United Revolutionary Movement Council of Assam Conference in Kolgachia:
অসম সংযুক্ত বিপ্লৱী আন্দোলন পৰিষদ(আৰ্মকা) ৰ কেন্দ্ৰীয় সমিতিৰ তিনি দিনীয়া বৈঠকৰ আজি ইয়াত ওৰ পৰে। কেন্দ্ৰীয় সমিতিৰ সভাপতি কৃষ্ণকান্ত গগৈৰ সভাপতিত্ব বহা বৈঠকখনত চিপিআই (এম এল) -মাচলাইনৰ ৰাজ্যিক সম্পাদকমণ্ডলী সদস্য ,প্ৰা: বিধায়ক কমৰেদ চন্দ্ৰধৰ কলিতা, ঝাড়খণ্ডী আদিবাসী সংগ্ৰাম পৰিষদৰ সভাপতি ৰবচন মুণ্ডা,নাৰী মুক্তি সন্থাৰ নেত্ৰী চৈয়দা মচফিকা বেগম, আৰ্মকাৰ প্ৰ: প্ৰ: সম্পাদক মানচাও অমৃত চেতিয়া,অসম মজুৰি শ্ৰমিক ইউনিয়নৰ প্ৰ: সম্পাদক চন্দ্ৰকান্ত অধিকাৰীয়ে বিশেষভাৱে নিমন্ত্ৰিত হৈ উপস্থিত থাকি শুভেচ্ছামূলক বক্তব্য প্ৰদান কৰে।
সভাই অসমৰ বিজেপি চৰকাৰ খনে বৰ্তমান চলাই থকা এলানি উচ্ছেদৰ পৰ্যালোচনা কৰি এই সিদ্ধান্তত উপনীত হয় যে গৰুখুটি গোৱালাপাৰা আদিৰ উচ্ছেদ অভিযান, ঘাইকৈ মিঞা -মুচলমানৰ বিৰুদ্ধে পৰিচালিত আছিল বাবে বহুতেই হৰ্ষ প্ৰকাশ কৰিছিল; কিন্তু মিকিৰ বামুণী, আমচাং আদিত এই উচ্ছেদলানিৰ জনজাতি -আদিবাসী বিৰোধী -চৰিত্ৰও প্ৰকট হৈ পৰিল, তাৰপাছত পলাশবাৰী বৰদুৱাৰ আৰু পৰ্বতজোৰাত সংঘটিত উচ্ছেদ উৎকট জনজাতি বিৰোধী চৰিত্ৰ প্ৰদৰ্শন কৰিলে। অৱশেষত কালি -পৰহি লখিমপুৰৰ ফুকনৰ হাটত ছশ বছৰ অসমত ৰাজত্ব কৰা আহোম সম্প্ৰদায়ৰ ওপৰতো উচ্ছেদৰ জেচিবি চলে। কাৰ্বি আংলং -দিমা হাচাও যদি আদানিক দিবলৈ উচ্ছেদ কৰা হৈছে, মিকিৰ বামুনিত এজিয়ৰ কোম্পানীক ,আন ক’ৰবাত ৰামদেৱক, আন ক’ৰবাত মামা -মামী -গৰুচোৰ -গৰুচুৰুনী – মাটি মাফিয়া- -মাটি খকুৱা -মাটি খাইতী হঁতক আৰু শেহতীয়াকৈ আনকি সত্ৰ -সত্ৰাধিকাৰৰ স্থাৰ্থতো উচ্ছেদ চলিছে বুলি অভিযোগ উঠিছে।
আৰ্মকাৰ নেতৃবৃন্দই – কৰ্পৰেত পুঁজিপতি, ৰামদেৱৰ পৰা সত্ৰাধিকাৰলৈ ধৰ্মগুৰু, আৰু মাটি মাফিয়া -মাটি খকুৱাহঁতৰ স্বাৰ্থত সংঘটিত এইলানি উচ্ছেদৰ বিৰুদ্ধে সংখ্যালঘু -সংখ্যাগুৰু- জনজাতি, আদিবাসী নিৰ্বিশেষে সকলো সম্প্ৰদায়ৰ মানুহক মাৰবান্ধি থিয় দিবলৈ আহ্বান জনায়।
আৰ্মকাই অসমৰ শাসক দলৰ শীৰ্ষস্থানৰ এদল নেতাই দৰং জিলাৰ গৰুখুটীত হেজাৰ হেজাৰ সংখ্যালঘু উচ্ছেদ কৰি,কেইবাজনকো হত্যা কৰি কেইবাকোটি টকা ৰাজহুৱা ধনেৰে যি গো -প্ৰকল্প খোলা হৈছিল তাৰ গৰুৰ চুৰি চাপ্ৰাচি কেলেংকাৰীত অসমৰ এজন মন্ত্ৰীবৰ, একাধিক বিধায়ক আৰু সাংসদ জড়িত হোৱাত উদ্বেগ প্ৰকাশ কৰে। স্বয়ং মুখ্যমন্ত্ৰীজনে অত্যন্ত নিকৃষ্ট শব্দ আৰু অংগী ভংগীৰে গোমাংস -গাহৰিমাংসৰ ৰাজনীতি কৰি থকা অৱস্থাত তেওঁলোকৰ গৰুচুৰিৰ গোচৰ বোৰ ধৰা পৰিছে। আৰ্মকাই সেয়েহে “খেদ ঐ খেদ,গৰুচোৰক খেদ,গৰু -গাহৰিৰ মঙহৰ ৰাজনীতি কৰা গৰুবোৰক খেদ” আহ্বান জনায়।
# জাতি বর্ণগত লোকপিয়ল সম্পৰ্কে
সভাই আৰ্মকাৰ যোৱা চাৰি দশকৰ দাবি :দেশজোৰা জাতি – বৰ্ণগত লোক পিয়ল কেন্দ্ৰ চৰকাৰে মানি ল’বলৈ বাধ্য হোৱাত আনন্দ অনুভৱ কৰে। সভাই সকলো জনগোষ্ঠীগত সংগঠনক এই লোকপিয়লৰ ওপৰত কাঢ়া নজৰ ৰাখি ভাষা – ধর্ম- বর্ণসম্পৰ্কত নিখুঁত তথ্য লিপিবদ্ধ কৰোৱাৰ আহ্বান জনায়।
#অসমৰ ফেদাৰেল পুনৰ গঠনৰ আহ্বানেৰে চাৰি দশক পূৰ্তি অধিৱেশন কল-গাছিয়াত’
সভাই আৰ্মকাৰ উপ-সভাপতি অধ্যাপক আবুবক্কৰ ছিদ্দিক আহমেদ তথা বৰপেটা জিলা সমিতিৰ আমন্ত্ৰণ ক্ৰমে আৰ্মকাৰ আগন্তুক চাৰিদশক পূৰ্তি অধিৱেশন বৰপেটা জিলাৰ শৈক্ষিক-,বৌদ্ধিক কেন্দ্ৰ কলগাছিয়াত অনুষ্ঠিত কৰাৰ সিদ্ধান্ত লয়।
উল্লেখযোগ্য যে শাসকশ্ৰেণীয়ে প্ৰৱৰ্তন কৰা বিতিআৰ মাৰ্কা সকলো স্বায়ত্তশাসনেই জনজাতি দালাল শ্ৰেণী এটা সৃষ্টি কৰি ব্যাপক সংখ্যাক জনজাতীয় লোকক অটল দাৰিদ্ৰলৈ ঠেলি দিয়াৰ পৰিপ্ৰেক্ষিতত স্বায়ত্তশাসনৰ এই আৰ্হি আপোনাআপুনি বাতিল হৈ পৰিছে। ইয়াৰ বিপৰীতে বহুস্তৰীয় স্বায়ত্তশাসনৰ ভিত্তিত অসমৰ ফেদাৰেল পুনগঠনৰ দাবিত অচিৰেই আন্দোলন গঢ়ি তুলিব। অনুষ্ঠিত কৰিব প্ৰাক্তন সতীৰ্থ সন্মিলন।
বাতৰি কাকতলৈ দিয়া এটা বিবৃতিত এই কথা জনাইছে আৰ্মকাৰ সভাপতি কৃষ্ণকান্ত গগৈ উপ-সভাপতি অধ্যাপক আবুবক্কৰ ছিদ্দিকি আৰু প্ৰধান সম্পাদক জনজাতীয় নেতা ৰবিৰাম ৰাভাই।