Japanese encephalitis: ✒️ৰাজ্যজুৰি জাপানী এনকেফেলাইটিছ ৰোগে গুৰুতৰ ৰূপ ধাৰণ কৰিছে। ৰাজ্যৰ বিভিন্ন প্রান্তত এই ৰোগত আক্রান্ত হৈ বহুকেইজন লোকে প্রাণ হেৰুওৱাৰ লগতে আন বহু সংখ্যক চিকিৎসাধীন হৈ আছে।
উল্লিখিত সময়ছোৱাত জাপানী এনকেফেলাইটিছ ৰোগত আক্ৰান্ত হৈ গুৱাহাটী চিকিৎসা মহাবিদ্যালয় হাস্পতালত ১৮ জন লোকে মৃত্যুক আঁকোৱালি লৈছে। উল্লেখ্য যে দেশৰ ভিতৰতে এই ৰোগৰ সর্বাধিক প্রাদুর্ভাৱ হোৱা ৰাজ্যৰূপে চিহ্নিত হৈছে অসম।
বিগত সাত বছৰত অৰ্থাৎ ২০১৮ৰ পৰা ২০২৪লৈ অসমত এই ৰোগত আক্ৰান্ত হোৱা লোকৰ সংখ্যা হৈছে ৩,৩৪০ জন। এই ৰোগীসকলৰ ভিতৰত ৫২৯ জনে মৃত্যুক আঁকোৱালি লোৱাৰ তথ্য প্ৰকাশ কৰিছে সংশ্লিষ্ট বিভাগে।
চলিত বর্ষটোত তথা যোৱা এপ্ৰিলৰ পৰা ৰাজ্যখনত জাপানী এনকেফেলাইটিছ ৰোগৰ প্ৰাদুৰ্ভাৱ বৃদ্ধি হোৱাৰ তথ্য পোহৰলৈ আহিছে।
গুৱাহাটী চিকিৎসা মহাবিদ্যালয় হাস্পতালৰ উপ অধীক্ষক উজ্জ্বল কুমাৰ শৰ্মাই সংবাদ মাধ্যমৰ আগত সদৰী কৰা তথ্য অনুসৰি, গুৱাহাটী চিকিৎসা মহাবিদ্যালয় হাস্পতালত যোৱা এপ্ৰিলৰ পৰা মঙলবাৰৰ দিনটোলৈ ৬৭জন লোকৰ দেহত জাপানী এনকেফেলাইটিছ ৰোগৰ উপস্থিতি ধৰা পৰে।
ইয়াৰে ১৮ জনৰ মৃত্যু হৈছে আৰু ১৩জন সুস্থ হৈ ঘৰলৈ উভতি গৈছে বুলি তেওঁ কয়। আজিৰ দিনটোত এই ৰোগত আক্রান্ত ৩১জন চিকিৎসাধীন হৈ আছে বুলি তেওঁ উল্লেখ কৰি লগতে কয় যে এই ৰোগীসকলৰ ভিতৰত সৰ্বাধিক দৰাং, নলবাৰী আৰু কামৰূপ গ্ৰাম্যৰ ৰোগী দেখিবলৈ পোৱা গৈছে।
নলবাৰীৰ ১৬ জন, দৰঙৰ ১১ জন আৰু কামৰূপ গ্ৰাম্যৰ পৰা ১৭ জন ৰোগী জিএমচিএইছলৈ আহিছে। ইয়াৰ উপৰি ধুবুৰী, বৰপেটা, কামৰূপ মহানগৰ, নগাঁও, বজালী, মৰিগাঁও, বাপ্সা, গোৱালপাৰা, শোণিতপুৰ আদিৰ পৰাও হাস্পতালখনলৈ আহিছে বুলি জ্যেষ্ঠ চিকিৎসকজনে সদৰী কৰে।
আনহাতে, গোলঘাট জিলাত মঙ লবাৰৰ দিনটোত জাপানী এনকেফেলাইটিছত আক্রান্ত ৰোগীৰ সংখ্যা ১৯জনলৈ বৃদ্ধি পাইছে। একেদৰে শোণিতপুৰত এই ৰোগত আক্রান্ত হৈ দুজনে মৃত্যুক আঁকোৱালি লোৱাৰ লগতে আন চাৰিজন চিকিৎসাধীন হৈ আছে। শোণিতপুৰ জিলা স্বাস্থ্য সেৱা বিভাগৰ যুটীয়া সঞ্চালক ডাঃ জনার্দন গোস্বামীয়ে সদৰী কৰা অনুসৰি, জিলাখনত বিগত জুনৰ পৰা মঙলবাৰ পর্যন্ত ছজন লোক জাপানী এনকেফেলাইটিছত আক্রান্ত হৈছে আৰু ইয়াৰে দুজনৰ মৃত্যু হৈছে।
মৃত লোকদ্বয় হৈছে বালিপৰাৰ শিঙিতলীৰ জাকিৰুল ইছলাম (১০) আৰু ঢেকিয়াজুলিৰ অৰিয়ন্টলিৰ উর্বশী প্রধান (৫১)। উল্লেখ্য যে জিলাখনৰ ঢেকিয়াজুলি খণ্ড প্রাথমিক স্বাস্থ্য কেন্দ্ৰৰ অন্তৰ্গত মিজিবাৰীত এগৰাকী ১০ বছৰীয়া কিশোৰী, বিহগুৰি খণ্ড প্রাথমিক স্বাস্থ্য কেন্দ্ৰৰ অন্তৰ্গত এজন ২৫ বছৰীয়া যুৱক, বালিপৰা খণ্ড প্রাথমিক স্বাস্থ্য কেন্দ্ৰৰ অন্তর্গত ১৩ বছৰীয়া এজন কিশোৰ আৰু উত্তৰ জামুগুৰি খণ্ড প্রাথমিক স্বাস্থ্য কেন্দ্ৰৰ অন্তৰ্গত ৩৬ বছৰীয়া এজন লোক জাপানী এনকেফেলাইটিছত আক্রান্ত হৈ চিকিৎসাধীন হৈ আছে।
দেশৰ ভিতৰতে সৰ্বাধিক আক্রান্ত-মৃত্যুত শীর্ষত অসম
ইফালে, জাপানী এনকেফেলাইটিছত দেশৰ ভিতৰতে সৰ্বাধিক আক্রান্ত আৰু মৃত্যু হৈছে অসমত। কেন্দ্রীয় স্বাস্থ্য মন্ত্রণালয়ৰ অধীনৰ সংশ্লিষ্ট সংস্থাই সদৰী কৰা তথ্য অনুসৰি, ২০১৮ৰ পৰা ২০২৪ লৈ অসমত জাপানী এনকেফেলাইটিছত আক্রান্ত হৈছে ৩,৩৪০ জন আৰু ইয়াৰে ৫২৯জনে মৃত্যুক সাবটি লৈছে।
তথ্য মতে ২০২৪ত অসমত জাপানী এনকেফেলাইটিছত ৬৭০জন আক্রান্ত হোৱাৰ বিপৰীতে ইয়াৰে ৫৩জনে মৃত্যুক আঁকোৱালি লৈছে। একেদৰে ২০২৩ত ৫২৫জন আক্ৰান্তৰ ভিতৰত ৩৪জনৰ মৃত্যু, ২০২২৩ ৪৫৬ জন আক্ৰান্তৰ ভিতৰত ৯৬জনৰ মৃত্যু, ২০২১৩ ২১৮জন আক্ৰান্তৰ ভিতৰত ৪০ জনৰ মৃত্যু, ২০২০৩ ৩২০জন আক্ৰান্তৰ ভিতৰত ৫১জনৰ মৃত্যু, ২০১৯৩ ৬৪২জন আক্ৰান্তৰ ভিতৰত ১৬১ জনৰ মৃত্যু আৰু ২০১৮৩ ৫০৯জনৰ ভিতৰত ৯৪জনে মৃত্যুক আঁকোৱালি লৈছে।
উল্লেখ্য যে এই প্রতিটো বৰ্ষতে আক্রান্ত আৰু মৃত্যুৰ তালিকাত দেশৰ ২৪খন ৰাজ্য আৰু কেন্দ্ৰীয় শাসিত অঞ্চলৰ ভিতৰত শীৰ্ষত আছে অসম। বিভাগীয় তথ্য অনুসৰি, ২০১৮ত জাপানী এনকেফেলাইটিছত দেশত ১৮২জন লোকৰ মৃত্যু হৈছিল আৰু ইয়াৰে সৰ্বাধিক ৯৪জন অসমৰ। একেদৰে ২০১৯ত দেশত মৃত্যু হোৱা ২৬৬জনৰ ভিতৰত সৰ্বাধিক ১৬১জন অসমৰ। ইয়াৰ উপৰি ২০২০ত মৃত্যু হোৱা ৮২জনৰ ভিতৰত ৫১জন, ২০২১ত মৃত্যু হোৱা ৭০ জনৰ ৪০জন, ২০২২ত মৃত্যু হোৱা ১৩০জনৰ ৯৬জন, ২০২৩ত মৃত্যু হোৱা ৬৫ জনৰ ৩৪জন আৰু ২০২৪ত জাপানী এনকেফেলাইটিছত দেশত মৃত্যু হোৱা ১০৫ জনৰ ভিতৰত ৫৩জন অসমৰ ।