Pakistan : পাকিস্তানী সেনাৰ গুলীত নিহত সীমান্তৰক্ষী বাহিনীৰ (বিএছএফ)ৰ জোৱান মহম্মদ ইমতিয়াজৰ মৃতদেহ বিহাৰলৈ ঘূৰাই অনা হৈছে।
সোমবাৰে পাটনা বিমানবন্দৰ হৈ পতাকা মেৰিয়াই অনা মৃতদেহক শেষ শ্ৰদ্ধা জনোৱা হয়। নিহত জোৱানজনক ৰাজ্যিক সন্মান জনোৱা হয়।
পাছত জোৱানজনৰ মৃতদেহ তাৰ পৰা সাৰণ জিলাৰ নাৰায়ণপুৰ গাঁৱলৈ লৈ যোৱা হয়। ইমতিয়াজৰ শেষ অনুষ্ঠান তাতেই হোৱাৰ কথা। সোমবাৰে বিমানবন্দৰত জোৱানজনৰ পুত্ৰ ইমৰাণ ৰাজাই কয় ,”মই মোৰ দেউতাকক লৈ গৌৰৱান্বিত। দেশৰ বাবে প্ৰাণ দিয়া সকলোকে প্ৰণাম জনাইছো।”
যোৱা শনিবাৰে যুদ্ধবিৰতি ঘোষণা কৰাৰ পূৰ্বে জম্মু-কাশ্মীৰৰ আৰ এছ পুৰা ছেক্টৰত আন্তঃৰাষ্ট্ৰীয় সীমান্তত পাকিস্তানী সেনাই গুলীচালনা আৰম্ভ কৰিছিল। সেই সময়ত পাকিস্তানী বাহিনীৰ গুলীত আহত হৈছিল বি এছ এফৰ আঠ জন জোৱান।
লগে লগে আহতসকলক চিকিৎসালয়লৈ লৈ যোৱা হয়। পিছদিনা নিশা চিকিৎসালয়ত চিকিৎসাধীন হৈ থকা অৱস্থাত ইমতিয়াজৰ মৃত্যু হয়। তেওঁ সীমান্তৰক্ষী বাহিনীত উপ-পৰিদৰ্শক হিচাপে কৰ্মৰত আছিল।
মৃত জোৱানৰ পুত্ৰই কয়, “মোৰ দেউতা অতি সাহসী আছিল। আমি শেষবাৰৰ বাবে শনিবাৰে পুৱা প্ৰায় পাঁচ বাজি ৩০ মিনিটত কথা পাতিছিলো। তেওঁৰ সোঁ ভৰিত আঘাত পাইছিল।”
সোমবাৰে পুৱা পাটনা বিমানবন্দৰত বিভিন্ন দলৰ ৰাজনীতিবিদ উপস্থিত হৈ শেষ শ্ৰদ্ধাঞ্জলি জনায়। বিহাৰ বিজেপিৰ সভাপতি দিলীপ জয়ছৱাল আৰু বিহাৰ বিধানসভাৰ বিৰোধী দলপতি তেজস্বী যাদৱ তাত উপস্থিত থাকে।
ইমতিয়াজৰ মৃতদেহ লৈ গাঁৱৰ ঘৰলৈ উভতি অহাৰ পূৰ্বে ইমৰানে কয় যে, “পাকিস্তানক উচিত শিক্ষা দিয়া উচিত । আমাৰ চৰকাৰে ইমানেই শক্তিশালী সঁহাৰি দিব লাগে যে আন কোনো শিশুৱে নিজৰ পিতৃ হেৰুৱাব নালাগে।”