Massive fund-raising for the ULFA (I):
এফালে সংগঠন সম্প্ৰসাৰণ তথা শক্তিশালীকৰণৰ তৎপৰতা আৰু আনফালে ব্যাপক হাৰত পুঁজি সংগ্ৰহ অব্যাহত ৰাখিছে আলফা (স্বাধীন)ই। শেহতীয়াকৈ পশ্চিম অসমত নতুনকৈ সংগঠনক সংগঠিত কৰিবলৈ তৎপৰতা চলাৰ তথ্য ধৃত কে’বাজনো সদস্য আৰু যোগাযোগকাৰীৰ জৰিয়তে পোহৰলৈ আহিছে। তাৰ বাবে আনকি মাৰণাস্ত্র আৰু বিস্ফোৰকো সংগ্ৰহ কৰা হৈছে।
অলপতে বকোত তাৰে এটা অংশ আৰক্ষীয়ে উদ্ধাৰ কৰে। একে সময়তে পূব অসমৰ বিশেষকৈ তিনিচুকীয়া, ডিব্ৰুগড় আৰু চৰাইদেউত ব্যাপক হাৰত ধন দাবী আৰু ধন সংগ্রহ অভিযান চলাইছে সংগঠনটোৱে। অকল তিনিচুকীয়া জিলাৰ পৰাই চলিত বৰ্ষৰ প্ৰথম চাৰি মাহত ছয় কোটি টকা সংগ্ৰহ কৰে বুলি নিৰ্ভৰযোগ্য সূত্ৰত প্রকাশ। যোৱা মে’ত গ্ৰেপ্তাৰ হোৱা সংগঠনটোৰ অপাৰেছনেল কমাণ্ডাৰ ৰূপম অসমৰ পৰা এই তথ্য উদ্ধাৰ কৰা হৈছে।
ইয়াৰ আঁত ধৰি চলোৱা অভিযানত আৰক্ষীয়ে লাভ কৰা তথ্য অনুসৰি, সংগঠনটোৰ পুঁজি সংগ্রহ অভিযানত জড়িত অনুপ দহোটীয়া ওৰফে মৃগাংক বর্মনে তিনিচুকীয়া জিলাৰ বহু লোকলৈ ধনদাবী পত্ৰ প্ৰেৰণ কৰিছিল। তাৰে একাংশৰ পৰা ধন আদায় কৰিবলৈয়ো সক্ষম হৈছে। জিলাখনৰ ব্যৱসায়ী, উদ্যোগপতি, চিকিৎসক আদিক এনে পত্র দিয়া বুলিও আৰক্ষীয়ে তথ্য লাভ কৰিছে। অসম-অৰুণাচল আন্তঃৰাজ্যিক সীমান্তৰ কয়লা আৰু কাঠৰ ব্যৱসায়ীৰ পৰা ধন সংগ্ৰহ কৰিবলৈ সক্ষম হোৱাৰ তথ্য উদ্ধাৰ হৈছে। এই ধন নগদ হিচাপত অথবা ক্রিপ্ট’ কাৰেন্সীৰ জৰিয়তে সংগ্ৰহ কৰা হৈছে।
ধন দাবী কৰা সকলকো এই দুটা ব্যৱস্থাৰে আদায় দিবলৈ কোৱা হৈছে। প্রসংগক্রমে উল্লেখ্য যে বিগত বৰ্ষৰ অক্টোবৰত ডিব্ৰুগড়ৰ কে’বাজনো ব্যৱসায়ীৰ পৰা ক্রিপ্ট’ কাৰেন্সীৰ মাধ্যমৰে ধন আদায় লোৱা বুলি আৰক্ষীয়ে নিশ্চিত কৰিছে। আৰক্ষীয়ে এই কথাও নিশ্চিত কৰিছে যে বহিঃৰাজ্যৰ পৰা আহি অসমত ব্যৱসায়-উদ্যোগ চলোৱাসকলক ভাবুকি প্ৰদান কৰিও পুঁজি সংগ্ৰহ কৰা হৈছে। আলফা (স্বাঃ) বুলিয়ে নহয়, ৰাজ্যখনৰ জাতীয় সংগঠনক আর্থিক আৰু অন্যান্য ধৰণে সহায়-সহযোগিতা কৰিবই লাগিব বুলি সেইসকলক ভাবুকিও প্রদান কৰিছে। তেনে ভাবুকিত ভীতিগ্রস্ত হোৱা একাংশই সংগঠনটোক ধন আদায় দিছে।
আৰক্ষীৰ তথ্য অনুসৰি, আলফা (স্বাঃ)ৰ ম্যানমাৰত তিনিটা শিবিৰ আছে। তাৰে আৰাকান শিবিৰ তথা ‘কেম্প-৭৭৯’ৰ পৰাই ধন সংগ্ৰহৰ কাম চলিছে। এই শিবিৰটোৰ নেতৃত্বত আছে অৰুণোদয় অসম। ধৃত ৰূপম অসম এই শিবিৰটোৰ লগতে জড়িত আছিল। ম্যানমাৰৰ গভীৰ অৰণ্যত সংগঠনটোৰ মুখ্য ভ্রাম্যমাণ শিবিৰটো অৱস্থিত। এই শিবিৰটোৰ নেতৃত্বত আছে মাইকেল অসম ডেকা ফুকন। আনটো শিবিৰৰ নাম ‘ইষ্টার্ণ কেম্প’। এই শিবিৰটোৰ নেতৃত্বত আছে নয়ন অসম। অৱশ্যে চোৰাংচোৱাৰ তথ্য অনুসৰি, ইষ্টার্ণ শিবিৰটো সম্প্ৰতি সক্ৰিয় হৈ থকা নাই। আৰাকান শিবিৰে সংগ্ৰহ কৰা পুঁজিৰ মূল অংশটো যায় মাইকেল অসম ডেকা ফুকনৰ শিবিৰলৈ। কাৰণ এই শিবিৰটোতে প্ৰশিক্ষণৰ পৰা আৰম্ভ কৰি অন্যান্য কাম-কাজ চলে।
চোৰাংচোৱাৰ তথ্যৰ ভিত্তিত আৰক্ষীৰ সূত্ৰই সদৰী কৰে যে অৰুণাচলৰ ভূমিত আলফা (স্বাঃ)ৰ বৃহৎ পৰিমাণৰ ধন মজুত আছে। সেই ধন ম্যানমাৰলৈ লৈ যোৱাৰ কৌশল সংগঠনটোৱে সলনি কৰিছে। সংগ্ৰহ কৰা ধন জব্দ নহ’বলৈকে তেনে কৌশলৰ আশ্রয় লোৱা বুলি ধাৰণা কৰিছে আৰক্ষীয়ে। কৌশলৰ বিষয়ে সদৰী কৰি সূত্ৰটোৱে কয় যে ধন দাবী কৰা, ধন সংগ্ৰহ কৰা, সংগৃহীত ধন জমা লোৱা, সেই ধন জমা ৰখা, তাৰ পাছত ম্যানমাৰলৈ প্ৰেৰণ কৰাটো এটা শৃংখলিত ব্যৱস্থাৰ মাজেৰে চলে। এই গোটেই ব্যৱস্থাটোত অত্যন্ত গোপনীয়তা অৱলম্বন কৰা হয়।
উদাহৰণ স্বৰূপে ধন সংগ্ৰহ কৰি কাক জমা দিয়া হয় সেইটো সংগ্ৰহকাৰীয়ে নাজানে। যিয়ে সেই ধন সংগ্ৰহ কৰে, সেইজনে আকৌ জমা কৰা স্থানৰ ঠিকনা নাজানে। আগতে এই ব্যৱস্থা নাছিল। সংগৃহীত পুঁজি সুৰক্ষিত কৰিবলৈ অত্যন্ত গোপনীয়তা শেহতীয়াকৈ সংগঠনটোৱে গ্ৰহণ কৰিছে। ইয়াৰ ফলতে ধন সংগ্ৰহ প্ৰক্ৰিয়াটোৰ লগত জড়িত মানুহ ধৰা পৰিছে যদিও সেই ধন লুকুৱাই থোৱা স্থানৰ পৰা উদ্ধাৰ কৰাত ব্যর্থ হৈছে আৰক্ষী-নিৰাপত্তাৰক্ষী-চোৰাংচাৱাৰ দল।
শেহতীয়াকৈ বকোত তিনিজন লোকৰ পৰা উদ্ধাৰ কৰা বৃহৎ পৰিমাণৰ সক্ৰিয় গুলিসহ ৰিভলভাৰ আৰু পিষ্টল সংগৃহীত পুঁজিৰ দ্বাৰাই ক্রয় কৰে। সেই পুঁজি ক’ৰ পৰা কিদৰে সংগ্ৰহ কৰা হৈছিল, তাৰ অনুসন্ধান অব্যাহত আছে। আৰক্ষীয়ে কৰা প্ৰাথমিক অনুসন্ধানত পশ্চিম অসমতো সংগঠনটোৱে নির্দিষ্ট কেইটামান উৎসৰ পৰা ধন আদায় কৰিবলৈ সক্ষম হৈছে। অৱশ্যে সেই ধনৰেই যে উদ্ধাৰ কৰা মাৰণাস্ত্ৰ আৰু বিস্ফোৰক ক্ৰয় কৰিবলৈ সক্ষম হৈছিল তেনে নহয়।
