Sonapur:
অসম চৰকাৰৰ সাংস্কৃতিক পৰিক্ৰমা বিভাগৰ উদ্যোগত আৰু কামৰূপ মহানগৰ জিলা প্ৰশাসনৰ সহযোগত নৱগঠিত ডিমৰীয়া সমষ্টিভিত্তিক অনুষ্ঠিত গ্রীষ্মকালীন লোকনৃত্য কর্মশালাৰ ২৫ জুলাইত সামৰণি পৰে। উল্লেখ্য যে প্রতিভা কালচাৰেল ছ’চিয়েল অর্গেনাইজেছনৰ তত্ত্বাৱধানত নৰতাপ উচ্চ মাধ্যমিক বিদ্যালয় প্রাংগণত ১৫ দিনীয়াকৈ অনুষ্ঠিত কর্মশালাত কাৰ্বি আংলং জিলাৰ ৰিতনং চিংদি, নিমচ কিৰুং আৰু ডিমৰীয়াৰ দমাহী কিকান লোক নৃত্যৰ প্ৰশিক্ষণ প্রদান কৰা হয়।
এই উপলক্ষে অনুষ্ঠিত সামৰণি অনুষ্ঠানত প্রশিক্ষণত অংশগ্ৰহণ কৰা প্রশিক্ষার্থীসকলে লোকনৃত্য প্রদর্শনেৰে পৰিবেশ জীপাল কৰি তোলে। নীল প্রতিভা সাংস্কৃতিক গোষ্ঠীৰ অধ্যক্ষ নীলকান্ত ৰাহাঙে আঁত ধৰা অনুষ্ঠানত ডিমৰীয়াৰ সমজিলাৰ সহকাৰী আয়ুক্ত হীৰকজ্যোতি শইকীয়া, তিৱা পৰিষদৰ কাৰ্যবাহী সদস্য পৰেশ ৰাহাং, সদস্য ভবেশ কাথাৰ, সোণাপুৰ উচ্চতৰ মাধ্যমিক বিদ্যালয়ৰ অধ্যক্ষা জুৰি দেৱী গোস্বামী, নৰতাপ হাইস্কুলৰ প্ৰধান শিক্ষক নন্দেশ্বৰ কাথাৰ, নৰতাপ এম ই স্কুলৰ প্ৰধান শিক্ষক অজিত কাথাৰ উপস্থিত থাকি প্রশিক্ষার্থীসকলক মানপত্র বিতৰণ কৰে।
একেটা অনুষ্ঠানত ডিমৰীয়াৰ জ্যেষ্ঠ লোকশিল্পী দীপক কছাৰী, কেশৱ ইংতি, গুৰেন দেউৰী, প্রফুল্ল কাথাৰ, উইলবার্ট ৰংচন, বেলছিং ৰাহাং, ধৰ্মেশ্বৰ কাথাৰ, ইন্দ্ৰজিৎ ৰংপি, নাট্যকর্মী তথা অভিনেতা ৰাজীৱ ৰাহাং আৰু অমন ৰাহাঙক নীল প্রতিভা গোষ্ঠীৰ তৰফৰ পৰা ফুলাম গামোচা আৰু মানপত্ৰৰে সম্বর্ধনা জনোৱা হয়। তদুপলক্ষে অনুষ্ঠানত কাৰ্বি আংলঙৰ প্রশিক্ষকসকল ক্রমে সুভাষ কিলিং, জুবিন ৰংফাৰ, সেৰলিকা তকবিপি, আলিছা বেপি, সাংস্কৃতিক গোষ্ঠীৰ অন্যতম কর্মকর্তা প্রতিভা দাস কেলেংপি প্রমুখ্যে স্থানীয় ৰাইজ উপস্থিত থাকে।