Paresh Baruah Reactions:
আলফা (স্বাধীন)ৰ শিবিৰত সংঘটিত ড্র’ন-ক্ষেপণাস্ত্র আক্রমণত তিনি শীর্ষ নেতা ক্রমে নয়ন অসম, গণেশ অসম আৰু প্ৰদীপ অসম নিহত হোৱাৰ কথা সংগঠনটোৰ মুৰব্বী পৰেশ বৰুৱায়ো নিশ্চিতি দিছে। নিহত তিনিওজনৰ পৰিয়ালবৰ্গলৈ আলফা (স্বাঃ)ৰ মুৰব্বীজনে সমবেদনা জনাইছে।
আনহাতে, নিহতকেইজনৰ পৰিয়াল তথা আত্মীয়-স্বজনে নশ্বৰদেহ ঘূৰাই বিচাৰি জনোৱা অনুৰোধ ৰক্ষা কৰাটো কঠিন হৈছে বুলি বৰুৱাই আজি সংবাদ মাধ্যমক জনায়। তেওঁ কয়, দখলদাৰী বাহিনীয়ে ঘেৰাও কৰি ৰাখিছে। এনে পৰিস্থিতিত শৱদেহ ঘূৰাই দিয়াটো টান হৈছে। পৰিয়ালক শৱদেহ ঘূৰাই দিয়াৰ আমাৰ নৈতিক দায়িত্ব আছিল যদিও পৰিস্থিতি অনুকূল নহয়।’
আনহাতে, ভাৰতীয় সেনা আৰু প্ৰতিৰক্ষা মন্ত্রণালয়ে এই আক্ৰমণৰ তথ্য নাই বুলি কৰা মন্তব্যক লৈ আলফা (স্বাঃ)ৰ মুৰব্বীজনে বিৰূপ প্রতিক্রিয়া প্রকাশ কৰিছে। প্ৰতিৰক্ষা মন্ত্রণালয় আৰু ভাৰতীয় সেনাৰ এই ভাষ্যক হাস্যকৰ কথা বুলিও তেওঁ আখ্যা দিয়ে। বৰুৱাই কয়, ‘অসমৰ জনগণে নেদেখিলেও ড্ৰ’নবোৰ ক’ৰ পৰা আহিছিল, নগালেণ্ডৰ মন জিলাৰ, অৰুণাচল প্ৰদেশৰ লংডিং আদিৰ ৰাইজে দেখিলে। ভাৰতৰ ফালৰ পৰা, অৰুণাচল প্ৰদেশৰ পৰা ড্র’নবোৰ আহিছিল। এয়া দিনৰ পোহৰৰ দৰে সত্য ঘটনা।’
বৰুৱাই জনোৱা মতে, দেওবাৰে পুৱতি নিশাৰ পৰা ম্যানমাৰ সীমান্তৰ আলফা (স্বাঃ)ৰ শিবিৰত তিনিবাৰ ড্ৰ’ন-ক্ষেপণাস্ত্র আক্রমণ সংঘটিত হয়। ইয়াৰে প্ৰথমটো আক্রমণ পুৱতি নিশাৰ দুই বজাত আৰম্ভ হয়। এই আক্রমণ পুৱতি নিশা চাৰি বজালৈ অব্যাহত থাকে বুলি সদৰী কৰি তেওঁ কয় যে আক্রমণত প্রথম ঘটনাত আলফা (স্বাঃ)ৰ শিৰিৰ বিশেষ ক্ষয়-ক্ষতি হোৱা নাছিল। পাছৰ ঘটনাটোত ক্ষয়-ক্ষতি হয়।
আনহাতে, দ্বিতীয়টো আক্রমণ পুৱা ১০ বজাত সংঘটিত হয়। তাৰ পাছত তৃতীয়টো আক্রমণ সংঘটিত হয়। তৃতীয়টো আক্রমণত প্রদীপ অসম আৰু গণেশ অসমৰ মৃত্যু হয় বুলি তেওঁ জনায়।
আনহাতে,প্রথমটো আক্রমণতে নয়ন অসমৰ মৃত্যু হয় বুলি বৰুৱাই জানিবলৈ দিয়ে। এই সম্পর্কত তেওঁ কয়, ‘নয়ন অসমে ধাৰাসাৰ বোমাবর্ষণৰ মাজতো সুৰক্ষিতভাৱে শিবিৰত থকা সকলোকে পঠিয়াই দিয়ে। তেওঁ শিবিৰত থকা দুজন অসুস্থতাক পৰিচৰ্যা কৰি থকা অৱস্থাত প্রাণ হেৰুৱায়।’ বৰুৱাই প্ৰকাশ কৰা অনুসৰি দ্বিতীয়টো আক্রমণত প্রদীপ অসম আহত হৈছিল। তৃতীয়টো আক্ৰমণত তেওঁৰ লগতে গণেশ অসমৰ মৃত্যু হয়।