Madhya Pradesh:
গাঁৱৰ এমূৰত এজোপা ডাঙৰ খৈৰ গছ। সেই গছৰ তলতে মন মাৰি বহি আছে এগৰাকী বৃদ্ধা। কাষতে বহি মাটিৰ চৌকাত ৰন্ধা-বঢ়া কৰি আছে এগৰাকী বিধৱা মহিলাই। তেওঁলোকৰ ওচৰতে খেলি আছে দুটি শিশুৱে। মাহৰ পাছত মাহ ধৰি এই চাৰিজনীয়া দৰিদ্ৰ পৰিয়ালটোৰ সংসাৰ সেই গছজোপাৰ তলতে চলি আছে। মূৰৰ ওপৰত নাই কোনো চালি, আছে কেৱল গছৰ ছাঁ।
বৃদ্ধাৰ নাম গৌড়া বাঈ। মধ্যপ্ৰদেশৰ ধৰ জিলাৰ লোহাৰি গাঁৱত তেওঁৰ সংসাৰ। শৈশৱতে বিয়া হৈ তেওঁ সেই গাঁৱলৈ আহিছিল। তাৰ পাছত বহু বছৰ পাৰ হৈ গৈছে। বৃদ্ধাই দেখিছে স্বামী আৰু পুত্ৰৰ মৃত্যু। এতিয়া বৃদ্ধাৰ সংসাৰত তেওঁৰ লগতে আছে বিধৱা বোৱাৰীয়েক আৰু দুই নাতি-নাতিনী। প্রায় ১০ মাহৰ আগলৈকে তেওঁলোকে মাটিৰে নিৰ্মিত ঘৰতে বাস কৰিছিল; কিন্তু তেওঁলোকৰ সংসাৰ সেই গছজোপাৰ তলতে।
দুর্ভগীয়া বৃদ্ধাই দাবী কৰিছে যে প্রধানমন্ত্রী আবাস যোজনাৰ কেতবোৰ ‘ত্রুটি’ৰ কাৰণেই তেওঁলোকৰ এই দশা হৈছে। ঘটনাৰ সূত্রপাত হয় ১০ মাহৰ পূৰ্বে। গাঁৱৰ মুৰব্বীয়ে গৌড়াক জনালে যে তেওঁ প্রধানমন্ত্রী আবাস যোজনাৰ ঘৰ লাভ কৰিছে; কিন্তু সেই ঘৰ পাবলৈ হ’লে তেওঁলোক থকা মাটিৰ ঘৰটো ভাঙি পেলাব লাগিব। কাৰণ বিভাগীয় বিষয়াসকলে যেতিয়া পৰিদৰ্শন কৰিবলৈ আহিব, তেতিয়া যাতে দেখা যায় যে তেওঁৰ কোনো ঘৰ নাই। সেয়াই সমস্যাৰ আৰম্ভণি। পকী ঘৰৰ আশাত গৌড়াই তেওঁলোকৰ মাটিৰ ঘৰটো ভাঙি পেলায়। আশ্রয় লয় খৈৰ গছজোপাৰ তলত। তাৰ পাছৰে পৰা সঘনাই গাঁৱৰ পঞ্চায়ত, খণ্ড উন্নয়ন কার্যালয়লৈ তাঁতবাটি কৰি আছে; কিন্তু এতিয়াও ঘৰ পোৱা নাই।
এক সৰ্বভাৰতীয় সংবাদ মাধ্যমৰ প্রতিবেদন অনুসৰি, ২০২৪ৰ ছেপ্টেম্বৰত মাটিৰ ঘৰটো ভাঙি পেলাইছিল অশীতিপৰ বৃদ্ধাগৰাকীয়ে। আশা কৰিছিল যে শীঘ্রেই এটা পকী ঘৰ লাভ কৰিব। অথচ ঘৰ ক’ত? বৃদ্ধাই কয়, ‘এদিন আমাৰ গাঁৱৰ পঞ্চায়ত প্রধান আৰু পঞ্চায়ত সচিবে আহি আমাক ক’লে যে মই প্রধানমন্ত্রী আবাস যোজনাৰ অধীনত ঘৰৰ বাবে অনুমোদন পাইছো। তেওঁলোকৰ কথামতেই মই মোৰ মাটিৰ ঘৰটো ভাঙি দিলো; কিন্তু তাৰ পাছৰে পৰা যেতিয়াই মই নিৰ্মাণৰ টকাৰ বাবে যোগাযোগ কৰিলো, তেতিয়া মোক কোৱা হ’ল যে সমগ্র প্রক্রিয়াটো সম্পন্ন হ’বলৈ কিছু সময় লাগিব।’
সেই ‘সময়’ কেতিয়া আহিব, তাৰ আশাতে এতিয়া দিন অতিবাহিত কৰিছে বৃদ্ধা আৰু তেওঁৰ পৰিয়ালে। এই বিষয়ত গাঁৱৰ পঞ্চায়ত প্রধান অমৰ সিঙে তেওঁৰ ‘অসহায়তা’ৰ কথা জনাইছে। সিঙে কয়, ‘প্রধানমন্ত্রী আবাস যোজনাৰ হিতাধিকাৰীৰ তালিকাত গৌড়াৰ নামটো দেখিয়েই আমি বিষয়াটো তেওঁক অৱগত কৰিছিলো; কিন্তু পাছত অনলাইনত তেওঁৰ আবেদন আগনাবাঢ়িল। এতিয়া আৰু পঞ্চায়ত পর্যায়ত একো কৰিব পৰা নাযাব। তেওঁ উপায়ুক্ত বা মহকুমা অফিচত যোগাযোগ কৰিব লাগিব।’
আনহাতে, খণ্ড উন্নয়ন কাৰ্যালয়ৰ এজন বিষয়াই কয়, ‘যেতিয়া তেওঁ (গৌড়া)ৰ আবেদন অনলাইনত কৰা হয়, তেতিয়া ছিষ্টেমত কিছু ত্রুটিয়ে দেখা দিয়ে। বিষয়টো চালি-জাৰি চোৱাৰ নিৰ্দেশ দিয়া হৈছে। দ্রুত সমাধান কৰাৰো চেষ্টা কৰা হৈছে।’ এই বিষয়ত অবগত নাছিল বুলি জানিবলৈ দি ধৰ জিলাৰ মহকুমাধিপতি প্রিয়ংক মিশ্রই কয়, ‘এতিয়া বিষয়টো মোৰ দৃষ্টিলৈ আহিছে। অগ্ৰাধিকাৰ দি বিবেচনা কৰিম |