Budget session at BTC Legislative Assembly Bhawan :
অসম বিধানসভাৰ বাজেট অধিবেশন উপলক্ষে গুৱাহাটীৰ পৰা চার্টার্ড বাছযোগে কোকৰাঝাৰলৈ ৰাওনা হ’ব মুখ্যমন্ত্ৰী আৰু মন্ত্রী-বিধায়কসকল
প্রথমবাৰৰ বাবে অহা ১৭ ফেব্ৰুৱাৰীৰ পৰা অনুষ্ঠিত হ’বলগীয়া অসম বিধানসভাৰ বাজেট অধিবেশনৰ প্ৰথম দিনৰ কাৰ্যসূচী কোকৰাঝাৰস্থিত বিটিচি পৰিষদীয় ভৱনত অনুষ্ঠিত হ’ব লগাক লৈ উচ্ছ্বসিত হৈছে বিটিচি মুৰব্বী প্রমোদ বড়ো।
ইতিমধ্যে এই অধিবেশন উপলক্ষে প্রশাসনে সমগ্ৰ কোকৰাঝাৰ নগৰ নতুনকৈ সজাই-পৰাই তুলিছে। অধিবেশনৰ প্ৰস্তুতিৰ বুজ লৈ বিটিচিৰ মুৰব্বী বড়োৱে সাংবাদিকৰ আগত কয়, ‘অহা ১৭ ফেব্ৰুৱাৰীৰ দিনটো আমাৰ বাবে ঐতিহাসিক দিন হ’ব। অসম বিধানসভাই সদায়ে ৰাজ্যৰ উন্নয়নৰ হকে সিদ্ধান্ত গ্রহণ কৰি আহিছে। বৰ্তমানৰ মুখ্যমন্ত্রী ড: হিমন্ত বিশ্ব শর্মাই স্থায়ী শান্তি-সমন্বয়ৰ লগতে ৰাজ্যৰ চুকে-কোণে উন্নয়নৰ বাবেও কাম কৰিছে।’
নৰেন্দ্ৰ মোদী চৰকাৰৰ ‘বিকশিত ভাৰত’ নির্মাণ প্রক্রিয়াত ইতিমধ্যে অসম চামিল হৈছে বুলিও তেওঁ মন্তব্য কৰে। লগতে তেওঁ আশা প্রকাশ কৰে যে ‘এডভান্টেজ অসম’ বিনিয়োগ সম্মিলন আয়োজনৰ মুখ্যমন্ত্ৰীৰ উদ্দেশ্য সফল হ’ব।
আনহাতে, অসম বিধানসভাৰ আগন্তুক বাজেট অধিবেশনৰ প্ৰথম দিনাৰ কাৰ্যসূচী ৰাজ্যপাল লক্ষ্মণ প্ৰসাদ আচাৰ্যৰ ভাষণৰে আৰম্ভ হ’ব। এই অধিবেশন উপলক্ষে ৰাজ্যপাল আচাৰ্যই বন্দে ভাৰত ৰেলত উঠি কোকৰাঝাৰত উপস্থিত হ’ব বুলি সূত্ৰই প্ৰকাশ কৰিছে।
পিছদিনা তেওঁ বড়োলেণ্ড বিশ্ববিদ্যালয়ৰ অভিৱৰ্তনত অংশ ল’ব। তদুপৰি তেওঁ কেন্দ্ৰীয় প্রযুক্তিবিদ্যা প্রতিষ্ঠান (চিআইটি) কোকৰাঝাৰৰ এক অনুষ্ঠানতো অংশগ্ৰহণ কৰাৰ কথা। তেওঁ চৰাইখোলাস্থিত অতিথিশালাত দুনিশা কটাব। বাজেট অধিবেশনলৈ ৰাজ্যপালক অসম বিধানসভাৰ অধ্যক্ষ বিশ্বজিৎ দৈমাৰী, বিটিচি বিধান পৰিষদৰ অধ্যক্ষ কাতিৰাম বড়ো, বিটিচিৰ মুখ্য কাৰ্যবাহী সদস্য প্রমোদ বড়ো আদিয়ে আদৰি নিব।
আনহাতে, বাজেট অধিবেশনত অংশগ্ৰহণৰ উদ্দেশ্যে মুখ্যমন্ত্ৰী আৰু আন মন্ত্রী-বিধায়কসকলে ১৭ ফেব্ৰুৱাৰীৰ পুৱা গুৱাহাটীৰ পৰা চার্টার্ড বাছযোগে কোকৰাঝাৰলৈ ৰাওনা হ’ব। যাত্রাপথত বজালীত তেওঁলোকে পুৱাৰ আহাৰ গ্ৰহণ কৰি বিটিচি বিধান পৰিষদীয় ভৱনত দিনৰ ১১ বজাত উপস্থিত হোৱাৰ সম্ভাৱনা আছে। বাজেট অধিবেশন উক্ত দিনা ১১-৪৫ বজাৰ পৰা আৰম্ভহ’ব। এই অধিবেশন উপলক্ষে বিধান পৰিষদীয় ভৱনত ১২৬ খন আসন সাজু কৰা হৈছে।
বিটিচিৰ কাৰ্যবাহী সদস্য তথা সদস্যসকলে গেলাৰীৰ বাওঁফালৰ আসনত বহি অধিবেশনৰ কাৰ্যক্ৰমণিকা চাব পাৰিব। আনহাতে, সাংবাদিকসকলৰ বাবে গেলাৰীৰ সোঁফালৰ আসনৰ ব্যৱস্থা কৰা হৈছে। অধিবেশনৰ কাৰ্যসূচী উপভোগ কৰিবলৈ বিভিন্ন দল-সংগঠনৰ নেতৃত্বকো আমন্ত্রণ জনোৱা হৈছে। তেওঁলোকে অস্থায়ীভাৱে নিৰ্মাণ কৰা সভাস্থলীত ডাঙৰ পৰ্দাত অধিবেশনৰ পোনপটীয়া সম্প্ৰচাৰ চাব পাৰিব। বর্তমানে পৰিষদীয় ভৱনৰ পাৰ্কিঙৰ স্থানত অস্থায়ী ৰভাৰ ব্যৱস্থা কৰি সেই সুবিধা মুকলি কৰা হৈছে।
আনহাতে, বিটিচি সচিবালয়ৰ প্ৰাংগণত নিৰ্মাণ কৰা অস্থায়ী মণ্ডপত মন্ত্রী-বিধায়কসকলৰ বাবে ভোজনৰ ব্যৱস্থা কৰা হৈছে। উক্ত দিনা সুষম আহাৰ তথা পৰম্পৰাগত খাদ্য পৰিবেশন কৰা হ’ব বুলি সূত্রই প্রকাশ কৰিছে।