Assam Cabinet:
৮ ছেপ্টেম্বৰত অসমলৈ আহিব দেশৰ প্ৰধানমন্ত্ৰী নৰেন্দ্ৰ মোদী ৷ সুধাকণ্ঠৰ জন্ম শতবাৰ্ষিকীত অংশ গ্ৰহণৰ বাবেই অসমলৈ আহিব প্ৰধানমন্ত্ৰী গৰাকী ৷ ৯ ছেপ্তেম্বৰত অনুষ্ঠিত হ’ব অসম বিধান সভাৰ বিশেষ অধিৱেশন ৷ অধিৱেশনত সুধাকণ্ঠৰ সৃষ্টিৰাজীৰ ওপৰত আলোচনা হ’ব ৷ এই অধিৱেশনতে ডিব্ৰুগড় বিমানবন্দৰ নাম ড:ভূপেন হাজৰিকাৰ নামেৰে নামাকৰণৰ সন্দৰ্ভত সিদ্ধান্ত ল’ব সদনে ৷
শুক্ৰবাৰে দিছপুৰস্থ জনতা ভৱনৰ লোকসেৱা ভৱনত মুখ্যমন্ত্ৰী ড:হিমন্ত বিশ্ব শৰ্মাৰ পৌৰোহিত্যত অনুষ্ঠিত হোৱা কেবিনেটত উল্লিখিত সিদ্ধান্ত লোৱা হয় বুলি এক সংবাদমেল সদৰি কৰে শিক্ষামন্ত্ৰী ডা:ৰণোজ পেগুৱে ৷ ডা:পেগুৱে আৰু কয় যে আই চি ডিৰ অধীনত নিযুক্ত পোৱা ঠিকাভিত্তিক শিক্ষক সকলে পূৰ্বতে পাই থকা ১৪ হাজাৰৰ পৰা ২০ হাজাৰ টকালৈ বৃদ্ধি কৰা হ’ব তেওঁলোকৰ দৰমহা ৷ লগতে তেওঁলোকে লাভ কৰিব আপোন ঘৰ আৰু আপোন বাহন আঁচনিৰ সুবিধা।ইতিমধ্যে বাজেটত ঘোষণা কৰা এই সিদ্ধান্তক আজি অনুমোদন জনায় কেবিনেটে ৷
আনহাতে সংবাদমেলত উপস্থিত থকা পঞ্চায়ত আৰু গ্ৰামোন্নয়ন মন্ত্ৰী ৰনজিৎ কুমাৰ দাসে পঞ্চায়ত গঠন সন্দৰ্ভত ৰাজ্যিক কেবিনেটৰ অনুমোদন সন্দৰ্ভত কয়, ২১ জুনৰ পৰা ১০ জুলাইৰ ভিতৰত গঠন হ’ব ২১৯২ খন গাঁও পঞ্চায়ত। এই সময়ছোৱাৰ ভিতৰত পঞ্চায়তৰ সভাপতি- উপ-সভাপতি নিৰ্বাচনৰ বাবে জিলা আয়ুক্ত সকলে নিৰ্দেশনা জাৰি কৰি একোজনকৈ বিষয়াক দায়িত্ব দিব ৷ অনুৰূপ ধৰনে ১১ জুলাইৰ পৰা ২০ জুলাইৰ ভিতৰত ১৮১ খন আঞ্চলিক পঞ্চায়তৰ সভাপতি- উপ- সভাপতি নিৰ্বাচিত কৰাৰ বাবেও জিলা আয়ুক্তই নিয়োজিত কৰিব একোজনকৈ চৰকাৰী বিষয়া ৷
আনহাতে ২১ জুলাইৰ পৰা ৩০ জুলাইৰ ভিতৰত গঠন কৰা হ’ব ২৭ খন জিলা পৰিষদ। জিলা পৰিষদৰ সভাপতি- উপ- সভাপতিৰ বাবেও জিলা আয়ুক্তই নিয়োজিত কৰা বিষয়াৰ উপস্থিতিত অনুষ্ঠিত বৈঠকত সদস্য সকলে নিৰ্বাচিত কৰিব সভাপতি- উপ- সভাপতি ৷ গাওঁ পঞ্চায়ত,আঞ্চলিক পঞ্চায়ত আৰু জিলা পৰিষদ গঠনৰ অন্তত নৱ নিৰ্বাচিত সদস সকলে শপত ল’ব বুলি উল্লেখ কৰে মন্ত্ৰী দাসে ৷