Abhineel Murder Incident:
সমগ্ৰ ৰাজ্য তথা দেশ কঁপোৱা অভি-নীল হত্যাকাণ্ডই অহা আঠ জুনত সুদীর্ঘ সাত বছৰ অতিক্ৰম কৰিব। সভ্য সমাজক লজ্জানত কৰি দেশৰ প্ৰচলিত আইন ব্যৱস্থাক উপহাস কৰি বিগত ২০১৮ৰ আঠ জুনত কাৰ্বি আংলং জিলাৰ ডকমকা আৰক্ষী থানাৰ অন্তৰ্গত পাণজুৰি গাঁৱত এদল উন্মত্ত লোকে মৰিয়াই মৰিয়াই অতি নৃশংসভাবে হত্যা কৰিছিল গুৱাহাটীৰ দুই প্রকৃতিপ্রেমী তেজাল যুৱক নীলোৎপল দাস আৰু অভিজিৎ নাথক। অসংখ্য লোকৰ চকুৰ সম্মুখতে সংঘটিত এই হত্যাকাণ্ডই মাত্র দুটা আজি পর্যন্ত ভুক্তভোগীৰ পৰিয়ালে ন্যায়ৰ দিনৰ পাছতেই সাত বছৰ অতিক্ৰম কৰিব যদিও আশাতেই বন্দী হৈ থাকিবলগীয়া হৈছে।
যাৰ ফলত ভুক্তভোগী পৰিয়াল দুটাৰ মাজত চৰম অসন্তোষে দেখা দিয়া পৰিলক্ষিত হৈছে। সেই বৰ্বৰ হত্যাকাণ্ডৰ পাছত সমগ্ৰ দেশতে জোকাৰণি উঠিছিল। হত্যাকাৰীক কঠোৰতকৈ কঠোৰতম শাস্তি বিহাৰ দাবীত ৰাজ্যজুৰি প্ৰবল প্ৰতিবাদৰ জোৱাৰ উঠিছিল। সেই সময়ৰ চৰকাৰখনেও ৰাইজৰ প্ৰতিবাদৰ প্রকোপত অভি-নীল হত্যাকাণ্ডৰ বিচাৰ খৰতকীয়াকৈ কৰি প্ৰকৃত দোষীক কঠোৰ শাস্তি বিহাৰ প্ৰতিশ্রুতি দিছিল। সময় বাগৰিল। এবছৰ দুবছৰকৈ সাতটা বছৰ সম্পূৰ্ণ হ’বৰ হ’ল। কিন্তু অভি-নীল হত্যাকাণ্ডৰ বিচাৰ প্ৰক্ৰিয়াটোৱেই আজি পর্যন্ত নহ’ল। ঘটনাটোও যেন ৰাইজৰ মানসপটৰ পৰা মচ খাই যোৱাৰ উপক্রম হ’ল।
অভি-নীল হত্যাকাণ্ডৰ নগাঁও জিলা আৰু সত্ৰ ন্যায়াধীশৰ আদালতত ইতিমধ্যে চলি থকা মোকদমাটোৰ শুকুৰবাৰে শুনানিৰ তাৰিখ আছিল। আদালতত গোচৰটোৰ আচামীৰ মন্তব্য গ্ৰহণৰ প্ৰক্ৰিয়া আৰম্ভ হোৱাৰ কথা আছিল। আদালতে নিৰ্ধাৰণ কৰি দিয়া গোচৰটোৰ তাৰিখ মর্মেই পুৱাতে আদালতত উপস্থিত হয়হি চৰকাৰী অধিবক্তাসহ অভি-নীলৰ পিতৃদ্বয় গোপাল চন্দ্র দাস আৰু অজিত নাথ।
কিন্তু বিশেষ কাৰণত উপস্থিত থাকিব নোৱাৰিলে আচামী পক্ষৰ অধিবক্তা। সুদীর্ঘ সাত বছৰে ন্যায়ৰ আশাত আইনী যুঁজত অৱতীৰ্ণ হোৱা নীলোৎপল দাস আৰু অভিজিৎ নাথৰ দুৰ্ভগীয়া পিতৃদ্বয় গোপাল চন্দ্ৰ দাস আৰু অজিত কুমাৰ নাথক আজি নগাঁও আদালত চৌহদত যথেষ্ট হতাশাগ্রস্ত অৱস্থাত দেখা যায়। অভি-নীল হত্যাকাণ্ডৰ মোকদৰ্মাৰ বিচাৰ প্ৰক্ৰিয়া লেহেমীয়া হোৱা বুলি খেদ প্ৰকাশ কৰি নীলোৎপল দাসৰ দুৰ্ভগীয়া পিতৃ গোপাল চন্দ্র দাসে আজি আদালত চৌহদত সাংবাদিকৰ আগত কয়, ‘আজি সাত বছৰেই হ’ল।
সাত বছৰে আমি ভাবিছিলো অন্ততঃ তিনি-চাৰি বছৰৰ ভিতৰতে আমাৰ মোকদমাটোৰ এটা সুফল পাম। যেনেকৈ যোৰহাটৰ চিকিৎসক ডাঃ দত্তৰ হত্যাৰ গোচৰটোৰ এক-ডেৰ বছৰৰ ভিতৰতে শুনানি হ’ল ৰায়দানো হ’ল। কৰ’না কালৰ ভিতৰতে হ’ল। কিন্তু আমাৰ গোচৰটো তাৰ আগতে আৰম্ভ হৈয়ো ইমান দিনে চলিয়েই আছে। কেতিয়া শেষ হ’ব তাৰ কোনো নিশ্চয়তা নাই। আজি সাত বছৰ হৈ গ’ল আৰু হয়তো দুই বছৰে চলিব পাৰে বা হয়তো বেছি যাব পাৰে। আমাৰ মোকদমাটো সাধাৰণ মোকদমাৰ শাৰীত পৰিছে। কিয় এনে হৈছে নাজানো।’
ফাষ্ট ট্রেক আদালতৰ গোচৰ হৈয়ো অতি লেহেমীয়া গতিত অভি-নীলৰ হত্যাকাণ্ডৰ গোচৰটো চলি থকা বুলি আক্ষেপ ব্যক্ত কৰি নীলোৎপলৰ দুৰ্ভগীয়া পিতৃ দাসে লগতে কয়, ‘যিমান ঘনাই এটা ফাষ্ট ট্রেক আদালতৰ তাৰিখ পেলাব লাগিছিল সেয়া হোৱা নাই। এই মোকদমাৰ ক্ষেত্ৰ ফাষ্ট ট্রেক আদালতৰ চৰিত্ৰতো পৰিলক্ষিত হোৱা নাই। আমি দুখিত। আমি হতাশ হৈছো। কিয় এনেকুৱা হৈছে নাজানো। বর্তমান অৱস্থাত গোচৰটো যেনেকৈ চলি আছে, এই অৱস্থাতো আগতে নাছিল। আজি ডেৰ বছৰে আমি যিটো দেখিছো মূল মোকদমাতো ক’ৰবাতে থাকিল। খালী জুভেইনাল জুভেইনাল বুলি কৈ ডেৰটা বছৰ পাৰ হৈ গ’ল। তথাপি জুভেইনাল মোকদমাটো শেষেই হোৱা নাই। আজি আমাৰ অধিবক্তাই আদালতক অনুৰোধ জনাইছে মূল মোকদমাটো আগবঢ়াই নিবলৈ।’
এতিয়াও ধাৰা ৩১৩ৰ অধীনত আচামীৰ ভাষ্য গ্রহণ কৰা হোৱা নাই বুলি খেদ প্রকাশ কৰি দাসে কয়, ‘যোৱাবাৰ শুনানিৰ তাৰিখতে আমাক কোৱা হৈছিল এই তাৰিখত আচামীৰ ধাৰা ৩১৩ৰ অধীনত ষ্টেটমেন্ট লোৱা হ’ব বুলি। এইবাৰ বিপক্ষৰ অধিবক্তা আদালতত উপস্থিত নাছিল। এক জুলাইত আমাৰ মোকদমাৰ পুনৰ তাৰিখ পাৰিছে। অহা তাৰিখৰ পৰা যিকোনো কাৰণতে নহওক মূল মোকদমাটো ধাৰা ৩১৩ৰ অধীনত আচামীসকলৰ ভাষ্য গ্রহণ কৰিব লাগে বুলি আমাৰ অধিবক্তাই আদালতত আবেদন জনাইছে।’
ৰাজ্য চৰকাৰৰ তৰফৰ পৰাও গোচৰটোৰ খৰতকীয়া বিচাৰ সম্পন্ন কৰি ভুক্তভোগী পৰিয়ালক ন্যায় প্ৰদানৰ বাবে কোনোধৰণৰ পদক্ষেপ গ্রহণ কৰা নাই বুলি আক্ষেপ প্রকাশ কৰি গোচৰটোৰ লেহেমীয়া প্ৰক্ৰিয়া দূৰ কৰিবলৈ সংশ্লিষ্ট পক্ষসমূহক দাসে আবেদন জনায়।
আনহাতে, অভিজিৎ নাথৰ দুৰ্ভগীয়া পিতৃ অজিত কুমাৰ নাথে কয়, ‘কি ক’ম, গোচৰটো আমাৰ পক্ষে যোৱা নাই। অভি-নীল হত্যাকাণ্ডৰ সাত বছৰ অতিক্ৰম কৰিবলৈ মাজত মাথোঁ দুটা দিন আছে। ২০১৮ৰ আঠ জুনত আমি ল’ৰা দুটাক হেৰুৱাইছিলো। এই সাত বছৰে শুনানি পর্যায়, সাক্ষীসকলৰ সাক্ষীদানৰ শুনানিবোৰহে সম্পন্ন হ’ল। তাৰ পাছত এক-ডেৰ বছৰ ধৰি জুভেইনাল গোচৰ লৈয়েই সময় অতিবাহিত হ’ল। ধাৰা ৩১৩ৰ অধীনত আচামীৰ সোধা-পোছাও নহ’ল।
অজি পুনৰ নতুনকৈ তাৰিখ দিছে, এক জুলাই।’ অভি-নীল হত্যাকাণ্ডৰ গোচৰৰ বিচাৰ প্ৰক্ৰিয়া লেহেমীয়া হোৱা বুলি অভিযোগ তুলি অজিত নাথে আক্ষেপেৰে কয়, ‘উচ্চ ন্যায়ালয়ৰ নিৰ্দেশ মর্মে আমাৰ গোচৰটো ফাষ্ট ট্রেক আদালতত চলিব লাগিছিল। মাহেকত কমেও চাৰি-পাঁচটাকৈ শুনানিৰ তাৰিখ পৰিব লাগিছিল। এতিয়া এমাহত এটাও তাৰিখ নপৰে।’
