৈছো। চৰকাৰে সেতুখনৰ দুৰৱস্থাক লৈ তদন্ত কৰাৰ লগতে দিব্যজ্যোতি চহৰীয়াকো সেই তদন্তৰ আওতালৈ আনিব লাগে ৷