Myanmar:
চৰম দৰিদ্ৰতাৰে যুঁজ দি দিশহাৰা হৈছে ম্যানমাৰৰ অর্ধেক লোক। সম্প্রতি দেশখনৰ এক বৃহৎসংখ্যক লোকে জীয়াই থকাৰ তাড়নাত নিজৰ বৃক্ক পর্যন্ত বিক্ৰী কৰিছে। এই তথ্য পোহৰলৈ আহিছে বিবিচিৰ এক প্রতিবেদনত। প্রতিবেদনখনত প্ৰকাশ কৰা অনুসৰি, সম্প্ৰতি ৰাজনৈতিক অস্থিৰতা আৰু বিদ্ৰোহী সমস্যাই জোঁকাৰি থকা দেশখনৰ বহু লোক নতুনকৈ দৰিদ্ৰতাৰ কবলত পৰিছে।
২০২১ত দেশখন পুনৰ সামৰিক শাসনৰ কবললৈ যোৱাৰ পৰা পৰিস্থিতি অধিক শোচনীয় হয়। আনকি এটা বছৰ অৰ্থাৎ ২০২২ৰ পৰা ২০২৩ৰ সময়ছোৱাত দেশখনৰ দৰিদ্ৰতাৰ হাৰ চাৰি শতাংশ বৃদ্ধি পায়। ২০২২ত দেশখনৰ দৰিদ্ৰতাৰ হাৰ ৪৬ শতাংশ আছিল ৷ ইয়াৰ পাছৰ বছৰ এই হাৰ ৫০ শতাংশ হয়। আনহাতে, ২০১৭ত দেশখনত বিত্তীয় দিশত অসুৰক্ষিত ৩৩ শতাংশ লোক আছিল যদিও দৰিদ্ৰ লোক নাছিল।
পিছে ২০২২ ত দেশখনত দৰিদ্ৰ লোকৰ হাৰ ৪৬ শতাংশ হয়। লক্ষ্যণীয়ভাৱে ২০১৭ত দেশখনত ৪২ শতাংশ বিত্তীয়ভাৱে সুৰক্ষিত লোক আছিল যদিও তেওঁলোকৰো বহু লোক দৰিদ্ৰতাৰ কবলত পৰে। ইপিনে, প্রচণ্ড দৰিদ্ৰতাৰ কবলত পৰি একমাত্ৰ জীয়াই থকাৰ তাড়নাত বহু লোকে নিজৰ বৃক্ক বিক্ৰী কৰিছে । ইয়াৰে একাংশই ভাৰতলৈ আহিও বৃক্ক বিক্ৰী কৰা বুলি বিবিচিৰ প্রতিবেদনখনত প্ৰকাশ পাইছে।
তথ্য অনুসৰি দেশখন পুনৰ সামৰিক শাসনৰ তললৈ যোৱাৰ পাছৰ পৰা নিবনুৱা সমস্যায়ো ভয়াৱহ ৰূপ লয় ।