Annoying :✒️পুৱা শুই উঠাৰ পাছতে অকাৰণতে খং উঠে নেকি? গা-মন সকলো সময়তে বেয়া লাগি থাকে নেকি বা আপুনি খিংখিঙীয়া হৈছে নেকি? সম্ভৱতঃ আগতে আপুনি এনে নেতিবাচক কাৰক অনুভৱ কৰা নাছিল।
আপোনাৰ এনে পৰিৱৰ্তনৰ মাথোঁ এটাই কাৰক আছে। সেয়া হ’ল আপোনাৰ শৰীৰত মেগনেচিয়ামৰ অভাৱ ঘটিছে। শৰীৰত বিভিন্ন খনিজ পদার্থই বিভিন্ন কার্য সম্পাদন কৰে। এনে এবিধ খনিজ পদার্থ হ’ল মেগনেচিয়াম।
মেগনেচিয়ামৰ অভাৱত গা-মন ভাগৰুৱা হৈ পৰে। দিনটোৰ অধিকাংশ সময়তে মন বেয়া লাগি থাকিব পাৰে। ‘পাবমেড’ত প্রকাশিত শেহতীয়া এক গৱেষণাপত্র অনুসৰি, শৰীৰত মেগনেচিয়ামে বিশেষ ভূমিকা পালন কৰে।
এই খনিজ পদার্থই ৰক্তচাপ নিয়ন্ত্ৰণত ৰখাৰ লগতে হৃদযন্ত্রও সুস্থ-সবল কৰি ৰাখে। শৰীৰত প্ৰয়োজনীয় পৰিমাণত মেগনেচিয়াম থাকিলে হার্টফেইলৰ সম্ভাৱনা হ্রাস পায়। আনকি মেগনেচিয়ামে শৰীৰত ৰক্ত শৰ্কৰাৰ পৰিমাণো নিয়ন্ত্ৰণত ৰাখে।
মহিলাসকলৰ ক্ষেত্ৰত ঋতুচক্র স্বাভাৱিক ৰখাটো মেগনেচিয়ামে গুৰুত্বপূৰ্ণ ভূমিকা পালন কৰে। অর্থাৎ কেলচিয়ামে যিদৰে হাড় সবল কৰি ৰাখে, তেনে গুৰুত্বপূর্ণ ভূমিকা মেগনেচিয়ামে পালন কৰে।
আনকি মেগনেচিয়ামে হাড় আৰু দাঁত ভালে ৰখাতো সহায় কৰে। তদুপৰি মেগনেচিয়ামৰ অভাৱত পেশী দুর্বল হয়। শৰীৰত ভিটামিন ডি হ্রাস পোৱাৰ কাৰণো মেগনেচিয়াম হ’ব পাৰে। সেয়েহে ভিটামিন ডি ছাপ্লিমেন্টৰ স’তে চিকিৎসকে মেগনেচিয়াম গ্রহণৰো পৰামৰ্শ দিয়ে।
বিশেষজ্ঞসকলৰ মতে, মানুহে সহজে মেগনেচিয়ামযুক্ত আহাৰ গ্ৰহণ কৰিব পাৰে। তাৰ বাবে বিশেষ টকা-পইচা খৰচ কৰাৰ প্রয়োজন নাই। বিশেষজ্ঞসকলৰ মতে, প্ৰচুৰ পৰিমাণে মেগনেচিয়াম থকা এবিধ শাক হ’ল পালেং শাক।
একাপ সিজোৱা পালেং শাকত কমেও ৭৮ মিলিগ্রাম মেগনেচিয়াম থাকে। কেতবোৰ বীজ আৰু বাদামতো মেগনেচিয়াম প্ৰচুৰ পৰিমাণে পোৱা যায়। উদাহৰণ স্বৰূপে একাপ মটৰত কমেও ৬০ মিলিগ্রাম মেগনেচিয়াম পোৱা যায়। একেদৰে কল, কাজু আদিতো মেগনেচিয়াম থাকে।
শৰীৰত উপযুক্ত পৰিমাণত মেগনেচিয়াম থাকিলে দেহ-মনলৈ সহজে ক্লান্তি নাহে। পেশী, হৃদযন্ত্র আদি সবল হৈ থাকে। দেহত প্ৰচুৰ পৰিমাণে মেগনেচিয়াম থাকিলে অকাৰণতে মনো বেয়া নালাগে। গতিকে ছডিয়াম, পটাছিয়াম, কেলচিয়ামৰ দৰে মন-শৰীৰৰ বাবে মেগনেচিয়ামো অত্যন্ত প্রয়োজন।