Dilip Saikia:
কংগ্ৰেছ দলৰ নেতাসকলে বিভিন্ন সময়ত ৰাষ্ট্রীয় নিৰাপত্তাৰ প্রশ্ন জড়িত থকা বহু বিষয়ত বিতর্কিত স্থিতি গ্রহণেৰে দেশবাসীৰ সন্মুখত নিজৰ প্ৰকৃত স্বৰূপ উদঙাই দিয়া কার্য্য নতুন নহয়। ইয়াৰে ধাৰাবাহিকতা অব্যাহত ৰাখি শেহতীয়াকৈ কংগ্ৰেছ দলৰ লোকসভাৰ উপ-দলপতি সাংসদ গৌৰৱ গগৈয়ে নিজৰ আৰু নিজ পত্নীৰ ওপৰত উত্থাপিত গুৰুতৰ অভিযোগৰ উত্তৰত অত্যন্ত তৰল মন্তব্য প্রকাশ কৰি দেশৰ জনতাক ভেঙুচালিহে কৰা পৰিলক্ষিত হৈছে।
আনকি আজি বিষয়টো স্পষ্টীকৰণৰ নামত গৌৰৱ গগৈয়ে প্রকাশ কৰা বক্তব্যত উত্থাপিত অভিযোগৰ মূল বিষয়বস্তু সন্দর্ভত একোবেই নাই। ইয়াৰ যোগেদি গগৈয়ে এগৰাকী জনপ্রতিনিধি হিচাবে দায়িত্ববোধ অৰু বিশ্বাসযোগ্যতাৰ প্রশ্নত নিজকে চূড়ান্ত সন্দেহৰ আবর্তলৈ লৈ গৈছে”- এই বক্তব্য ভাৰতীয় জনতা পার্টি অসম প্রদেশৰ সভাপতি দিলীপ শইকীয়াৰ।
বিষয়টোৰ সন্দর্ভত প্রকাশিত এটা বিবৃতিত সভাপতি শইকীয়াই কয় যে গৌৰৱ গগৈৰ পত্নী এলিজাবেথ ক’লবাৰ্ণৰ চৰম ভাৰতবিদ্বেশী জর্জ ছ’বছৰ সৈতে সম্পর্ক বা পাকিস্তানী চোৰাংচোৱা সংস্থাৰ সৈতে সম্পৰ্কৰ বিষয়েই হওঁক, পাকিস্তানৰ উচ্চাযুক্তৰ সৈতে গৌৰৱ গগৈৰ বৈঠকৰ পিচতে দেশৰ ৰাষ্ট্ৰীয় নিৰাপত্তা, পাৰমাণৱিক খণ্ডৰ দৰে সংবেদনশীল বিষয়ত সংসদত প্রশ্ন উত্থাপনৰ বিষয়েই হওঁক- কংগ্ৰেছ দলৰ নেতৃত্ব বা গৌৰৱ গগৈয়ে ভৱা ধৰণে উলাই কৰিব পৰা বিষয় নহয়। ই ৰাষ্ট্ৰীয় নিৰাপত্তাৰ লগত জড়িত অত্যন্ত গুৰুতৰ আৰু প্ৰাসংগিক প্রশ্ন।
সততে সৰলতাৰ মুখা পিন্ধি দেশ তথা ৰাজ্যখনৰ জনগণক আভুৱা ভাৰিব বিচৰা কংগ্ৰেছ নেতাগৰাকীৰ প্ৰকৃত চৰিত্ৰ এই কাৰ্য্যই উন্মোচিত কৰিছে বুলি বিজেপিৰ সভাপতি গৰাকীয়ে মন্তব্য কৰে। নিজকে অসম তথা উত্তৰ-পূৱৰ জনতাৰ প্ৰতি সমর্পিত ধাৰণা সৃষ্টি কৰিব বিচৰা গৌৰৱ গগৈয়ে কংগ্ৰেছৰ প্ৰৱাসী নেতা চেম পেট্রোদাই উত্তৰ-পূৰ্বাঞ্চলৰ জনগণকলৈ কৰা চৰম বৰ্ণবাদী মন্তব্যৰ সময়ত নিমাতী কইনাৰ ভাওঁ লোৱা বিষয়টো অসম তথা উত্তৰ-পূৱৰ জনসাধাৰণে পাহৰা নাই বুলি শইকীয়াই প্রকাশ কৰে।
আকৌ বিবাহৰ ১২ বছৰ পিছতো কংগ্ৰেছ নেতা গৌৰৱ গগৈৰ বিদেশী পত্নীয়ে ভাৰতবৰ্ষৰ নাগৰিকত্ব নোলোৱাৰ আৰত থকা বিষয়ো আজি দেশৰ জনসাধাৰণৰ মাজত সংবেদনশীল প্রশ্ন হিচাবে বিবেচিত হৈছে। আকৌ আজি বিষয়টোৰ স্পষ্টীকৰণৰ নামত গৌৰৱ গগৈয়ে একাংশ বিশিষ্ট ব্যক্তিক অপ্রাসংগিকভাৱে জড়িত কৰি নিজকে ধোৱা তুলসীৰ পাত হিচাপে প্রতিপন্ন কৰিব বিচৰা কাৰ্য্য গৰিহণাৰ যোগ্য। চিৰাচৰিত ধৰণে কংগ্ৰেছ দল তথা গৌৰৱ গগৈয়ে অভিযোগৰ মূল বিষয়বস্তুৰ পৰা পলায়ন কৰা কাৰ্য্যই তেখেতসকলৰ ষড়যন্ত্রমূলক কাম কাজকেই প্রতিপন্ন কৰিছে বুলি ৰাজ্যিক বিজেপি সভাপতিয়ে মত পোষণ কৰে।
