India-UK FTA:সুৰা প্ৰেমীসকলৰ বাবে ভাল খবৰ! এইবাৰ ভাৰতত হ্ৰাস পাব বিলাতী সুৰাৰ দাম। নেপথ্যত ভাৰত-ব্ৰিটেইনৰ মুক্ত বাণিজ্য চুক্তি। ফলত ইতিমধ্যে হ্ৰাস পাইছে বিলাতী সুৰাৰ শুল্কৰ পৰিমাণ । ফলত আমদানিৰ খৰচো হ্ৰাস পাইছে ।
শুল্ক হ্ৰাসৰ প্ৰভাৱৰ বাবে ভাৰতীয় খুচুৰা বজাৰত স্কচ হুইস্কিৰ মূল্য অতি শীঘ্ৰেই হ্ৰাস পাব বুলি প্ৰকাশ কৰিছে ফ্ৰান্সৰ জনপ্ৰিয় স্কচ হুইস্কি নিৰ্মাতা প্ৰতিষ্ঠান পেনৰ্ড ৰিকাৰ্ডে।পেনৰ্ড ৰিকাৰ্ডৰ ভাৰতৰ শাখা সংগঠন পিআৰআই।
পি আৰ আইৰ এগৰাকী মুখপাত্ৰই সংবাদ সংস্থাক জনোৱা মতে, “এফটিএ (ব্ৰিটেইন-ভাৰত বাণিজ্য চুক্তি)ৰ ফলত উন্নতমানৰ স্কচ হুইস্কিৰ মূল্য প্ৰতিযোগিতামূলক হ’ব। আমদানি শুল্ক হ্ৰাস হৈছে ।ফলত ভাৰতৰ বেছিভাগ ৰাজ্যৰ খুচুৰা বজাৰত এই সুৰাৰ দাম হ্ৰাস হ’বলৈ গৈ আছে।”
প্ৰসংগক্ৰমে মে’ মাহৰ আৰম্ভণিতে ভাৰত আৰু ব্ৰিটেইনৰ মাজত মুক্ত বাণিজ্য চুক্তি স্বাক্ষৰিত হৈছিল। এতিয়ালৈকে ব্ৰিটেইনৰ পৰা ভাৰতলৈ আমদানি কৰা সকলো হুইস্কিৰ ওপৰত ১৫০ শতাংশ কৰ আৰোপ কৰা হৈছিল।
এফ টি এৰ পাছত কৰ হাৰ ৭৫ শতাংশলৈ হ্ৰাস কৰা হয়।যদিও ভাৰত-ব্ৰিটেইনৰ মুক্ত বাণিজ্য চুক্তিৰ সবিশেষ আনুষ্ঠানিকভাৱে উপলব্ধ নহয়, পি আৰ আই কৰ্তৃপক্ষৰ মতে এইবাৰ অধিক লোকে ব্ৰিটিছ সুৰা ক্ৰয় কৰিব পাৰিব।
ভাৰত আৰু ব্ৰিটেইনে গ্ৰহণ কৰা পদক্ষেপে সুৰাৰ বজাৰত ইতিবাচক প্ৰভাৱ পেলাব।উল্লেখ্য যে ,ভাৰতত নিৰ্মিত বিদেশী সুৰাও পূৰ্বৰ দৰে কম দামত বিক্ৰী কৰা হ’ব।