Raid:✒️ওড়িশা বন বিভাগৰ আন এজন বিষয়াৰ ঘৰকে ধৰি কেবাটাও স্থানত আজি চলোৱা হয় অনুসন্ধান অভিযান।এই পৰ্যন্ত উদ্ধাৰ হৈছে কমেও ১কোটি ৪৪ লাখ টকা । ধন গণনাৰ বাবে অনা হৈছে মেচিন।
উদ্ধাৰ হোৱা ধনৰ পৰিমাণ আৰু বৃদ্ধি পাব পাৰে বুলি ধাৰণা কৰা হৈছে।
নোটৰ লগতে ওড়িশাৰ ডেপুটি ৰেঞ্জাৰ চন্দ্ৰ নেপকৰ ঘৰৰ পৰা চাৰিটা সোণৰ বিস্কুট আৰু ১৬টা সোণৰ মুদ্ৰাও উদ্ধাৰ কৰা হয়। প্ৰতিটো মুদ্ৰাৰ ওজন প্ৰায় ১০ গ্ৰাম।
আজি ওড়িশা ভিজিলেন্স বিভাগে এই অনুসন্ধান অভিযান চলাইছিল।শেহতীয়া তথ্য অনুসৰি ওড়িশাৰ নেপকৰ স’তে জড়িত ছটা স্থানত এতিয়াও অনুসন্ধান চলি আছে।
ওড়িশা প্ৰশাসনৰ সূত্ৰ অনুসৰি নেপক জয়পুৰ বনাঞ্চলত ডেপুটি ৰেঞ্জাৰ হিচাপে নিযুক্তি দিয়া হৈছে। শুকুৰবাৰে তেওঁৰ জয়পুৰ ফ্লেটৰ পৰা উদ্ধাৰ হয় বিপুল পৰিমাণৰ নগদ ধন।
নগদ ধন গণনা কৰিবলৈ তাতো মেচিন অনা হৈছে। সেই আৱাসত নেপকৰ আন এটা ফ্লেটও আছে। সেই স্থানটো অনুসন্ধান চলোৱা হৈছে।
শুকুৰবাৰে জয়পুৰত থকা নেপকৰ পৈতৃক ঘৰ আৰু শহুৰেকৰ ঘৰতো তালাচী চলাইছে। ভিজিলেন্স বিভাগৰ বিষয়াই তেওঁৰ কাৰ্যালয়ত তালাচী চলাইছে।।
উল্লেখ্য যে,যোৱা সপ্তাহত ওড়িশাৰ কেওনঝাৰত এজন সংমণ্ডল বন বিষয়াৰ ঘৰকে ধৰি সাতটা স্থানত তালাচী চলোৱা হৈছিল। তালাচীৰ সময়ত বিষয়াসকলে নিত্যানন্দ নায়ক নামৰ বিষয়াজনৰ ওড়িশাত ১১৫টা মাটি পোৱা গৈছে।
লগতে ভিজিলেন্সৰ বিষয়াসকলে তেওঁৰ ঘৰৰ পৰা ২০০ গ্ৰাম সোণ, নগদ এক লাখ ৫৫ হেজাৰ টকা, মূল্যৱান সামগ্ৰী, আৰু এটা ৰাইফল জব্দ কৰে। ওড়িশাৰ আংগুলত তেওঁৰ চাৰি মহলীয়া ঘৰ আছে।
ইয়াৰোপৰি নিত্যানন্দৰ চাৰিখন গাড়ী, চাৰিখন বাইক, মূল্যবান চেগুন কাঠো জব্দ কৰা হৈছে। অভিযানকাৰী বিষয়াসকলৰ এক সূত্ৰই জনোৱা মতে, নিত্যানন্দৰ দৰে ইমান মূল্যবান সামগ্ৰী ওড়িশাৰ কোনো চৰকাৰী বিষয়াৰ হাতত নাই।