Indo-Bangla Border Police-Intelligence activities:
জম্মু-কাশ্মীৰক লৈ পাকিস্তানৰ তৎপৰতা অব্যাহত থকাৰ সময়তে চুবুৰীয়া দেশখনে এইবাৰ অসমক লৈ আন এক যড়যন্ত্র আৰম্ভ কৰিছে। তাব বাবে বাংলাদেশক ঢালৰূপে লোৱা হৈছে। বাংলাদেশৰ অন্তৱৰ্তী চৰকাৰৰ মুখ্য উপদেষ্টা ড° মহম্মদ ইউনুছে সমগ্ৰ উত্তৰ-পূৰ্বাঞ্চলক ভাৰতৰ পৰা বিচ্ছিন্ন কৰাৰ বার্তা বিভিন্ন ধৰণে দি আহিছে। একে সময়তে বাংলাদেশৰ ভূমিৰ পৰা অসমত অস্থিৰতা সৃষ্টিৰ আন এক গোপন তৎপৰতাৰ তথ্য শেহতীয়াকৈ চোৰাংচোৱা সংস্থাসমূহে উদ্ধাৰ কৰিছে। ইয়াত ভূমিকা লৈছে পাকিস্তানে।
চোৰাংচোৱাৰ তথ্য অনুসৰি, পাকিস্তানে বাংলাদেশত অস্থিৰতা বৃদ্ধি কৰিব বিচাৰিছে, তাৰ প্ৰভাৱ স্বাভাৱিকতে অসমত সৰ্বাধিক পৰিব। ধাৰণা কৰা হৈছে যে জম্মু-কাশ্মীৰত সফল নহৈ তাৰ বিকল্প হিচাপে পাকিস্তানে বাংলাদেশক লক্ষ্য কৰি লৈছে আৰু সেই বাংলাদেশৰ জৰিয়তে ভাৰতক অস্থিৰ কৰিব বিচৰা হৈছে। ভাৰতক অস্থিৰ কৰাৰ ক্ষেত্ৰ হিচাপে লোৱা হৈছে অসমক।
কাৰণ অসমক সহজ লক্ষ্য হিচাপে বাংলাদেশৰ ভাৰত বিৰোধী চক্রসমূহে সদায় গণ্য কৰি আহিছে। চোৰাংচোৱাৰ এনে তথ্যৰ ভিত্তিতে বিগত দুই-তিনিদিনৰ পৰা অসমৰ বাংলাদেশৰ লগত প্রত্যক্ষ আৰু পৰোক্ষভাৱে সংযোগ থকা জিলাবোৰত বিভিন্ন চোৰাংচোৱা সংস্থাক সক্ৰিয় কৰি তোলা হৈছে।
লক্ষ্যণীয়ভাবে দেওবাৰে মুখ্যমন্ত্রী ড° হিমন্ত বিশ্ব শর্মায়ো গুৱাহাটীত এক অনুষ্ঠানত মন্তব্য কৰে যে পাকিস্তানে বাংলাদেশত অশান্তি সৃষ্টিৰ চেষ্টা কৰি আছে। তেনে পৰিস্থিতিৰ সৃষ্টি হ’লে অসমত তাৰ প্ৰভাৱ পৰিব পাৰে। অসম আৰক্ষীৰ উচ্চস্তৰীয় সূত্রই সদৰী কৰা অনুসৰি, ধুবুৰী, গোৱালপাৰা, দক্ষিণ শালমাৰা-মানকাচৰ আৰু কৰিমগঞ্জত বিশেষ নিৰাপত্তা ব্যৱস্থা গ্রহণ কৰা হৈছে। আনহাতে, অসম আৰক্ষীয়ে মেঘালয় আৰক্ষীৰ লগতো ধাৰাবাহিক যোগাযোগ অব্যাহত ৰাখিছে। গৃহ মন্ত্রণালয়ৰ তথ্যৰ আধাৰতে দুয়োখন ৰাজ্যৰ আৰক্ষীয়ে যৌথভাৱে সীমান্ত সুৰক্ষাৰ দিশটোত প্রয়োজন অনুসৰি নিজাববীয়া ব্যৱস্থা গ্রহণ কৰিছে।
মেঘালয়ৰ লগত যৌথভাৱে কাম কৰাৰ উদ্দেশ্য হ’ল যে ৰাজ্যখনৰ এটা বৃহৎ অংশ বাংলাদেশৰ লগত সংযোজিত হৈ আছে। তদুপৰি মেঘালয় সীমান্তৰে বাংলাদেশৰ পৰা অনুপ্রবেশো চলি আহিছে। বিশেষকৈ ৰাজ্যখনৰ পশ্চিম প্রান্তৰে বাংলাদেশী অনুপ্ৰৱেশকাৰীৰ তথ্য প্রায় নিয়মীয়াকৈ উদ্ধাৰ হৈ আছে। সেইসকল অনুপ্ৰৱেশকাৰীৰ প্ৰথম লক্ষ্য হৈ পৰে অসমৰ দক্ষিণ শালমাৰা-মানকাচৰ আৰু গোৱালপাৰা জিলা। ইয়াৰ পৰিপ্ৰেক্ষিতত দক্ষিণ শালমাৰা-মানকাচৰৰ চৰাঞ্চলত নিৰাপত্তা ব্যৱস্থা বৃদ্ধি কৰা হৈছে।
চোৰাংচোৱাৰ তথ্য অনুসৰি, বাংলাদেশত বিগত বৰ্ষত যি অস্থিৰ ৰাজনৈতিক পৰিৱেশৰ সৃষ্টি হয়, তাৰ পাছৰে পৰা ভাৰতত অনুপ্ৰৱেশৰ মাত্রাও বৃদ্ধি হয়। সেয়েহে আন্তঃৰাষ্ট্ৰীয় সীমান্ত অঞ্চলত নিৰাপত্তা ব্যৱস্থা বৃদ্ধি কৰা হয়। ইয়াৰ যোগাত্মক ফল হিচাপে অকল অসম সীমান্ততে প্রায় নিয়মীয়াকৈ অনুপ্ৰৱেশকাৰী ধৰা পৰি আহিছে।
ইপিনে, কাশ্মীৰত পাকিস্তানে সৃষ্টি কৰা পৰিস্থিতিৰ প্ৰতিক্রিয়া হিচাপে দেশখনৰ লগতে বাংলাদেশৰো সন্ত্রাসবাদী সংগঠনৰ এটা দল ৰাজস্থান আৰু গুজৰাটত প্ৰৱেশৰ এক তথ্য চোৰাংচোৱাই শেহতীয়াকৈ উদ্ধাৰ কৰে। বাংলাদেশৰ সন্ত্রাসবাদীকেইজনে অসম অথবা পশ্চিমবংগ সীমান্তৰে ভাৰতত প্ৰৱেশ কৰা বুলি নিশ্চিত কৰা হৈছে। সেই তথ্য উদ্ধাৰৰ পাছতে অসমৰ সীমান্তৱর্তী জিলা কেইখনত চোৰাংচোৱা বাহিনীৰ সক্রিয়তা বৃদ্ধি কৰা হৈছে ।