Artificial floods in Guwahati:এজাক মুষলধাৰ বৰষুণত প্লাৱিত মহানগৰীৰ বহু অঞ্চল

Artificial floods in Guwahati:

কৃত্ৰিম বানৰ কবলত গুৱাহাটী মহানগৰী। সোমবাৰে নিশাৰে পৰা হোৱা নেৰা-নেপেৰা বৰষুণৰ ফলত মহানগৰীৰ অঞ্চল বিশেষে কৃত্ৰিম বানৰ সৃষ্টি হৈছে ৷

প্লাৱিত হৈছে সদাব্যস্ত চানমাৰি,হাতীগাঁও সিজুবাৰী,মালিগাঁও,বৰাগাঁও, বামুনীমৈদাম,শিলপুখুৰী,ৰুক্মিণীগাঁও,লাল গনেশ,অনিল নগৰ, নবীন নগৰ,মথুৰাগাঁৱকে ধৰি কেতবোৰ অঞ্চল হৈ পৰিছে জলমগ্ন ৷ যাৰবাবে অঞ্চলবাসীৰ মাজত সৃষ্টি হৈছে এক হাহাকাৰময় পৰিস্থিতি ৷ কৃত্ৰিমবানৰ বাবে পুৱাতে স্কুললৈ যাবলৈ খাপপিটি থাকিলগীয়া হৈছে ছাত্ৰ-ছাত্ৰী ৷ একেদৰে নিজ নিজ কৰ্মস্থলীলৈ যাব পৰা নাই বানাক্ৰান্ত সকল ৷

আনহাতে কৃত্ৰিমবানৰ বাবে বহু কেইটা সদাব্যস্ত পথত একাঠু পযন্ত পানী হোৱাত যাতায়ত ব্যৱস্থা ব্যাহত হৈ পৰিছে। বাৰিষা অহাৰ পূৰ্বে নলা- নৰ্দমা সমূহ সময় মতে চাফা নকৰাৰ বাবেই নিশাৰে পৰা হোৱা এজাক বৰষুণৰ বাবে মহানগৰবাসী সন্মুখীন হ’ল কৃত্ৰিম বানৰ ৷

আনহাতে মহানগৰীৰ জলমগ্ন হোৱা কেতবোৰ অঞ্চল পুৱাই মটৰচাইকেলেৰে পৰিদৰ্শন কৰে গুৱাহাটী উন্নয়ন মন্ত্ৰী জয়ন্তমল্ল বৰুৱা ৷ পুনৰ ইউএছটিএমৰ বিৰুদ্ধে সৰৱ হৈ পৰে মন্ত্ৰী গৰাকী ৷ এই সন্দৰ্ভত কয়,’ইউএছটিএমে ফ্লাদ জেহাদেই কৰিছে’৷ মেঘালয় পাহাৰ পৰা নামি অহা পানীয়ে মূল সমস্যা সৃষ্টি  কৰিছে গুৱাহাটীত ৷ চানমাৰি বা সেইফালে সিমান পানী নাই ৷ মন্ত্ৰী বৰুৱা গুৱাহাটীৰ কৃত্ৰিম বানপানীৰ বাবে মেঘালয়কেই জগৰীয়া কৰিলে ৷